No Ken Larim Belhat i Pundaunim Yu
“STAP isi!” “Tingting gut pastaim!” “Pasim maus!” Ating yu save mekim kain tok olsem taim bel bilong yu i no stap isi. Sampela man, taim ol i laik abrusim pasin bilong belhat, ol i save kirap na wokabaut ausait. Em nau, em sampela samting yu ken mekim bilong daunim belhat bilong yu na stap wanbel wantaim ol narapela.
Tasol inap sampela yia pinis, ol narapela narapela tok ol saveman i bin kamapim olsem man i mas daunim belhat bilong em o nogat, dispela i mekim na planti man i tingting planti. Olsem: Sampela saveman bilong skelim tingting bilong man ol i bin tok, kamapim belhat bilong yu ‘sapos yu ting dispela bai mekim gut bel bilong yu.’ Tasol sampela i tokaut olsem sapos oltaim yu save belhat kwik, ‘dispela inap mekim na yu bai dai taim yu no lapun yet. Dispela pasin bilong belhat kwik inap bagarapim yu, winim ol narapela samting olsem pasin bilong smok, mak bilong blut i antap tumas, na gris kolestrol nogut i kamap planti.’ Tok Bilong God i tokaut klia: “Yu no ken kros, na yu mas lusim pasin bilong belhat. Yu no ken wari long ol samting na kirap nogut. Dispela pasin em inap pulim yu long mekim pasin nogut.” (Song 37:8) Bilong wanem Baibel i mekim kain tok olsem?
Sapos yu no bosim gut bel, bel bai kirapim yu long mekim sampela samting nogut. Dispela samting i bin kamap ples klia long pastaim tru. Baibel i tok: “Kein i kros nogut tru, na pes bilong em i senis olgeta.” Dispela i kirapim em long mekim wanem? Em i kros nogut tru na em i no daunim, olsem na bel bilong em i go strong tru na em i no bihainim tok bilong Jehova na kirap mekim gutpela pasin. Em i no lusim pasin bilong belhat na em i mekim wanpela bikpela rong—em i kilim i dai brata bilong em.—Stat 4:3-8.
Kain samting olsem i bin painim Sol, em namba wan king bilong Israel, taim em i harim ol meri i litimapim nem bilong Devit. “Ol [meri] i mekim song olsem, ‘Sol i kilim planti tausen man. Na Devit i kilim planti planti tausen.’ Sol i harim dispela song na em i no laikim tru. Na em i belhat.” Belhat i bosim tingting bilong Sol na dispela i kirapim em long traim long kilim i dai Devit. Maski Devit i wok long stap pren bilong Sol, Sol i no laik tru long kamap wanbel gen wantaim Devit. Bihain, Jehova i no orait moa long Sol.—1 Samuel 18:6-11; 19:9, 10; 24:1-21; Sindaun 6:34, 35.
Taim man i no bosim skin na daunim belhat, em i save mekim sampela tok o mekim sampela samting em inap nogutim ol narapela. (Sindaun 29:22) Kein na Sol i kros nogut tru, long wanem, ol i mangal na bel kaskas. Tasol i gat kain kain samting inap mekim na man i belhat. Sapos man i sutim bel bilong narapela na i no gat as na em i mekim olsem, o em i daunim em, o tingting kranki long em, o mekim pasin i no stret long em, ol dispela samting inap kirapim man long kros kwik.
I gat wanpela bikpela samting Kein tupela Sol i sot long en. Taim Kein i mekim ofa, em i no mekim long rot bilong bilip. (Hibru 11:4) Sol i no bihainim tok bilong Jehova na bihain em i strong long ting olsem em i no bin mekim rong, na dispela i mekim na God i no laikim em moa na em i tekewe spirit bilong em long Sol. Tru tumas, pasin bilong tupela i mekim na nau ol i no pas gut moa wantaim Jehova.
Tasol pasin Devit i mekim em i narapela kain. I gat as na em i ken kros long samting Sol i mekim long en. Tasol Devit i bosim gut bel. Bilong wanem em i mekim olsem? Em i tok: “Bikpela i no ken larim mi i bagarapim king bilong mi, long wanem, Bikpela yet i bin makim em na putim em i stap king.” Devit i laik stap gut wantaim Jehova, na dispela i stiaim em long ol samting em i mekim long Sol. Long pasin daun em i larim ol samting i stap long han bilong Jehova.—1 Samuel 24:6, 15.
Tru tumas, pasin bilong belhat kwik inap kamapim samting nogut. Aposel Pol i tok: “Sapos bel bilong yupela i hat, orait yupela lukaut. Nogut yupela i mekim sin.” (Efesus 4:26) Sampela taim man i mas kamapim kros bilong em, tasol yumi mas was gut; nogut pasin bilong belhat i pundaunim yumi. Olsem na yumi mas bosim gut bel na daunim belhat. Yumi ken mekim olsem wanem?
Wanpela bikpela samting tru, em yu mas kisim pasin bilong pas gut wantaim Jehova. Em i laik bai yu tokim em long ol samting i stap long bel na tingting bilong yu. Tokim em long ol samting yu save tingting planti long en, na askim em long mekim isi bel bilong yu na bai yu inap daunim kros. (Sindaun 14:30) Yu ken bilip olsem “Bikpela i save lukautim ol stretpela manmeri, na em i save putim yau long ol beten bilong ol.”—1 Pita 3:12.
Beten inap stretim stretim pasin bilong yu na stiaim yu. Olsem wanem em inap mekim olsem? Beten inap stiaim yu long ol pasin yu mekim long ol narapela. Tingim ol samting Jehova i bin mekim long yu yet. Baibel i tok: “Yumi inap kisim pe nogut bilong sin bilong yumi, tasol [Jehova] i no save givim dispela pe nogut long yumi.” (Song 103:10) Pasin bilong lusim rong bilong narapela em i bikpela samting bambai ‘Satan i no ken giamanim yu na i winim yu.’ (2 Korin 2:10, 11) Na tu, long rot bilong beten, spirit holi inap stiaim bel bilong yu na rausim ol strongpela pasin. Jehova i amamas long ‘givim bel isi long yu, em yumi man i no inap tru long save long as bilong en,’ na dispela bel isi inap helpim yu long lusim strong bilong kros.—Filipai 4:7.
Tru yu mas beten, tasol narapela samting tu, em oltaim yu mas skelim ol tok bilong Baibel bambai yu inap “save gut long laik bilong Bikpela.” (Efesus 5:17; Jems 3:17) Sapos yu yet yu hatwok long bosim skin na daunim belhat, orait wok long kisim tingting bilong Jehova long dispela samting. Lukim ol ves bilong Baibel i stori stret long pasin bilong daunim belhat.
Aposel Pol i kamapim dispela bikpela tok bilong givim tingting long yumi: “Yumi [mas] mekim gutpela pasin long ol arapela . . . Na yumi mas strong tru long mekim gutpela pasin long ol arapela manmeri i bilip long Bikpela.” (Galesia 6:10) Tingting long mekim ol samting bilong helpim ol narapela. Kain gutpela wok olsem bai kirapim yu long pilim tru ol hevi bilong narapela na bilip long em na daunim ol tingting kranki i kamap namel long yutupela em inap mekim na yu belhat kwik.
Man bilong raitim Song i tok: “Yu mas was long mi bai mi no ken pundaun long sin, olsem bipo yu promis long mekim. Yu no ken larim pasin nogut i winim mi. Ol manmeri i laikim tumas lo bilong yu, ol i stap gut tru, na i no gat wanpela samting inap mekim ol i pundaun.” (Song 119:133, 165) Dispela tok inap makim yu tu.
[Blok/Piksa long pes 9]
ROT BILONG DAUNIM BELHAT
□ Beten long Jehova.—Song 145:18.
□ Skelim sampela tok bilong Baibel long olgeta de.—Song 119:133, 165.
□ Wok strong long mekim ol gutpela wok.—Galesia 6:9, 10.