“Go Klostu Tru Long God, na Em Bai i Kam Klostu Tru Long Yupela”
Paslain na Bihain—Tok Bilong God i Senisim Man
SAPOS yu bin bungim Tony long taim em i gat 14 krismas samting, bai yu lukim wanpela mangi i gat pasin bikhet na i raun long ol hap nogut bilong Sydney, Australia. Em i prenim ol raskol. Planti taim ol i save brukim ol haus na stilim ol samting, pait wantaim ol narapela lain raskol, na pait long gan long rot.
Tony i kirap long smok taim em i gat 9-pela krismas. Taim em i gat 14 krismas, em i kisim mariwana long olgeta taim na em i save pamuk nabaut. Taim em i gat 16 krismas, em i kalabus long heroin, na em i kisim tu koken, drak LSD—olsem Tony i tok, “mi kisim olkain drak em inap mekim mi amamas o spak.” Bihain em i pasim tok wantaim tupela lain raskol long salim drak bilong ol. I no longtaim na Tony i kisim nem olsem nambawan man bilong salim ol drak long nambis long hap is bilong Australia.
Pasin bilong Tony long kisim heroin na mariwana i mekim na long olgeta wan wan de em i save tromoi mani namel long 160 na 320 dola. Tasol dispela pasin i putim bikpela hevi moa long famili bilong em. Em i tok: “Planti taim ol raskol i makim gan na naip long pes bilong mipela, long wanem, ol i laikim ol drak na mani i stap long haus.” Inap tripela taim olgeta Tony i go kalabus na dispela i kirapim em long skelim wanem ol samting bai kamap long pasin em i bihainim.
Tony i bin i go long lotu, tasol em i pilim olsem em i stap longwe long wanpela God i save kukim ol sinman long paia inap oltaim oltaim olsem strafe bilong ol. Tasol taim tupela Witnes Bilong Jehova i kam lukim em, Tony i kirap nogut long kisim save olsem God i no save mekim olsem. Tony i amamas olsem em inap stretim sindaun bilong em na God inap mekim gut long em. Tok bilong Jisas i kirapim Tony: “God em inap mekim olgeta samting.” (Mak 10:27) Tony i pilim tru dispela gutpela tok: “Yupela i mas i go klostu tru long God, na em bai i kam klostu tru long yupela.”—Jems 4:8.
Nau Tony i mas taitim bun tru long mekim i stap bilong em i kamap stret wantaim ol lo bilong Baibel. Em i tok: “Namba wan samting mi lusim em smok, em samting mi no bin inap long mekim bipo maski mi bin traim planti taim. Jehova i strongim mi na mi inap lusim pasin bilong kisim heroin na mariwana—em pasin i bin kalabusim mi inap 15 yia olgeta. Mi no bin ting liklik olsem mi inap lusim ol dispela pasin.”
Nau Tony na meri bilong em ol i no pret long wanpela God i save kukim ol man long helpaia inap oltaim oltaim—em wanpela bilip i no stap long Baibel. Ol i amamas na wetim gutpela samting ol inap kisim bihain, em laip oltaim long Paradais long graun. (Song 37:10, 11; Sindaun 2:21) Tony i tok: “Bilong mekim i stap bilong mi i kamap stret wantaim lo bilong God, bikpela hap taim i lus na mi mas taitim bun tru, tasol Jehova i helpim mi na mi inap mekim dispela samting.”
Yes, dispela man bipo em i kalabus long drak em i kamap wanpela Kristen. Em na meri bilong em ol i yusim taim na mani samting bilong ol na ol i bin tromoi planti tausen aua long mekim wok bilong skulim ol man long Baibel. Ol i wok strong tu long helpim tupela pikinini bilong ol long kamap bikpela na stap aninit long God. Dispela bikpela senis i bin kamap long rot bilong strong i stap long Tok Bilong God, em Baibel. Tru tumas, olsem aposel Pol i tok, “tok bilong God i gat laip, na em i wok strong i stap.”—Hibru 4:12.
Maski ol gutpela samting olsem i kamap, sampela man i tok olsem wok ol Witnes Bilong Jehova i mekim long skulim ol man long Baibel i save bagarapim sindaun bilong ol famili na i bagarapim gutpela pasin bilong ol yangpela. Tasol samting i kamap long Tony i daunim tru dispela tok.
Olsem Tony, planti man i kisim save olsem ol inap daunim ol samting nogut i kalabusim ol. Ol inap mekim olsem wanem? Long rot bilong bilip long God na Tok bilong Em, na tu, long rot bilong ol Kristen ol i bung wantaim ol em ol i save tingim na laikim ol. Tony i amamas na em i tok: “Mi lukim olsem wanem ol stiatok bilong Baibel i bin lukautim ol pikinini bilong mi. Ol tok bilong Baibel i bin helpim marit bilong mi long abrusim bagarap. Na nau ol lain i sindaun klostu long mi ol i no pret moa long mi, long wanem, mi no mekim moa ol samting bilong nogutim ol.”
[Rait long pes 9]
‘Jehova i strongim mi na mi inap lusim pasin bilong kisim drak em mi bin i stap kalabus long en inap 15 yia olgeta’
[Blok long pes 9]
Ol Stiatok i Mekim Wok
Ol stiatok bilong Baibel i bin helpim planti man i kalabus long drak long lusim dispela pasin nogut. Em hia sampela bilong ol dispela stiatok:
‘Yumi mas rausim olgeta pasin doti bilong bodi na bilong spirit, na yumi mas kamap klin olgeta na yumi mas pret na bihainim tru pasin holi oltaim.’ (2 Korin 7:1) Lo bilong God i tambuim pasin bilong kisim drak.
“Sapos yu laik kisim gutpela tingting, orait pastaim yu mas aninit long Bikpela. . . . Na sapos yu laik kisim gutpela save, orait pastaim yu mas save gut long em.” (Sindaun 9:10) Pasin bilong daun long Jehova—em stretpela save long God na pasin bilong em i as bilong en—dispela i bin helpim planti man long lusim kalabus bilong kisim drak.
“Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” (Sindaun 3:5, 6) Man inap lusim ol dispela pasin nogut long rot bilong bilip tru na wetim God i helpim em.