Pasin Bilong Stap Aninit Long Ol Man God i Givim Wok Long Ol Inap Helpim Yumi

EM I bikpela samting long stap aninit long God, em King Bilong Heven na Graun, bilong yumi ken mekim laik bilong em. Yumi luksave olsem Pikinini bilong em i het bilong kongrigesen Kristen, na tu, yumi bihainim stiatok bilong Baibel long i stap aninit long ol man i gat wok long bosim yumi. Dispela pasin bilong i stap aninit long ol man God i givim wok long ol i helpim yumi olgeta.

² Long gaden Iden, God i bin kamapim dispela stiatok olsem yumi olgeta man i mas i gat man em yumi stap aninit long em. Dispela stiatok i stap long tok God i mekim long Stat 1:28 na 2:16, 17. Olgeta arapela samting i gat laip i mas i stap aninit long ol man, na Adam tupela Iv i mas stap aninit long laik na namba bilong God. Pasin bilong bihainim laik bilong God bai kamapim bel isi na gutpela sindaun. Namba 1 Korin 11:3 i stori moa long dispela stiatok olsem yumi stap aninit long ol man i gat wok long bosim yumi. Aposel Pol i tok: “Mi laik bai yupela i save olsem het bilong olgeta man em Krais; na het bilong meri em man; na het bilong Krais em God.” Dispela i soim olsem olgeta man i gat man ol i mas stap aninit long em, Jehova wanpela tasol, nogat.

³ Planti man long nau i no luksave o bihainim dispela stiatok olsem yumi olgeta i gat man yumi mas stap aninit long em. Bilong wanem? Dispela hevi i kirap long Iden taim tupela tumbuna bilong yumi i bikhet na i no laik stap aninit long wok bos bilong God. (Stt. 3:4, 5) Tasol dispela i no mekim na ol i stap fri moa. Nogat. Ol i stap aninit long wanpela spirit nogut, em Satan dispela Devil. Namba wan pasin bikhet i mekim na ol man i stap longwe long God. (Kol. 1:21) Olsem na klostu olgeta man long nau i stap aninit long strong bilong dispela spirit nogut.—1 Jon 5:19.

⁴ Taim yumi lainim tok i tru bilong Baibel na bihainim, yumi no stap moa aninit long strong bilong Satan. Yumi ol Witnes i dediket na baptais pinis, yumi amamas long i stap aninit long Jehova olsem King bilong yumi. Yumi wanbel long tok bilong King Devit, em i tok Jehova i “stap het bilong olgeta samting.” (1 Sto. 29:11) Tru tumas, long pasin daun yumi tokaut olsem: “Yupela i mas save olsem Jehova, em wanpela tasol i God. Em i bin wokim yumi, olsem na yumi bilong em. Yumi lain manmeri bilong em na yumi olsem ol sipsip em i save lukautim.” (Sng. 100:3) Yumi save Jehova i bikpela tru na i stret yumi mas daun olgeta long em, long wanem, em i bin wokim olgeta samting. (Rev. 4:11) Yumi ol wokman bilong God tru, olsem na yumi bihainim pasin bilong Jisas Krais husat i bin stap gutpela piksa tru long stap daun long God.

⁵ Jisas i lainim wanem ol samting long ol hevi em i bin karim hia long graun? Hibru 5:8 i bekim dispela askim: “Maski em i Pikinini bilong God, ol pen na hevi em i karim i skulim em long pasin bilong bihainim tok.” Yes, long olgeta taim Jisas i stap gut aninit long Papa bilong em long heven, long taim bilong hevi tu em i mekim olsem. Na tu, Jisas i no mekim wanpela samting long laik bilong em yet. Em i no kamapim ol tok long tingting bilong em yet; na em i no laik kisim biknem. (Jon 5:19, 30; 6:38; 7:16-18) Long ol wok bilong God em i mekim, em i amamas long mekim laik bilong Papa bilong em, maski dispela i mekim na ol man i birua na mekim nogut long em. (Jon 15:20) Jisas i soim olsem em i aninit long God. Jisas i “daunim em yet” na bihainim tok bilong God i go inap long em i “dai long diwai pos.” Pasin bilong em long daun olgeta long Jehova i kamapim planti gutpela samting, olsem ol man inap kisim laip oltaim, Jisas yet i kisim bikpela namba, na Papa bilong em i kisim glori.—Fili. 2:5-11; Hib. 5:9.

OL HAP EM YUMI MAS ANINIT LONG OL MAN GOD I GIVIM WOK LONG OL

⁶ Taim yumi stap aninit long God na mekim laik bilong em, yumi abrusim planti bel hevi i save painim ol man i no laik stap aninit long wok bos bilong Jehova. Birua bilong yumi, dispela Devil, i wok oltaim long painim rot bilong bagarapim yumi. Tasol Satan i no inap pundaunim yumi sapos yumi strong long sakim em na yumi amamas long daunim yumi yet aninit long Jehova.—Mat. 6:10, 13; 1 Pita 5:6-9.

⁷ Insait long kongrigesen Kristen, yumi save Krais i stap het na em i bin givim namba long “gutpela wokboi i gat savetingting.” Dispela i stiaim tingting bilong yumi na pasin yumi mekim long ol arapela. Pasin bilong daun long wok bos God i putim insait long kongrigesen bai kirapim yumi long bihainim tok bilong Baibel long olgeta samting long lotu bilong yumi. Olsem: Yumi mas bihainim tok long ol samting bilong autim tok, go long ol miting na bekim tok, pas gut wantaim ol elda, na wok gut wantaim ol samting oganaisesen bilong God i putim.—Mat. 24:45-47; 28:19, 20; Hib. 10:24, 25; 13:7, 17.

⁸ Pasin bilong yumi long daun long God i save kamapim bel isi, pasin bilong stap gut, na ol samting i wok gut long kongrigesen Kristen. Ol wokman bilong Jehova i kamapim ol gutpela pasin bilong em. (1 Kor. 14:33, 40) Ol samting i bin painim yumi insait long oganaisesen bilong Jehova i kirapim yumi long mekim wankain tok olsem bilong King Devit. Devit i skelim ol wokman bilong Jehova wantaim ol man nogut, na em i amamas long tok: “Ol manmeri God bilong ol em Jehova, ol i ken amamas!”—Sng. 144:15.

⁹ Insait long marit na famili, “het bilong meri em man.” Ol man i aninit long Krais, na Het bilong Krais, em God. (1 Kor. 11:3) Ol maritmeri i mas stap aninit long man bilong ol, na ol pikinini i mas stap aninit long papamama bilong ol. (Efe. 5:22-24; 6:1) Bel isi i kamap taim olgeta insait long famili i daun long het bilong ol.

¹⁰ Maritman i mas bihainim pasin bilong Krais na kamapim pasin laikim taim em i mekim wok olsem het bilong famili. (Efe. 5:25-29) Taim man i no hambak o les long mekim wok bilong em olsem het bilong famili, meri na ol pikinini bai amamas long stap aninit long em. Meri i stap olsem helpim bilong man. (Stt. 2:18) Taim meri i sapotim na rispek long man bilong em, pasin bilong em i mekim na man i laikim em na dispela i litimapim nem bilong God. (1 Pita 3:1-4) Taim ol man na meri marit i bihainim tok bilong Baibel long daun long het bilong ol, ol i stap gutpela piksa ol pikinini i ken bihainim long pasin bilong stap daun long God.

¹¹ Pasin bilong yumi long daun long God i stiaim tu tingting bilong yumi long “ol gavman,” long wanem, “God yet i putim ol na ol i stap.” (Rom 13:1-7) Ol Kristen i save bihainim ol lo bilong gavman na ol i baim takis, olsem “ol samting bilong Sisar, givim long Sisar, na ol samting bilong God, givim long God.” (Mat. 22:21) Na tu, yumi save bihainim lo bilong gavman long teritori yumi autim tok long en. Taim yumi daun na bihainim tok bilong gavman long ol samting i no pait wantaim ol stretpela lo bilong Jehova, yumi inap putim tingting na strong bilong yumi long wok bilong autim tok.—Mak 13:10; Apo. 5:29.

¹² Pasin bilong stap aninit long ol man God i givim wok long ol i bosim olgeta samting long laip bilong yumi. Yumi bilip na piksaim long tingting dispela taim we olgeta man bai i stap daun long God Jehova. (1 Kor. 15:27, 28) Ol manmeri i amamas long daun long wok king bilong Jehova na stap olsem inap oltaim oltaim, ol bai stap gut!