Yu Makim Taim Stret Bilong Mekim Baibel Stadi?
LAS yia, Gavening Bodi i bin tokaut long senis i kamap long ol miting bilong kongrigesen na dispela i opim rot long ol famili i gat bikpela taim moa bilong mekim Baibel stadi na stori long en. Sapos yu papa bilong famili, orait mekim famili stadi long olgeta taim wantaim meri na ol pikinini bilong yu, na mekim long gutpela pasin i stret long samting ol wan wan i mas kisim helpim long en. Na ol marit i no gat pikinini ol i ken yusim gut dispela taim bilong mekim Baibel stadi wantaim. Ol singel brata na sista em ol i no gat wok bilong famili, ol i ken yusim dispela taim long mekim Baibel stadi bilong ol yet.
Planti i kamapim amamas bilong ol long dispela pasin bilong mekim Famili Lotu. Olsem: Kevin, em wanpela elda, em i tok: “Dispela tok, ‘tenkyu,’ em i no inap kamapim klia stret samting em mipela long kongrigesen i pilim. Mipela ol elda i bin stori long olsem wanem mipela i ken yusim ol dispela taim we i no gat miting long en bilong mekim samting em Gavening Bodi i bin tokim mipela long mekim—em long stadi wantaim famili bilong mipela.”
Man bilong Jodi em wanpela elda, na Jodi i tok: “Mipela i gat 3-pela pikinini meri em krismas bilong ol i 15, 11, na 2. I no longtaim i go pinis mipela i go sindaun long wanpela kongrigesen bilong tok ples Sain bilong ol yaupas. Mipela i mas lusim bikpela haptaim na wok strong long redim olgeta miting. Tasol nau dispela nupela senis i kamap na mipela i gat bikpela taim bilong mekim gut moa famili lotu!”
John na JoAnn, em tupela marit i mekim wok painia oltaim, ol i tok: “Mipela i no save mekim famili stadi bilong mipela long wankain taim long olgeta wik, long wanem, i gat ol narapela wok bilong kongrigesen mipela i mekim. Dispela nupela senis em i gutpela presen i kam long Jehova na i givim nupela strong long mipela—em sapos mipela i yusim gut dispela taim long mekim wok mipela i mas mekim.”
Tony em wanpela singel brata i gat 25 krismas samting, em i makim Tunde nait olsem taim bilong mekim Baibel stadi bilong em yet. Em i yusim ol narapela taim long wik bilong redim ol hap bilong ol miting bilong kongrigesen. Tasol Tony i tok: “Mi save wet tasol long Tunde bai kamap.” Bilong wanem? Em i tok: “Tunde nait em wanpela spesel taim bilong mi long kisim save long Jehova. Inap tupela aua, mi save stadi long ol tok i strongim pasin bilong mi long pas gut wantaim Jehova. Mi gat bikpela hap taim bilong stadi na dispela i opim rot long mi tingim tingim long bel ol tok bilong Baibel mi ritim.” Wanem samting i kamap? “Ol skultok bilong Jehova i go insait tru long bel bilong mi winim bipo.” Em i givim wanpela eksampel olsem: “Taim mi ritim stori bilong pasin pren namel long Devit na Jonatan long buk Insight, mi lainim planti samting long pasin bilong Jonatan olsem em i no man bilong tingim em yet. Pasin bilong em i helpim mi long kliagut long dispela pasin bilong i stap pren tru. Mi save wet tasol long painimaut ol kain gutpela gutpela tok olsem long olgeta Tunde nait!”
Tru tumas, gutpela samting bai painim olgeta wokman bilong Jehova, sapos ol i mekim gut wok long taim nau ol i gat bilong mekim gut Baibel stadi bilong ol yet na famili lotu.