Ol Samting Yumi Mas Mekim Bilong Daun Long God
“Yupela i mas daunim yupela yet na i stap aninit long God.”—JEMS 4:7.
GOD Jehova em i nambawan gutpela God! Pasin bilong em i gutpela tru. Em i Nambawan Bikpela, na em i Nambawan King na Bos tru bilong olgeta hap. Em i save stap oltaim oltaim, na em i lait bikpela moa na i no inap man i ken lukim em na i stap laip yet. (Kisim Bek 33:20; Rom 16:26) Strong na save bilong em i moa moa yet, na pasin bilong em i stret olgeta, na em i gat bikpela pasin sori long ol man. Em i Man bilong wokim yumi, na em i Man bilong skelim pasin bilong yumi, na givim lo long yumi, na stap King bilong yumi. Em i As bilong olgeta gutpela samting yumi save kisim.—Song 100:3; Aisaia 33:22; Jems 1:17.
2 Olsem na i gat as tru na yumi mas daun long Jehova. Na i gat sampela samting yumi mas mekim na bai yumi daun long em, na ol dispela samting i olsem: Yumi no inap lukim Jehova, olsem na yumi mas harim tok bilong maus bilong bel em i lain pinis long ol lo bilong Jehova, na yumi mas larim oganaisesen bilong God i stiaim yumi, na yumi mas daun long gavman, na yumi mas stap aninit long bos bilong famili.
Maus Bilong Bel i No Gat Tok
3 I gat sampela kain lo o tambu, sapos yumi no bihainim, ol man i no inap strafim yumi. Wanpela lo olsem em dispela namba 10 lo God Jehova i bin givim long Moses na i tok, no ken mangal. I no gat wanpela gavman bilong graun inap putim dispela lo na tok, sapos man i brukim dispela lo em bai kisim strafe. Long dispela as yumi save, God yet i kamapim Tenpela Lo, long wanem, i no gat wanpela man bilong graun bai kamapim wanpela lo sapos em i no inap givim strafe long man i brukim dispela lo. Olgeta wan wan Israel yet i mas bosim tingting bilong em na bai em i no ken mangal na bel bilong em i no gat tok. (Kisim Bek 20:17) Man i mangal em i no ken i stap insait long Kingdom bilong God. Na i olsem tu long pasin bilong bel nogut o bel kaskas long narapela man—sapos yumi gat ol dispela kain pasin, ol man bilong graun i no inap save, olsem na ol i no inap kotim yumi long en o givim strafe long yumi long dispela samting. (Galesia 5:19-21) Tasol yumi yet i mas klia long dispela kain pasin na bai bel bilong yumi i no gat tok.
4 Long olgeta samting yumi mekim, yumi mas bihainim ol lo bilong Baibel. Ol dispela lo i insait long tupela lo em Krais Jisas i bin kolim, na sapos yumi bihainim dispela tupela lo, bel bilong yumi bai i no gat tok. Dispela tupela lo i olsem: “Yupela i mas laikim [God Jehova] tru long bel bilong yupela na long spirit bilong yupela na long tingting bilong yupela. . . . Yu mas laikim ol [narapela man] olsem yu laikim yu yet.” (Matyu 22:36-40) Na Jisas i stori long namba 2 lo hia na i tok: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol. Dispela em i as tok bilong lo.”—Matyu 7:12.
5 Yumi mas bihainim pasin yumi save em i stret, na yumi mas abrusim pasin yumi save i no stret, maski ol narapela man i save yumi mekim olsem o nogat, na maski ol i kotim yumi o givim strafe long yumi o nogat. Yumi mas i stap gut long ai bilong Papa bilong yumi long heven, na yumi no ken lusim tingting long wanpela tok bilong Pol em i tok: “I no gat wanpela samting . . . em inap hait long pes bilong God. Nogat tru. Olgeta samting i op olgeta na i stap ples klia tru long ai bilong God. Na God tasol bai i skelim olgeta pasin yumi mekim.” (Hibru 4:13) Sapos yumi strong long bihainim pasin i stret, dispela tingting bai helpim yumi long sakim Satan long taim em i laik grisim yumi, na dispela tingting bai helpim yumi long givim baksait long pasin bilong graun na long daunim ol laik nogut bilong skin.—Lukim Efesus 6:11.
Daun Long Oganaisesen Bilong God
6 God Jehova i save helpim yumi long bihainim ol lo bilong Baibel; em i no larim yumi yet i mas tingim ol samting yumi mas mekim bilong bihainim ol dispela lo. Bipo yet em i wokim rot bilong helpim ol man olsem—em i bin makim sampela man i olsem maus bilong em. Adam i olsem maus bilong God long givim tok long Iv long dispela diwai tambu. Taim Iv i no bin kamap yet, God i bin tokim Adam long dispela diwai, olsem na ating Adam i bin tokim Iv long ol narapela laik tu bilong God. (Stat 2:16-23) Noa tu i olsem maus bilong God na profet bilong God long givim tok long famili bilong em na long ol narapela man tu. (Stat 6:13; 2 Pita 2:5) Abraham em i maus bilong God long givim tok long famili bilong em. (Stat 18:19) Moses em maus bilong God long givim tok long ol Israel. (Kisim Bek 3:15, 16; 19:3, 7) Na bihain moa, i kam inap long Jon Bilong Baptais, sampela ol profet na pris na king i bin stap olsem maus bilong God bilong tokaut long ol man long ol samting God i laik mekim.
7 Taim Mesaia Krais Jisas i kamap long graun, em wantaim ol aposel na disaipel i stap olsem maus bilong God. Bihain moa lain bilong Jisas em God i bin makim ol, ol i stap olsem “wokboi i gat gutpela tingting” na i olsem maus bilong Jehova long helpim lain bilong em long bihainim ol lo bilong Baibel. Olsem na bilong daun long God yumi mas bihainim tok bilong dispela lain i stap olsem maus bilong em.—Matyu 24:45-47; Efesus 4:11-14.
8 Long nau dispela lain olsem “wokboi i gat gutpela tingting,” em ol Witnes Bilong Jehova, na maus bilong dispela “wokboi” em Lain Bilong Bosim Ol Witnes Bilong Jehova. Ol i save makim husat bai kamap elda, na husat bai kamap wasman bilong raun, olsem wasman sekit na wasman distrik. Ol dispela wasman i bilong bosim ol wok bilong autim tok long hap bilong ol, na ol Witnes i baptais pinis ol i mas daun long ol olsem Hibru 13:17 i tok: “Ol lida [elda] bilong yupela ol i laik helpim yupela, na ol i save was long yupela oltaim. Na bihain bai ol i mas tokim God long olgeta wok ol i bin mekim. Olsem na yupela i mas bihainim tok bilong ol na i stap aninit long ol. Sapos yupela i mekim olsem, orait ol bai amamas na mekim wok bilong ol, na ol bai i no inap bel hevi. Sapos ol i bel hevi long lukautim yupela, dispela bai i no helpim yupela.”
Harim Tok Bilong Stretim Yu
9 Sapos yumi bihainim tok ol wasman i givim long yumi bilong stretim yumi, dispela i makim olsem yumi daun long God. Sapos yumi yet i no wok long stretim pasin bilong yumi, ol elda i mas stretim yumi, em ol i gat save na namba bilong mekim dispela wok. Yumi mas bihainim savepasin na harim tok bilong ol.—Sindaun 12:15; 19:20.
10 Na ol elda yet i mas i stap olsem gutpela piksa bilong bihainim tok bilong God, olsem Galesia 6:1 i tok: “Sapos yupela i save olsem wanpela . . . i bin mekim sin, . . . yupela i mas mekim pasin isi long dispela man na helpim em long stretim pasin bilong em. Tasol yupela i mas lukaut gut long yupela yet. Nogut Satan i traim yupela na yupela tu i pundaun long sin.” Sapos elda i tokim brata long bihainim pasin i stret, elda yet i mas bihainim pasin i stret, olsem 2 Timoti 2:24, 25 na Taitus 1:9 i tok. Taim elda i stretim brata o sista, em i no ken krosim ol. Em i mas tok isi long ol na mekim gutpela pasin long ol, tasol em i mas strong long kamapim ol lo bilong Baibel long ol. Elda i mas putim gut yau long tok bilong ol, na strongim bel bilong ol man i gat hevi.—Lukim Matyu 11:28-30.
Daun Long Gavman
11 Na bilong daun long God yumi mas daun long gavman tu, olsem Rom 13:1 i tok: “Olgeta man i mas i stap aninit long ol gavman. . . . Olgeta wok bilong gavman i kamap long han bilong God tasol. Na olgeta gavman i stap, God yet i putim ol na ol i stap.” Olsem na yumi mas bihainim ol lo bilong draivim ka long rot, na givim takis long gavman, olsem Pol i tok long Rom 13:7.
12 Tasol Kristen i save, long sampela samting Sisar i mas i stap namba tu. Yumi mas tingim tok bilong Jisas, em i tok: “Samting bilong Sisar, em yupela i mas givim long Sisar. Na samting bilong God, em yupela i mas givim long God.” (Matyu 22:21) Wanpela Baibel (Oxford NIV Scofield Study Bible) i tok, ‘Jisas i no tok Kristen i mas bihainim tok bilong Sisar long mekim sampela pasin nogut, nogat. Kristen i mas putim lo bilong God i antap long lo bilong ol man (Aposel 5:29; Daniel 3:16-18; 6:10).’
Bihainim Pasin Daun Insait Long Famili
13 Papa i stap bos bilong famili, olsem na mama i mas harim tok bilong Efesus 5:22, 23 i tok: “Yupela meri, yupela i mas aninit long ol man bilong yupela, olsem yupela i save aninit long Bikpela. Long wanem, man em i [bos] bilong meri bilong en, olsem Krais em i [bos] bilong [kongrigesen].”a Na pikinini i no ken bihainim laik bilong em yet, nogat. Em i mas daun long tok bilong papamama, olsem Pol i tok long Efesus 6:1-3: “Yupela pikinini, yupela i mas bihainim tok bilong papamama bilong yupela. . . . God i tok olsem, ‘Yu mas aninit long papamama bilong yu na bihainim tok bilong ol.’ . . . ‘Sapos yu mekim olsem, orait olgeta wok samting yu mekim i ken kamap gutpela na bai yu stap longpela taim long dispela graun.’ ”
14 Na sapos papa yet i daun long God, i no hatwok long mama na ol pikinini i daun long bos bilong famili olsem Baibel i makim long Efesus 5:28, 29 na 6:4 i tok: “Yupela man, yupela i mas laikim tru ol meri bilong yupela, olsem yupela i save laikim bodi bilong yupela yet. Man i laikim tru meri bilong en, em i laikim tru em yet. Yumi save, i no gat wanpela man i save birua long bodi bilong em yet. Nogat. Em i save givim kaikai long en na lukautim gut, olsem Krais i save mekim long [kongrigesen].” “Yupela papa, yupela i no ken bagarapim tingting bilong ol pikinini bilong yupela na mekim ol i belhat long yupela. . . . Stretim gut ol . . . na skulim ol long tok bilong Bikpela.”
Bilong Helpim Yumi Long Daun Long God
15 Wanem samting bai helpim yumi long daun long God long ol dispela samting? Namba wan samting, em yumi mas laikim tumas God Jehova na ol narapela em Jehova i makim bilong bosim yumi. 1 Jon 5:3 i tok: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.” Na Jisas i tok: “Sapos yupela i laikim mi tru, orait yupela bai i bihainim gut ol tok bilong mi.” (Jon 14:15) Tru tumas, sapos yumi gat “pasin bilong laikim tru ol arapela,” em namba wan pasin spirit holi i kamapim, bai yumi amamas long ol gutpela samting em i bin mekim long yumi, na dispela bai helpim yumi long i stap aninit long em.—Galesia 5:22.
16 Na namba tu samting, em yumi mas pret long Jehova, olsem pret long mekim wanpela samting em i no amamas long en, olsem “no laik tru long pasin bilong bikhet.” (Sindaun 8:13) Sapos yumi pret long mekim nogut bel bilong Jehova olsem, bai yumi no pret long ol man bilong graun na yumi brukim lo bilong Jehova, nogat. Bai yumi wok strong long bihainim tok bilong Jehova, maski wanem hevi i painim yumi. Na dispela kain pret bai helpim yumi na bai yumi givim baksait long ol samting i laik pulim yumi long mekim pasin nogut. Abraham i bin pret olsem long Jehova, na dispela i strongim em na em i laik givim Aisak long God olsem ofa. Na Josep i bin pret long Jehova, na dispela i strongim em long sakim meri bilong Potifar taim meri i laik pulim em long mekim pasin pamuk.—Stat 22:12; 39:9.
17 Na namba 3 samting em olsem: Sapos yumi bilip long God Jehova, dispela bai helpim yumi long bihainim tok bilong Sindaun 3:5, 6: “Yu mas bilip strong long [Jehova]. Yu no ken ting save bilong yu yet inap helpim yu. Long olgeta samting yu mekim, yu mas tingting strong long [Jehova] na yu mekim, na em bai i soim yu stretpela rot long bihainim.” Sapos yumi bel hevi long wanpela samting, o yumi ting ol man i no laikim yumi, long wanem yumi bilong narapela kantri o skin, o sampela pasin bilong yumi i skrapim bel bilong ol, orait, sapos yumi bilip long Jehova, yumi no ken larim dispela hevi i daunim yumi. Sapos brata i ting ol i mas makim em long kamap wokman o elda, tasol ol i no mekim, em i no ken bel hevi. Em i ken wetim Jehova i stretim ol samting, na em i ken lain long i stap strong na karim hevi na no ken les.—Krai 3:26.
18 Namba 4 samting bilong helpim yumi, em pasin daun. Man i gat pasin daun em i no hatwok long i stap aninit long narapela. Pol i tok: “Yupela i no ken tingting long yupela yet tasol . . . Yupela i mas daunim yupela yet na yupela i mas ting pasin bilong ol arapela i winim pasin bilong yupela.” (Filipai 2:2-4) Na man i gat pasin daun em bai stap olsem “man i no gat nem na i stap liklik tru.” (Luk 9:48) Tasol man i gat pasin antap em i no laik bihainim tok bilong narapela man, na em i no laik harim tok bilong stretim em.
19 Josep Ratefot (Joseph Rutherford) em namba 2 presiden bilong Sosaiti Was Taua na em i man bilong pasin daun. Taim Hitler i tambuim wok bilong ol Witnes Bilong Jehova long Jemani ol brata bilong Jemani i raitim pas long dispela presiden na askim em long ol i mas mekim wanem. Em i tokim famili bilong Betel long dispela pas, na em i tok, em i no save long sampela tok em i ken givim long ol brata long Jemani, na sapos sampela i ken helpim em long sampela tok, em bai amamas. Tru tumas, em i man bilong pasin daun!b
Sapos Yumi Daun Long God Dispela Bai Helpim Yumi
20 Sapos yumi daun long God, dispela bai helpim yumi olsem wanem? Em bai helpim yumi long planti samting. Ol hevi i save painim ol man i bihainim tingting bilong ol yet, dispela hevi i no inap painim yumi. Yumi stap pren bilong God Jehova. Yumi gat gutpela lain brata Kristen yumi ken bung wantaim ol. Na yumi save bihainim ol lo bilong gavman, olsem na yumi no kisim hevi o strafe long gavman. Na sapos yumi i papa o mama o man marit o meri marit o pikinini, yumi stap amamas wantaim famili. Na sapos yumi daun long Jehova, bai yumi bihainim tok bilong em olsem: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.”—Sindaun 27:11.
[Ol Futnot]
a Wanpela brata painia i stori long gutpela pasin daun bilong meri bilong em, na meri i wanbel long ol samting em i laik mekim. Orait, narapela brata i harim na em i ting, dispela painia i mas stori tu long ol narapela gutpela pasin bilong meri. Bihain dispela brata tu i maritim wanpela meri, na nau em i save, pasin daun na pasin wanbel bilong meri em i bikpela samting bilong helpim tupela long i stap amamas.
b Bihain em i beten na stadi long Baibel na bai em i ken tingim wanem tok em i ken givim long ol brata long Jemani, na nau em i save gut long tok em i mas givim long ol. Em i tokim ol olsem: Ol yet i mas tingim wanem samting ol i mas mekim; i no wok bilong em long tokim ol; ol i gat Baibel, na Baibel inap tokim ol long ol i mas mekim wanem long bung wantaim na long autim tok. Olsem na ol dispela brata i kirap na wok hait long bihainim tok bilong Jehova long bung na long autim tok long nem na Kingdom bilong Jehova.
Sampela Askim
◻ Husat sampela man i bin stap olsem maus bilong God? Lain bilong God i mas mekim wanem long tok bilong ol dispela man?
◻ Husat ol i mas daun long God?
◻ Yumi mas i gat wanem ol kain pasin bilong helpim yumi long i stap daun long God?
◻ Sapos yumi daun long God, bai yumi kisim wanem ol gutpela samting long en?
[Askim Bilong Stadi]
1. God bilong yumi em i wanem kain God?
2. Wanem samting yumi mas mekim bilong daun long God?
3. Wanem sampela kain lo o tambu yumi mas bihainim na bai bel bilong yumi i no gat tok?
4. Wanem ol lo bilong Baibel yumi mas bihainim na bai bel bilong yumi i no gat tok?
5. Yumi mas mekim wanem na bai yumi ken stap gut long ai bilong God?
6. Long bipo, husat i bin stap olsem maus bilong God?
7, 8. (a) Taim Mesaia i kam, husat ol i bin i stap olsem maus bilong God? (b) Ol Witnes Bilong Jehova long nau ol i mas mekim wanem bilong daun long God?
9. Yumi mas mekim wanem bilong daun long God?
10. Ol man i gat wok long stretim narapela man, olsem ol elda, ol yet i mas mekim wanem?
11. Kristen i mas mekim wanem long gavman?
12. Taim yumi daun long God, olsem wanem Sisar i namba 2 tasol?
13. Olgeta wan wan long famili i mas mekim wanem na bai ol i daun long God?
14. Papa i mas mekim wanem na bai em i daun long God?
15. Wanem samting bai helpim yumi long i stap daun long Jehova?
16. Sapos yumi pret long Jehova, olsem wanem dispela bai helpim yumi long i stap daun long em?
17. Olsem wanem bilip i helpim yumi long i stap daun long God?
18. Wanem pasin i ken helpim man long i stap daun long narapela man?
19. Wanpela presiden bilong Sosaiti Was Taua long bipo em i bin mekim wanem na yumi save em i gat pasin daun?
20. Wanem gutpela samting inap kamap sapos yumi daun long God?
[Piksa long pes 16]
Long rot bilong haus lotu long Jerusalem God i givim tok long lain bilong em
[Ol Piksa long pes 18]
Ol samting yumi ken mekim bilong daun long God