Husat i Mas Daun Long God? Bilong Wanem Ol i Mas Mekim Olsem?
“Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.”—JEREMAIA 10:23.
LONG bipo 13 lain long Not Amerika i bruk long kantri Inglan na ol i kisim independens na ol i wokim bikpela pepa ol i kolim Deklaresen Bilong Independens. Ol i laik i stap fri na bihainim wok politik na wok mani samting bilong ol yet. Tru, sampela taim dispela kain pasin bilong i stap fri i save helpim ol man. Long nau long hap bilong Isten Yurop sampela kantri i kisim independens, tasol planti bikpela hevi i kamap long ol dispela hap.
2 I gat wanpela kain independens nogut, em olsem: Sapos yumi bruk long Bikpela Man i bin wokim yumi, em God Jehova, dispela kain independens em i no gutpela, long wanem, God i no bin wokim yumi na bai yumi inap stiaim wokabaut bilong yumi yet, nogat. I olsem tok bilong Jeremaia antap hia i tok. Ol man i mas i stap aninit long God. Yumi mas daun long em na bihainim olgeta tok bilong em.
3 Dispela samting i kamap ples klia taim Jehova i bin givim lo long namba wan man na meri olsem: “Yu ken kaikai pikinini bilong olgeta diwai bilong dispela gaden. Tasol yu no ken kaikai pikinini bilong dispela diwai bilong givim gutpela save long wanem samting i gutpela na wanem samting i nogut. Sapos yu kaikai, wantu bai yu dai.” Tasol Adam i no laik harim tok na daun long God. Em i bikhet long God, na dispela samting i as bilong sin na pen na dai i bin kamap long em na meri bilong em, wantaim olgeta tumbuna pikinini bilong tupela.—Stat 2:16, 17; 3:19; Rom 5:12.
4 Ol man i no laik daun long God ol i mekim pasin kranki na pasin i no stret. Ol man bilong graun i save strong long bihainim tingting bilong ol yet, olsem na pasin nogut i pulap long graun, olsem pait na pasin raskol na pasin sem, na ol sik nogut bilong pamuk. Long nau planti yangpela i save mekim ol dispela kain pasin nogut, na as bilong en, em ol yangpela i no save harim tok bilong Jehova o bilong papamama o bilong gavman. Dispela laik bilong ol man long bosim wokabaut bilong ol yet, em i kamap ples klia long pasin bilong planti manmeri long bilas kranki tru, na ol i save mekim ol tok nogut i gat sem.
5 Tasol Bikpela Man i bin wokim yumi em i tokaut klia olsem: “Nogut yupela i giamanim yupela yet na yupela i ting yupela inap long trikim God. Yupela bai i no inap tru. Yu planim pikinini bilong wanem kain kaikai, em dispela kain kaikai tasol bai i kamap long gaden bilong yu. Sapos wanpela man i bihainim ol laik bilong olpela bel bilong em yet, orait dispela pasin bilong olpela bel bai i kamapim kaikai nogut na em bai i bagarap olgeta.”—Galesia 6:7, 8.
6 Wanem as bilong dispela pasin bikhet? As bilong en i olsem: Man i tingim laik bilong em yet, na em i gat pasin antap. Iv i bin harim tok bilong snek na em i kaikai samting i tambu. Sapos em i gat pasin daun, em i mas larim God i bosim em. Tasol nogat. Em i laik kamap olsem God—em yet i laik makim wanem samting i gutpela na wanem samting i nogut. Na sapos em i daun long God, em i no ken laikim samting God i tambuim em long kisim.—Stat 2:16, 17.
7 Adam tupela Iv i pundaun pinis, na bihain liklik Kein tu i bihainim pasin antap, na em i laik bihainim laik bilong em yet, na dispela i kirapim em long kilim i dai brata bilong em. Na bihain moa dispela pasin i kirapim sampela ensel long lusim wok bilong ol long heven na tanim i kamap man na bai ol i ken kisim amamas long mekim maritpasin. Na Nimrot tu i bihainim pasin antap, na em i bihainim laik bilong em yet, wankain olsem planti ol bikman bilong graun i save mekim.—Stat 3:6, 7; 4:6-8; 1 Jon 3:12; Jut 6.
Bilong Wanem Yumi Mas Daun Long God Jehova
8 Yumi mas daun long God Jehova, long wanem, em i Bikpela King na Nambawan Bos bilong olgeta hap. Em i Jas bilong yumi, na Man bilong kolim ol lo yumi mas bihainim, na King bilong yumi. (Aisaia 33:22) “I no gat wanpela samting . . . inap hait long pes bilong God. Nogat tru. Olgeta samting i . . . stap ples klia tru long ai bilong God. Na God tasol bai i skelim olgeta pasin yumi mekim.”—Hibru 4:13.
9 Na God i gat olgeta strong, na i no inap man i winim em. Ol man i givim baksait long em na ol i no laik daun long em ol bai kisim bagarap, olsem king bilong Isip i bin kisim bagarap, na bihain bagarap bai painim Satan tu.—Song 136:1, 11-15; KTH 11:17; 20:10, 14.
10 Na God i wokim yumi na bai yumi mas mekim wok bilong em, olsem na yumi olgeta manmeri i mas daun long em. Baibel i tok: “Bikpela, yu God bilong mipela. Yu tasol yu stap antap tru na inap tru long olgeta man i ken amamas long yu na litimapim nem bilong yu na i stap aninit long strong bilong yu. Long wanem, yu bin wokim olgeta samting. Long laik bilong yu yet yu bin mekim olgeta samting i kamap.” (KTH 4:11) God em i Bikpela Man bilong wokim yumi, na em i bin kamapim ol man bambai ol i mas mekim laik bilong em.—Aisaia 29:16; 64:8.
11 Na God i gat olgeta save, na em i save wanem samting i gutpela bilong yumi i mas bihainim. (Rom 11:33) Ol lo bilong em i bilong helpim yumi na bai yumi “i ken stap gut.” (Lo 10:12, 13) Na God i save laikim yumi tru, na em i laik mekim ol samting bilong helpim yumi. Tru tumas, i gat planti as na yumi mas daun long God Jehova!—1 Jon 4:8.
Jesus i Makim Gutpela Pasin Bilong Daun Long God
12 Jehova i gat wanpela Pikinini tasol, em Krais Jisas, na em i stap olsem nambawan piksa tru bilong bihainim tok bilong Jehova na daun long em. Pol i tok, Jisas “i kamap olsem wokboi nating. . . . Na em i daunim em yet na i bihainim tok bilong God, i go inap long em i dai.” (Filipai 2:6-8) Planti taim Jisas i bin tok, em i no mekim wanpela samting long tingting bilong em yet, nogat; em i wetim Papa bilong em i givim tok long em, na em i bihainim dispela tok tasol.
13 Jisas yet i tok: “Pikinini em i no inap mekim wanpela samting long tingting bilong em yet. Nogat. Em i mekim tasol ol samting em i lukim Papa i mekim.” Na em i tok: “Mi save bihainim tok mi kisim long Papa . . . mi no save bihainim laik bilong mi yet. Nogat. Mi bihainim laik bilong Papa.” (Jon 5:19, 30) Na taim ol i laik kilim em i dai, em i beten long Jehova olsem: “Yu no ken bihainim laik bilong mi. Nogat. Yu mas bihainim laik bilong yu tasol.”—Matyu 26:39, 42, 44; lukim tu Jon 7:28; 8:28, 42.
Ol Man i Bin Daun Long God
14 Long 3-pela rot Noa i mekim pasin daun. Namba wan, em i bihainim pasin i stret, maski ol man nabaut i no mekim olsem, na em i bihainim tok bilong God. (Stat 6:9) Namba 2, em God i tok na Noa i wokim wanpela bikpela bot. “Noa i mekim olgeta samting olsem God i tokim em.” (Stat 6:22) Namba 3, em Noa i toksave long ol man long Tait Wara bai kamap, olsem na “Noa em i man bilong tokaut long stretpela pasin.”—2 Pita 2:5.
15 Abraham tu em i man bilong bihainim tok bilong God na daun long em. God i bin tokim em: “Yu go long wanpela graun bai mi soim yu long en.” Orait, em i mekim olsem. (Stat 12:1) Em i lusim gutpela sindaun bilong em long ples Ur na em i wokabaut inap wan handet yia olsem tripman long graun bilong ol narapela lain. Na bikpela samting em i mekim, em i bihainim tok bilong God long wokim ofa long Aisak, em pikinini bilong em.—Stat 22:1-12.
16 Na meri bilong em tu i daun long God. Sara i orait long bihainim Abraham na i go long ol hap em i no save long en. Na em i no toktok planti, maski i gat planti hevi long rot. Tupela taim Abraham i bin tokim ol bikman bilong ples olsem Sara em susa bilong em, na Sara i orait long dispela tok, maski dispela i givim rot long ol dispela man na bai ol inap kisim em olsem nambatu meri bilong ol. Na Baibel i tok, Sara “i stap aninit long man bilong” em, na em “i bin bihainim tok bilong Abraham na kolim em ‘bikman.’ ”—Stat 12:11-20; 18:12; 20:2-18; 1 Pita 3:6.
17 Na yumi ken tingim Aisak tu, em pikinini bilong Abraham. Ol i ting Aisak i gat 25 krismas samting long taim God i tokim Abraham long mekim ofa long em, na em inap sakim lapun papa sapos em i laik, tasol nogat; em i daun na larim papa i pasim han lek bilong em long rop na bai skin i no ken guria taim naip i katim em, na nau papa i slipim em long alta.—Stat 22:7-9.
18 Sampela yia bihain moa em Moses i stap, na em i man bilong daun long God. Baibel i tok: “Dispela man Moses em i man bilong daunim em yet, na i no gat wanpela man long dispela graun i save daunim em yet inap olsem Moses.” (Namba 12:3) Em i bihainim ol tok na lo bilong Jehova inap 40 yia, maski em i mas bosim sampela milion manmeri em ol i mekim pasin bikhet; olsem na yumi save em i man bilong pasin daun. Baibel i tok, taim Jehova i givim tok long Moses, em “i harim dispela tok na em i mekim olgeta samting olsem [Jehova] i bin tokim em.”—Kisim Bek 40:16.
19 Jop tu em i makim gutpela pasin bilong bihainim tok na stap aninit long God. Jehova i bin larim Satan i bagarapim sindaun bilong Jop na pinisim olgeta samting bilong em, na kilim i dai ol pikinini bilong em, na “mekim ol strongpela sua i kamap long olgeta hap bilong bodi bilong Jop. . . . Na meri bilong en i go lukim em na i tok, ‘Olsem wanem na yu bihainim God yet? Mobeta yu lusim em na tok nogut long em na yu ken i dai.’ Tasol Jop i bekim tok olsem, ‘Tok bilong yu i olsem tok bilong kranki meri tru. Sapos yumi save kisim ol gutpela samting God i givim long yumi, orait bilong wanem yumi no inap kisim tu ol hevi em i mekim i kamap long yumi?’ ” (Jop 2:7-10) Na Jop i tok: “Sapos God i kilim mi i dai, orait em i laik bilong em. Tasol [mi mas wetim em i marimari long mi].” (Jop 13:15, lukim sta daunbilo.) Tru, Jop i strong long kamapim stretpela pasin bilong em, tasol yumi save Jehova i orait long Jop, long wanem, taim tripela man i bin giaman long mekim pasin sori long Jop, Jehova i tokim wanpela olsem: “Mi kros long yu na long tupela pren bilong yu wantaim. Long wanem, yupela i no bin autim tok tru long pasin bilong mi olsem wokman bilong mi, Jop, i bin autim.” Tru tumas, Jop i bihainim pasin daun na i stap aninit long Jehova, na em i makim gutpela pasin yumi tu i mas bihainim.—Jop 42:7.
20 Na Devit tu em i man bilong daun long God. Wanpela taim King Sol i raunim Devit bilong kilim em i dai, na tupela taim rot i op long Devit long bekim nogut long Sol na kilim Sol i dai. Tasol Devit i no mekim olsem, long wanem, em i daun long God. Em i tok: “Bikpela i no ken larim mi i bagarapim king bilong mi, long wanem, Bikpela yet i bin makim em na putim em i stap king. Mi no ken mekim wanpela pasin nogut long dispela king Bikpela i bin makim.” (1 Samuel 24:6; lukim tu 1 Samuel 26:9-11.) Na sampela taim Devit i bin mekim rong, na Jehova i givim strongpela tok long em bilong stretim em, na Devit i no bikhet long dispela tok; em i daun long God na em i harim na bihainim.—2 Samuel 12:13; 24:17; 1 Stori 15:13.
Pol Tu i Daun Long God
21 Baibel i kamapim klia olsem aposel Pol tu em i man bilong daun long God. Em i bihainim pasin bilong Bikpela bilong em, em Krais Jisas, long dispela samting na long olgeta narapela samting em i mekim long wok bilong God. (1 Korin 11:1) God Jehova i makim Pol long mekim bikpela wok tru, winim ol narapela aposel. Tasol Pol i no bin hambak long dispela; em i no mekim wanpela samting long tingting bilong em yet. Luk i tok, taim ol brata i laik save, ol man bilong narapela lain i mas katim skin o nogat, “ol Kristen [bilong Antiok] i makim Pol na Barnabas . . . bilong i go long Jerusalem na stretim tok wantaim ol aposel na ol hetman bilong [kongrigesen].”—Aposel 15:2.
22 Na taim Pol i raun mekim wok misineri, em i daun long ol narapela brata. Em i tok: “Ol manmeri i lukim Jems na Pita na Jon olsem ol bikman bilong [kongrigesen], na taim ol dispela man i save pinis olsem, God i bin marimari long mi na givim dispela wok long mi, orait ol i sekan long mi . . . na mipela olgeta i wanbel na pasim tok.” Pol i no laik mekim ol wok long tingting bilong em yet. Em i toktok gut wantaim ol narapela na larim ol tu i kamapim tingting bilong ol.—Galesia 2:9.
23 Taim Pol i mekim laspela raun bilong em long Jerusalem, ol elda long Jerusalem i tokim Pol, taim em i go long haus lotu em i mas bihainim Lo bilong Moses na bai ol man i no ken ting em i bikhet long dispela Lo. Pol i bihainim dispela tok bilong ol elda, na em i mekim ol samting olsem ol i bin tok, na olsem Lo i makim tu, na nau ol man i kirap kros long em na i laik paitim em. Orait, yu ting em i popaia o em i mekim pasin kranki taim em i bihainim tok bilong ol elda? Nogat. Long wanem, “long nait Bikpela i sanap klostu long Pol na i tokim em olsem, ‘Yu mas sanap strong, na yu no ken pret. Yu bin autim strong tok bilong mi long Jerusalem, na long wankain pasin yu mas autim tok bilong mi long Rom.’ ”—Aposel 23:11.
24 Tru tumas, Baibel i kamapim planti as na yumi mas daun long God na i stap aninit long em, na Baibel i gat planti stori long ol man i bin daun long God na ol i stap olsem gutpela piksa em yumi ken bihainim. Long tok i kamap bihain bai yumi toktok long olsem wanem yumi yet i ken daun long God Jehova, na long ol samting bilong helpim yumi long mekim olsem, na long gutpela samting bai painim yumi sapos yumi mekim.
Yu Ting Olsem Wanem?
◻ Wanem kain independens em i no gutpela?
◻ Wanem as bilong pasin bikhet?
◻ Wanem sampela as na yumi mas daun long Jehova?
◻ Husat sampela man ol i bin daun long God na ol i makim gutpela pasin yumi mas bihainim?
[Askim Bilong Stadi]
1. Wanem kain independens em planti man i save laikim?
2, 3. (a) Wanem kain independens em i nogut? (b) Wanem samting i bin kamap long bipo na yumi ken save, dispela samting em i nogut?
4, 5. (a) Wanem samting i bin kamap taim ol man i no laik daun long God? (b) Wanem lo yumi no inap abrusim?
6, 7. Wanem as bilong pasin bikhet? Wanem ol samting i bin kamap na yumi save long dispela samting?
8-11. Wanem 4-pela as na yumi mas daun long God?
12, 13. (a) Jisas i mekim wanem na em i kamapim klia olsem em i daun long God? (b) Jisas yet i tok wanem na yumi save em i daun long God?
14. Noa i bin mekim wanem na yumi save em i daun long God?
15, 16. (a) Abraham i mekim wanem na em i stap olsem gutpela piksa long pasin bilong daun long God? (b) Sara tu i bihainim wanem pasin daun?
17. Olsem wanem yumi ken tok, Aisak i bin daun long God?
18. Wanem sampela stori bilong Moses na yumi save em i man bilong harim tok na daun long God?
19. Wanem ol tok Jop i bin mekim na i makim olsem em i daun long God?
20. Olsem wanem Devit i kamapim klia olsem em i daun long God?
21-23. Olsem wanem yumi save Pol i bin daun long God?
24. Long tok i kamap bihain bai yumi toktok long wanem ol samting?
[Piksa long pes 10]
Bihain long Tait Wara, Nimrot em i namba wan bikman bilong bikhet long God
[Piksa long pes 13]
Noa em i man bilong i stap aninit long God.—Stat 6:14, 22