No Gat Wok—Bilong Wanem?

LONG sampela kantri planti man i mas wok planti aua bilong lukautim ol yet long ol samting bilong skin. Ol i no inap wok isi isi, nogat; ol i mas wok i go i go, no gat malolo; na wok sampela i mas mekim em inap bagarapim skin bilong ol, tasol olgeta i kisim liklik pe. Bipo, planti man long sampela kantri ol i ting, sapos ol i wok long wanpela bikpela kampani o long wanpela dipatmen bilong gavman, ol i no ken pinis long dispela wok, ol bai holim i go inap long taim ol i lapun na lusim wok. Tasol long nau, i olsem i no gat wanpela bisnis o bikpela kampani em inap givim wok long ol man em kain wok ol i save laikim na ol i ken holim inap longtaim. Bilong wanem?

Ol As Bilong Hevi

Planti tausen yangpela i no inap painim namba wan wok mani bilong ol​—⁠maski ol i bin winim bikpela skul o nogat. Long Itali, inap 33 pesen bilong ol man i no gat wok mani em ol yangpela i gat 15 i go inap 24 krismas. Ol yangpela i hatwok long painim wok, long wanem, nau planti man i no laik lusim wok maski ol i go lapun. Na planti meri tu ol i no gat wok mani. Olsem na nau planti nupela wokman i painim painim namba wan wok mani bilong ol.

Taim ol faktori i kirap mekim wok long ol masin, em nau, i no gat planti wok ol man i ken kisim. Ol man i wok leba inap planti planti aua, ol i bin ting ol masin bai helpim ol na pinisim hevi bilong ol long wok planti aua. Ol masin inap wokim ol samting hariap hariap, na em inap mekim planti wok ol man inap kisim bagarap long en, tasol masin i mekim na nau planti man i no gat wok. Sapos kampani i pinisim man long wok, dispela man inap hatwok tru long painim hariap wanpela wok sapos em i no lain long mekim narapela kain wok.

Nau i gat planti planti samting ol kampani i save wokim na yumi inap baim. Sampela man i ting yumi no ken wokim sampela samting moa​—⁠i gat planti samting pinis. Na nau planti man i no gat wok mani, olsem na i no gat planti man bilong baim ol dispela samting. Em nau, ol samting ol i wokim i planti tumas, winim tru skel ol man i save baim. Ol kampani i ting wok bisnis bilong ol bai go bikpela moa, tasol nogat, olsem na sampela bikpela haus faktori ol i bin wokim ol i mas pasim na ol i stap nating, o ol man i mekim narapela wok long en. Ol dispela kain samting i mekim na planti man i kisim hevi long en​—⁠ol i no gat wok. Taim wanpela kantri i gat bikpela hevi bilong mani, ol kampani i no laik kisim ol nupela wokman, na ol wok i save pinis long kain taim olsem. Na ol i no save kirapim gen, maski wok bisnis i kamap gutpela gen. Olsem na dispela i helpim yumi long save, i no gat wanpela as tasol na planti man i no gat wok mani.

Bikpela Hevi Tru

Dispela hevi inap painim yumi olgeta, olsem na taim yumi no gat wok mani, em i wanpela bikpela hevi tru. Sampela kantri i save mekim sampela samting bilong helpim ol man i wok yet. Olsem: Kampani i save larim ol man i wok sampela de tasol long wik na pe bilong ol i no bikpela. Tasol dispela kain rot inap pasim ol man i painim wok.

Maski ol man i gat wok o ol i no gat wok, long nau ol i no malolo long toktok planti long ol hevi bilong wok mani. Ol man i stap nating ol i singaut long ol kampani i mas kamapim ol nupela wok, na ol man i save wok ol i strong long holim wok bilong ol inap longtaim​—⁠em tupela samting i no stret wantaim. Nius Panorama bilong Itali i tok: ‘Ol man i gat wok, planti taim kampani i askim ol long wok planti aua moa. Ol man i no gat wok, ol i stap tasol. Bikpela hevi inap kamap long dispela​—⁠ol man inap bruk long tupela lain​—⁠ol man bilong wok planti aua moa, na ol man i no inap tru long kisim wok na ol i mas askim ol narapela long helpim ol long kisim sampela samting bilong skin.’ Ol saveman i stori long Yurop olsem: Taim wok bisnis i kamap gutpela, dispela i no save helpim ol man i no gat wok​—⁠em i save helpim tasol ol man i holim pinis wanpela wok.

Na tu, sapos sampela provins i sot long mani, i no gat planti wok mani. Olsem na long sampela kantri olsem Jemani, Itali, Spen, ol man long sampela provins ol inap painim wok, na long sampela provins, nogat. Olsem wanem? Ol man i orait long lain long wanpela wok i narapela kain long olpela wok bilong ol o long i go sindaun long narapela hap o kantri? Sampela taim dispela inap helpim ol long painim wok mani.

I Gat Rot Bilong Stretim?

Planti man i ting ol wok bisnis bai kamap gutpela. Tasol sampela i no bilip olsem, ol i ting kain samting olsem i no inap kamap paslain long yia 2000. Na sampela i ting wok bisnis i kirap pinis long kamap gutpela, long wanem, wan wan man i kisim wok. Tasol em i no kamap gutpela tumas, long wanem, long Itali, wok mani i go sot moa. Sapos wok bisnis i kamap gutpela i no olsem planti man bai kisim wok, nogat. Sapos wanpela wok bisnis i kamap gutpela liklik, kampani i no laik kisim ol nupela wokman, ol i laik mekim wok long ol man i wok pinis long kampani. Em nau, namba bilong ol man i no gat wok i go bikpela. Na tu, namba bilong ol man i painim wok i go bikpela, winim namba bilong ol nupela wok mani.

Long nau planti kantri i wok bung wantaim long ol samting bilong mani. Sampela saveman long wok bisnis i ting, ol nupela pasin bilong wok bisnis ol i kamapim nau bilong lukautim wok bisnis bilong planti kantri i insait long wanpela kontrak, ol inap helpim wok bisnis bilong ol kantri​—⁠em kontrak North American Free Trade Agreement (NAFTA), na Asia-Pacific Economic Cooperation (APEC). Tasol dispela kain samting i helpim tasol ol bikpela kampani long kirapim planti wok bisnis long ol kantri ol inap baim ol wokman long liklik pe. Em nau, wok bisnis i go sot long ol narapela kantri, na ol man i no gat wok mani. Na ol wokman i save kisim liklik pe, ol i no inap baim planti samting. Olsem na long sampela kantri planti man i mats o bung na mekim pait bilong tokaut olsem ol dispela kontrak bilong wokim bisnis i no stret.

Ol bikman i save kamapim kain kain tingting bilong helpim ol man long painim wok mani. Tasol tingting bilong sampela i pait wantaim ol narapela. Maski em bisnisman, o man bilong wok politik, o wokman yet​—⁠olgeta i gat narapela narapela tingting. Sampela i tok long daunim takis ol kampani i mas baim bilong kirapim ol long kisim sampela nupela wokman. Sampela i tok, gavman i mas mekim bikpela wok tru bilong helpim ol man i no gat wok. Na sampela i tok, i gutpela long skelim wok bilong olgeta wokman na daunim ol aua ol i mas wok. Sampela bikpela kampani i kirap pinis long mekim olsem. Tasol maski long taim bilong yumi ol i bin wok long sotim sotim ol aua bilong wok long ol kantri i gat planti wok bisnis long en, planti man i no gat wok yet. Saveman Renato Brunetta i tok: “Maski ol i bihainim wanem wanem kain pasin, em i no wok gut, na mani ol i tromoi long mekim olsem em i antap long winmani ol i kisim.”

Nius L’Espresso i tok: “Yumi no ken giamanim bel bilong yumi, hevi i bikpela.” Olsem wanem? Em i bikpela tumas long stretim? I gat rot bilong stretim hevi long planti man i no gat wok mani?

[Blok long pes 14]

Wanpela Hevi Bilong Bipo

Bipo tu sampela man i no gat wok mani. Inap planti handet yia, sampela taim ol man i no gat wok maski ol i laik wok. Taim wok i pinis, planti tausen wokman em ol i bin mekim bikpela wok konstraksen, ol i no gat wok mani​—⁠ol i mas stap nating inap long taim ol i kisim narapela wok gen. Inap long ol i kisim wok gen​—⁠sapos ol inap kisim​—⁠sindaun bilong ol i no gutpela.

Wanpela buk i tok: Namel long yia 500 na 1500 samting “ol man i no gat hevi yet long wok mani olsem long nau,” tasol ol i gat hevi long man i no wok. (La disoccupazione nella storia [No Gat Wok Long Bipo]) Tasol long dispela taim bipo, sapos man i no wok, ol i ting em i man nogut tru i giaman nabaut o em i wanpela tripman. Long buk bilong em, Profesa John Burnett i tok, i kam inap long yia 1800 samting, planti saveman long Briten i ting “ol man i no gat wok, ol i wankain olsem ‘ol man bilong mekim pasin nogut,’ na ol tripman i no gat ples slip o long nait ol i save wokabaut nating long rot.”​—⁠Idle Hands.

Tasol long yia 1900 samting, ol man i kisim save olsem dispela hevi long no gat wok mani, em narapela kain hevi. Long 1895, gavman i bin makim sampela kain lain long skelim na stretim dispela hevi, olsem lain Select Committee of the British House of Commons, na ol i bin toktok long “Bel Hevi, Long Wanem, No Gat Wok Mani.” Em nau, dispela hevi long man i no gat wok mani, em i kamap olsem wanpela bikpela hevi bilong planti man.

Bihain long Namba Wan Pait, ol man i pilim moa yet dispela hevi, long wanem, long taim bilong pait i gat planti wok bilong wokim ol samting bilong pait. Ol man i no bin stap nating, ol i gat wok mani. Tasol bihain long 1920, taim bilong bikpela hevi bilong mani na ol wok bisnis i kamap long ol hap bilong Wes, na long 1929 dispela hevi i go bikpela moa na bagarapim ol bisnis long ol kantri i gat planti wok bisnis long en. Bihain long Namba 2 Pait, wok bisnis bilong planti kantri i kamap gutpela gen, olsem na planti man i kisim wok mani. Tasol wanpela lain (Organization for Economic Cooperation and Development) i tok, “dispela hevi long nau olsem planti man i no gat wok mani, em i bin kirap bipo long 1965 samting.” Long 1973, narapela hevi i mekim na planti man i mas pinis long wok​—⁠pe bilong wel i go antap tru na bagarapim planti bisnis, na planti kampani i kisim masin kompyuta, olsem na ol i pinisim sampela wokman. Dispela lain i no gat wok mani i wok long i go bikpela, na maski man i gat bikpela wok olsem maneja o em i wok long ofis na em i ting em i no ken pinis long wok, hevi i save painim em tu.

[Piksa long pes 13]

Strong long tokim gavman ol i mas kisim wok i no inap stretim dispela hevi

[Kredit Lain]

Reuters/Bettmann