Baibel i Tok Wanem?

Bilong Wanem Yu Mas Bosim Belhat Bilong Yu?

TAIM tupela i marit nupela yet hevi i kamap namel long tupela. Long nupela meri bilong em, Ginger,a John i bikmaus olsem: “Nau mi bos, olsem na yu no ken semim mi na kam bihaintaim.” Winim 45 minit em i bikmaus long Ginger na em i no larim em i lusim sia. Long marit bilong tupela, pasin bilong toknogutim narapela i bin kamap olgeta taim. Sori tru, pasin belhat bilong John i go bikpela moa. Em i pasim strong ol dua, paitim strong tebol, na taim em i draivim ka em i paitim paitim stia bilong ka na draiv olsem welman; ol narapela inap kisim bagarap long pasin bilong em long draiv.

Sori tru, ating yu save pinis, kain samting olsem i save kamap planti taim. Olsem wanem? Belhat bilong dispela man i stret o em i no inap bosim belhat bilong em? Olgeta taim belhat i no stret? Olsem wanem yumi ken save man i no bosim belhat bilong em o belhat bilong em i winim mak bilong en?

I no olgeta taim i gat rong long belhat; sampela taim ating i stret. Olsem: God i bin kamapim belhat bilong em long tupela taun bilong bipo, em Sodom na Gomora. (Stat 19:24) Bilong wanem em i belhat? Long wanem, ol manmeri long dispela tupela taun, ol i bin mekim pasin sem i nogut olgeta, na ol man i save long en. Olsem: Taim ol ensel i kam bilong lukim gutpela man Lot, wanpela lain man​—⁠ol yangpela wantaim ol lapun​—⁠ol i laik reipim ol ensel i stap wantaim Lot. I stret God Jehova i belhat long pasin sem bilong ol.​—⁠Stat 18:20; 19:​4, 5, 9.

Olsem Papa bilong em i bin mekim, Krais Jisas, em man i nambawan olgeta, em tu i bin kamapim belhat bilong em. Haus lotu long Jerusalem i olsem ples tru lain bilong God i ken lotu long en. Dispela haus lotu i gat wok olsem “haus bilong beten” ol man i ken go long en na wokim ofa bilong ol yet, na mekim ofa long God, na skul long ol pasin bilong God, na askim God long lusim sin bilong ol. Long dispela haus lotu i olsem ol inap toktok wantaim Jehova. Tasol ol hetman bilong lotu long taim bilong Jisas ol i mekim dispela haus lotu i kamap olsem “haus bilong maket” na “ples hait bilong ol stilman.” (Matyu 21:​12, 13; Jon 2:​14-17) Ol hetman yet i bin kisim winmani long ol animal sampela man i bin maketim bilong ol man i ken wokim ofa long en. Ol dispela man i giamanim ol man na singaut long bikpela pe tru. Olsem na Pikinini bilong God i mekim pasin i stret taim em i rausim ol dispela stilman long haus bilong Papa bilong em. Belhat bilong Jisas i gat as!

Taim Ol Man i Belhat

Sampela taim belhat bilong ol man, em tu i gat as. Tingim samting i bin painim Moses. I no longtaim na long rot bilong mirakel God i bin kisim bek lain Israel long Isip. Jehova i bin kamapim tenpela bikpela hevi bilong bagarapim ol Isip na dispela i kamapim long ples klia strong bilong Jehova long daunim ol god giaman bilong Isip. Na em i bin brukim solwara Retsi inap long ol Israel i gat rot long ranawe. Bihain Moses i bringim ol i go long as bilong maunten Sainai, na long dispela hap ol i kamap olsem wanpela lain stret. Moses i stap olsem namelman, olsem na em i go antap long maunten bilong kisim ol lo bilong God. Jehova i givim planti lo long Moses, na em i givim Tenpela Lo long em tu, em ‘pinga bilong God’ yet i bin raitim long tupela hap ston em i bin katim long maunten. Tasol taim Moses i kam daun long maunten, em i lukim wanem samting? Ol manmeri i wok long lotuim wanpela bulmakau gol! Kwiktaim tru ol i bin lusim tingting long Jehova! Sampela wik tasol i lus na ol i mekim sin long God. I stret “Moses i belhat nogut tru.” Em i tromoi tupela ston na ol i bruk nabaut, na em i kirap na bagarapim bulmakau gol.​—⁠Kisim Bek 31:18; 32:​16, 19, 20.

Narapela taim, Moses i no bosim belhat bilong em taim ol manmeri i toktok planti long ol i sot long wara. Moses i gat nem olsem man i stap isi, tasol inap liklik taim em i no bosim belhat bilong em. Bikpela rong i kamap long dispela. Em i no litimapim nem bilong Jehova olsem Man bilong lukautim ol Israel, nogat; Moses i mekim hatpela tok long ol Israel na em i litimapim nem bilong em yet na brata bilong em Aron. Olsem na God i ting i stret em i givim strafe long Moses. Em i no inap i go insait long graun bilong promis. Bihain long dispela samting i bin kamap long Meriba, i no gat wanpela tok long Baibel i tok olsem Moses i belhat gen. I olsem em i lain pinis.​—⁠Namba 20:​1-12; Lo 34:4; Song 106:​32, 33.

Olsem na pasin bilong God na pasin bilong man i narapela narapela kain. Jehova inap ‘daunim belhat bilong em’ na i stret Baibel i tok, em i “no save belhat kwik,” long wanem, pasin sori i nambawan pasin bilong em, belhat nogat. Olgeta taim belhat bilong em i stret na em i save bosim. (Kisim Bek 34:6; Aisaia 48:9; 1 Jon 4:⁠8) Krais Jisas, man i nambawan olgeta, em i bin bosim belhat bilong em long olgeta taim. Baibel i tok em i man i save mekim “pasin isi” long ol man. (Matyu 11:29) Tasol ol man, maski ol i bilipman olsem Moses, sampela taim ol tu i bin hatwok long bosim belhat bilong ol.

Na tu, planti taim ol man i no save tingting gut long ol samting belhat bilong ol inap kamapim. Sapos man i no bosim belhat bilong em, em inap karim hevi long dispela. Olsem: Wanem samting bai kamap sapos man i belhat long meri bilong em na em i paitim banis bilong wanpela rum bilong haus na hul i kamap? Banis i bagarap. Na ating han bilong em tu i bagarap. Tasol samting i moa nogut, em samting pasin bilong em i bin mekim long meri bilong em. Olsem wanem long pasin bilong meri long laikim em na daun long em nau? Ating insait long sampela de tasol man i stretim banis, na ating han bilong em i orait gen inap sampela wik bihain; tasol hamas de o wik o mun i mas pinis pastaim na meri bilong em i ken bilip na daun long em gen?

Baibel i stori long planti man em ol i no bin bosim belhat bilong ol na ol i bin kisim hevi long dispela. Tingim sampela. Bihain long Kein i kilim i dai brata bilong em Abel, God i rausim em i go. Papa bilong Simeon na Levi i demim tupela, long wanem, ol i bin kilim i dai ol man bilong Sekem. Jehova i givim sik lepra long Usia, long wanem, Usia i kros tru long ol pris i givim tok bilong stretim em. Taim Jona i “belhat,” Jehova i stretim em. Olgeta i gat kot long belhat bilong ol.​—⁠Stat 4:​5, 8-16; 34:​25-30; 49:​5-7; 2 Stori 26:19; Jona 4:​1-11.

Ol Kristen i Gat Kot

I wankain long nau tu, ol Kristen i mas kot long pasin ol i save mekim long God, na long sampela pasin ol i save mekim long ol wanbilip. Yumi ken save long dispela samting long ol tok Grik Baibel i save kolim bilong makim belhat. Wanpela bilong tupela tok em Baibel i save mekim bikpela wok long en, em or·geʹ. Planti taim ol i tanim dispela tok olsem “belhat,” na dispela i makim olsem man i save em i belhat na em i tingting pinis long mekim olsem, na planti taim em i tingting long bekim nogut long man. Olsem na Pol i kirapim ol Kristen long Rom olsem: “Ol pren tru bilong mi, yupela yet i no ken bekim rong ol i mekim long yupela. Yupela i mas larim God i belhat [or·geʹ] long ol. Yupela i save, buk bilong God i gat tok olsem, ‘Bekim rong, em i wok bilong mi. Mi yet bai mi bekim rong bilong ol na mekim save long ol.’ ” Pol i laik kirapim ol na bai ol i no ken bel nogut long brata bilong ol​—⁠ol i mas mekim “gutpela pasin” na “daunim pasin nogut.”​—⁠Rom 12:​19, 21.

Narapela tok Grik em Baibel i save kolim planti taim em thy·mosʹ. As tok dispela tok i kamap long en i “makim strongpela win, wara i ran strong, graun i guria, ol animal o ol man i pait nabaut.” Olsem na planti taim ol i tanim dispela tok olsem ‘kamapim belhat,’ ‘belhat kwik,’ o ‘bel i kirap wantu long autim tok kros na dispela i mekim na tingting i no stap isi na i kamapim kros pait insait long famili na insait long kantri, na ol man i no stap bel isi.’ Man o meri i no inap bosim belhat bilong em, em i olsem maunten paia em inap pairap wantu tasol na tromoi hatpela sit bilong paia na ol bikpela ston na lava i go antap, na dispela inap bagarapim o kilim i dai ol man. Pol i mekim wok long dispela tok thy·mosʹ long Galesia 5:20. Em i tok, “belhat na kros” em wanpela bilong “olkain pasin” bilong olpela bel (ves 19), olsem pasin pamuk, pasin doti, dring planti na spak. Tru tumas, pasin bilong John​—⁠em pastaim yumi stori long em​—⁠i kamapim klia olsem em i man bilong “belhat na kros.”

Olsem na kongrigesen Kristen i mas tingting olsem wanem long man o meri insait long kongrigesen em planti taim em i kros pait na em i mekim pasin bilong bagarapim man o samting bilong em? Man i no bosim belhat bilong em, em i no hatwok long kirap na pait. Olsem na tok bilong Jisas i gat gutpela as: “Man i kros nogut long brata bilong en, em i mas kamap long kot.” (Matyu 5:​21, 22) Long ol man marit Baibel i tok: “Yupela i mas laikim tru ol meri bilong yupela, na yupela i no ken mekim nogut bel bilong ol.” Man i gat pasin bilong “belhat kwik” em i no inap kamap wanpela wasman insait long kongrigesen. Olsem na man o meri i no inap bosim belhat na kros bilong em, em i no gutpela piksa insait long kongrigesen. (Kolosi 3:19; Taitus 1:7; 1 Timoti 2:8) Bihain long ol elda i skelim tingting, na pasin, na ol samting pasin bilong wanpela i bin mekim bilong bagarapim ol narapela, man o meri i no inap bosim belhat na kros bilong em, em inap raus long kongrigesen​—⁠em bikpela hevi tru.

Olsem wanem long John em pastaim yumi bin stori long em? Em i lain long bosim tingting na pasin bilong em? Em i lain long bosim dispela pasin bilong em i wok long i go nogut olgeta? Sori tru, em i bikmaus i go na em i kirap long subim na paitim meri bilong em. Pastaim em i sutim tok long meri bilong em na makim pinga long em, tasol bihain em i kirap na sutim pinga long skin bilong meri na givim pen long em na makim skin bilong em. Tasol John i bin was gut, em i no laik makim skin bilong Ginger long ol hap ol man inap lukim, na em i bin traim long haitim pasin bilong em tu. Tasol bihain, em i kirap long kikim, paitim, na pulim gras bilong Ginger na mekim sampela pasin i moa nogut. Ginger i no stap moa wantaim John.

I no olsem dispela samting i mas kamap. Planti i bin kisim wankain hevi, tasol ol i bin bosim belhat bilong ol. Olsem na i bikpela samting long bihainim Krais Jisas, em i nambawan gutpela piksa bilong yumi. I no gat wanpela taim em i belhat nating. Taim em i belhat, em i save bihainim stretpela pasin, na em i bin bosim gut kros bilong em. Olsem na Pol i givim gutpela tok long yumi olgeta: “Sapos bel bilong yupela i hat, orait yupela lukaut. Nogut yupela i mekim sin. Nogut yupela i belhat yet i stap na san i go daun.” (Efesus 4:26) Yumi olgeta i gat ol liklik pasin kranki na yumi save, samting yumi planim, dispela kain samting tasol bai yumi kamautim, olsem na i gat gutpela as na yumi mas bosim belhat bilong yumi.

[Futnot]

[Piksa Kredit Lain long pes 14]

Sol i Traim Long Kilim i Dai Devit/The Doré Bible Illustrations/Dover Publications, Inc.