Ol Yangpela i Laik Save . . .
Hau Bai Mi Bosim Bel na Tingting Bilong Mi?
“Mi save kros long papamama na mekim ol tok mi no min long mekim. Bai mi stap longwe long ol inap kros bilong mi i pinis.”—Kate, 13 krismas.
“Mi hatwok tru long daunim tingting olsem mi no inap mekim gut ol wok samting. Sampela taim bel bilong mi i bagarap tru.”—Ivan, 19 krismas.
OL KAIN kain filings bilong yumi ol man i gat bikpela strong. Ol i stiaim tingting na pasin yumi mekim. Ol inap kirapim yumi long mekim gutpela pasin o pasin nogut. Ating sampela taim ol i winim yumi tru. Jacob, i gat 20 krismas, em i tok: “Mi no save amamas long mi yet. Planti taim mi no winim mak mi laik winim. Sampela taim mi krai, o mi belhat na kros nating long ol man i stap klostu long mi. Mi hatwok long bosim gut mi yet.”
Tasol bilong kamap man o meri i bikpela pinis long tingting, man i mas lain long bosim gut bel na tingting. Sampela saveman i ting dispela pasin na pasin bilong wok gut wantaim ol arapela i winim bikpela save. Long Baibel pasin bilong bosim gut bel em i bikpela samting. Olsem: Sindaun 25:28 i tok: “Sapos yu no inap kontrolim belhat bilong yu, yu olsem wanpela taun i no gat banis, na ol birua inap go insait na bagarapim.” (Today’s English Version) Bilong wanem i hatwok long bosim gut bel na tingting?
Ol Yangpela i Gat Hatwok
Planti manmeri em ol i gat kain kain krismas na sindaun ol i pilim olsem i hatwok long bosim gut bel na tingting. Tasol em inap hatwok moa long mekim taim skin i wok long senis bilong kamap man o meri i bikpela pinis. Buk Changing Bodies, Changing Lives bilong Ruth Bell i tok: “Ol samting ol yangpela i pilim inap longlong nabaut, sampela taim ol i pilim fani, o amamas, o pret. Planti manmeri i gat kain kain filings i kamap long wankain taim na long wankain samting. . . . Ating sampela filings i kamap pastaim na i no longtaim na ol i senis olgeta.”
Yu yangpela, olsem na save bilong yu i sot liklik. (Sindaun 1:4) Taim nupela samting i painim yu o em i namba wan taim yu mekim wanpela wok, i stret bel bilong yu i no stap isi na yu tingting planti. Tasol Man Bilong Wokim yumi i kliagut long filings bilong yu. Em i save tu long “olgeta tingting i stap long bel bilong [yu].” (Song 139:23) Long Baibel em i kamapim ol stiatok em ol inap helpim yu.
Rot Long Bosim Gut Bel na Tingting
Wanpela rot bilong bosim gut filings em long lain long bosim gut tingting bilong yu. Sapos yu tingting long ol samting i mekim yu bel hevi, dispela inap tekewe strong bilong yu long mekim wok. (Sindaun 24:10) Tasol olsem wanem yu inap lain long tingting long ol gutpela samting na dispela i helpim yu long bosim gut bel na tingting bilong yu?
Wanpela samting em yu no ken tingting long ol samting i mekim yu bel hevi o i mekim bel i no stap isi. Taim yu bihainim tok bilong Baibel na putim tingting i go long “ol pasin i gutpela long ol man i mekim” na “stretpela pasin,” bai yu no tingting long ol samting i daunim yu, bai yu tingting long ol samting i gutpela. (Filipai 4:8) I no isi long mekim, tasol sapos yu wok strong yu inap tru long mekim.
Tingim yangpela meri nem bilong em Jasmine, em i tok: “Mi tingting planti tru. Mi gat nupela wok skin, na sampela wok mi mas mekim i nupela long mi. Mi laik givap stret. Mi hatwok long malolo na stap isi.” Yumi no kirap nogut long yangpela i pilim olsem sampela taim, dispela tingting inap mekim na em i no bilip long em yet. Baibel i tokim yumi long yangpela man Timoti, em inap tru long mekim wok ol i givim long em. Tasol i luk olsem em i bin hatwok long daunim filings olsem em i no inap mekim gut wok.—1 Timoti 4:11-16; 2 Timoti 1:6, 7.
Ating yu no stap bel isi taim yu gat wanpela wok long mekim em yu no bin mekim long bipo. Ating yu gat tingting olsem, ‘Mi no inap tru long mekim dispela samting.’ Tasol yu inap kontrolim kain tingting olsem sapos yu sakim ol tingting i save daunim yu. Lain long mekim gut dispela wok. Mekim ol askim, na bihainim ol tok bilong skulim yu.—Sindaun 1:5, 7.
Taim yu lain gut long mekim wanpela wok, bel bilong yu bai stap isi. No ken tingting tasol long ol samting yu no save mekim gut, dispela bai mekim yu pret long traim mekim wok bilong yu i kamap gutpela moa. Taim sampela man i bin sutim tok long Pol, em i tok: “Maski sapos mi no save tumas long pasin bilong autim tok, save bilong mi i no sot liklik.” (2 Korin 10:10; 11:6) Olsem tasol bilong strongim pasin bilong bilip long yu yet yu mas save olsem i gat ol samting yu save mekim gut na yu mas askim God long helpim yu long ol samting yu no strong long mekim. God inap tru long helpim yu, olsem em i bin helpim ol manmeri bilong bipo.—Kisim Bek 4:10.
Narapela samting bilong helpim yu long bosim gut bel na tingting em long putim mak bilong winim i stret long yu, na tu, yu mas save olsem i gat sampela samting yu no inap mekim. No ken skelim yu yet wantaim ol narapela. Long Galesia 6:4 Baibel i mekim gutpela tok bilong stiaim yumi, em i tok: “Olgeta man i mas skelim wok bilong ol yet, em i gutpela o nogat. Man i mekim olsem, em i ken amamas long pasin em yet i mekim na em i no ken skelim pasin bilong en wantaim pasin bilong narapela man.”
Bilong Daunim Belhat
Bosim belhat em i narapela samting em inap hatwok long mekim. Olsem Kate, em pastaim yumi stori long em, belhat i save kirapim planti yangpela long mekim sampela toktok o pasin i save kamapim hevi.
Tru, em nomol long pilim belhat sampela taim. Tasol tingim Kein, em namba wan man i kilim i dai narapela. Taim em i “kros nogut tru,” God i givim tok lukaut long em olsem belhat bilong em inap kirapim em long mekim bikpela sin. Em i tokim Kein: “Sin i gat bikpela laik tru bilong winim yu. Tasol yu mas strong na winim em.” (Stat 4:5-7) Kein i no tingim tok lukaut bilong God, tasol long rot bilong helpim yu kisim long God, yu inap tru long kontrolim belhat bilong yu na abrusim sin!
Bikpela samting em long kontrolim tingting bilong yu. Long Sindaun 19:11, Baibel i tok: “Man i gat gutpela tingting, em i no inap kros kwik. Nambawan pasin bilong en i olsem. Em i no save tingim rong narapela man i mekim long em.” Taim wanpela i bagarapim bel bilong yu, traim long kliagut long i gat wanem as na em i mekim olsem. Em i min long bagarapim bel bilong yu? Em i no tingting gut o paul long sampela samting na mekim? Pasin bilong marimari long ol man i popaia i kamapim pasin marimari bilong God yet, na tu, em i rot bilong daunim belhat bilong yu.
Tasol sapos i stret na yu belhat, orait bai yu mekim wanem? Baibel i tok: “Yupela i no ken mekim sin taim yupela i kros.” (Efesus 4:26, King Jems Nupela Testamen) Tru, yu ken toktok long dispela samting long man i mekim yu i kros. (Matyu 5:23, 24) Tasol ating nambawan gutpela samting long mekim em long lusim tingting long dispela samting—lusim belhat na putim tingting bilong yu i go long ol samting yu save mekim.
Ol pren bilong yu inap mekim bikpela samting long pasin yu save mekim taim yu belhat. Olsem na Baibel i tok: “Yu no ken pren long ol man bilong kros kwik na bilong pairap nabaut. Nogut yu kisim pasin bilong ol na bihain ol samting nogut i bagarapim yu.”—Sindaun 22:24, 25.
Sapos yu poromanim ol man husat i wok strong long kontrolim belhat bilong ol, dispela inap helpim yu long kisim pasin bilong bosim gut bel. Ol kongrigesen Kristen bilong Jehova i pulap long ol man na meri i gat kain pasin olsem, planti ol i bikpela long yu na ol i gat bikpela save. Kisim save long sampela bilong ol. Skelim gut pasin bilong ol long karim ol hevi. Ating ol inap givim gutpela tingting long yu taim yu gat ol hevi. (Sindaun 24:6) Jacob, yumi harim pinis sampela tok bilong em, em i tok: “Wanpela pren husat i strong long ol samting bilong spirit na i helpim mi long tingim Tok Bilong God, em i gutpela pren tru. Taim mi tingim olsem Jehova i laikim mi tru maski mi yet mi no pilim gutpela inap long mekim planti samting, dispela i helpim mi long bosim gut bel na tingting bilong mi na stap isi.”
Ol Arapela Gutpela Helpim
Wanpela gutpela buk bilong eksasais i tok: “I gat planti ripot i tokaut olsem wei yu muvim bodi bilong yu i mekim bikpela samting long filings bilong yu. Mak bilong marasin homon na win oksijen long skin i save senis taim yu muv nabaut.” Tru tumas, eksasais em i gutpela samting. Baibel i tok: “Sapos yumi laik mekim bodi bilong yumi i kamap strong, na yumi save trening oltaim, dispela bai i helpim yumi.” (1 Timoti 4:8) I gutpela long bihainim wanpela sediul bilong mekim sampela eksasais. Em inap mekim bikpela samting long bel na tingting bilong yu. Na pasin bilong kisim gutpela kaikai inap helpim yu tu.
Tingim tu ol musik yu laikim na ol amamas bilong skin yu save mekim. Ripot long The Harvard Mental Health Letter i tok: “Pasin bilong lukim ol pait na bagarapim man . . . i save kirapim laik bilong kros na pait. . . . Taim ol man i lukim ol vidio bilong pait na bagarapim man, tingting bilong kros i kamap strong moa na mak bilong blut i go antap.” So yusim savetingting taim yu makim ol samting yu laik lukim na harim.—Song 1:1-3; 1 Korin 15:33.
Nambawan gutpela rot long lain long bosim gut bel na tingting em long pas gut tru wantaim Man Bilong Wokim yu. Em i singautim yumi olgeta wan wan long prea long em na kamapim tru bel na tingting bilong yumi. Aposel Pol i tok: ‘No ken wari long wanpela samting. Prea long God na tok tenkyu long em, na askim em long helpim yupela. God bai i mekim yupela i stap bel isi tru, na bel na tingting bilong yupela bai i stap gut tru.’ Yes, yu inap tru long kisim strongpela bel na winim hevi bilong olgeta samting i kamap long laip bilong yu. Aposel Pol i tok moa: “Em i givim pawa long mi, na long dispela as mi gat strong long mekim olgeta samting.”—Filipai 4:6, 7, 13; NW.
Yangpela Malika i tok: “Mi save prea klostu klostu. Mi save olsem Jehova i tingim mi na dispela i helpim mi long stap isi na bosim bel na tingting bilong mi.” God i ken helpim yu na yu tu inap lain long bosim gut bel na tingting bilong yu.
[Rait long pes 30]
Wanpela rot bilong bosim gut filings em long lain long bosim gut tingting bilong yu
[Piksa long pes 31]
Long rot bilong poromanim ol man i bikpela long yu, yu inap lain long bosim gut bel na tingting bilong yu