No Gat Wok!

“Taim ol i pinisim mi long wok, i olsem wanpela i kapsaitim baket wara antap long mi. Mi pilim olsem mi samting nating.”​—⁠Tony, long Jemani.

“Mi pilim olsem ol i putim wanpela hevipela samting antap long sol bilong mi. Mi wanpela mama wanpis, olsem na mi wari tru long olsem wanem mi bai baim kaikai bilong tupela pikinini bilong mi na baim wara na pawa samting.”​—⁠Mary, long India.

“Mi bel hevi tru taim ol i pinisim mi long wok, na mi tingting planti long mi inap painim narapela wok o nogat.”​—⁠Jaime, long Meksiko.

LONG olgeta hap bilong graun, planti milion manmeri i karim wankain hevi olsem Tony, Mary, na Jaime. Long 1999 samting, ol i skelim olsem inap 10 pesen bilong ol manmeri husat inap holim wok mani long Yurop na Sentral Esia​—⁠em olsem 23 milion manmeri​—⁠ol i no gat wok. Long sampela kantri we i no gat planti wok bisnis samting, winim 25 pesen bilong ol lain husat inap holim wok mani ol i no gat wok. Nius The New York Times long Julai, 2003 i tok, long Amerika, “insait long 28 mun i go pinis, klostu 2.6 milion wok i pinis​—⁠olsem i no gat wok moa long man i mekim dispela wok.”

Long planti kantri i hatwok tru long painim wok. Olsem: Long olgeta yia bikpela lain i save greduet long haiskul na kolis na ol i resis long painim wok. Na tu, sapos wanpela i kisim digri long skul o spesel trening, dispela i no makim olsem em bai painim wok em i laik mekim. Olsem na planti man i save senisim wok planti taim insait long ol yia ol i holim wok. Sampela i mas lain long mekim wok em bipo ol i no bin mekim.

Sapos yu no gat wok, yu inap mekim wanem bilong yu ken painim wok? Na taim yu kisim wok pinis, yu ken mekim wanem bilong holim dispela wok?