Baibel Stadi Bilong Yu Yet na Bilong Famili Em i Bikpela Samting!
1 Olsem long taim bilong ol Kristen bilong pastaim, lain Gavening Bodi i gat bikpela laik tru long mekim ol samting bilong lukautim lain bilong Jehova. (Ap. 15:6, 28) Taim bilong bikpela hevi i kam klostu pinis, olsem na em i bikpela samting long olgeta wan wan pablisa bilong Kingdom ol i mas strongim tru pasin bilong ol long pas gut wantaim Jehova. Bai yu mekim wanem wok long dispela taim em pastaim yumi save yusim long mekim Buk Stadi Bilong Kongrigesen? Mipela i laik kirapim yupela olgeta long yusim dispela taim bilong mekim famili lotu. Sapos yumi mekim gutpela wok long dispela haptaim, dispela bai givim rot long yumi ken stadi gut moa long Tok Bilong God na kisim ol gutpela helpim long ol tok yumi lain long en.—Sng. 1:1-3; Ro. 11:33, 34.
2 Famili Lotu Long Apinun: Ol het bilong famili i gat wok Jehova i givim long ol, olsem ol i mas stretim ol samting bambai famili i ken insait long famili Baibel stadi long olgeta taim. (Lo 6:6, 7) Ol brata na sista singel em ol i no gat wok bilong famili, ol inap yusim dispela taim bilong mekim Baibel stadi na wok painimaut bilong ol yet. Em i bikpela samting long yumi olgeta i mas “i gat taim bilong mekim” stadi na tingim tingim ol tok long bel bambai yumi ken pas gut wantaim Jehova long dispela “taim nogut.”—Ef. 5:15, 16.
3 Ol Samting Bilong Stadi Long En: Was Taua Buk na Nius Skripsa Indeks o Watchtower Library long CD-ROM i ken helpim yu long painim sampela save moa na dispela bai helpim famili bilong yu long amamas long taim bilong famili Baibel stadi. Ol famili inap skelim ol stori i save kamap planti taim long Wastaua olsem: “Rot Bilong Famili i Ken Stap Amamas,” “Skulim Ol Pikinini Bilong Yu,” na “Bilong Ol Yangpela Bilong Yumi.” Na tu, Kirap! i gat hap “Ol Yangpela i Laik Save” na ol gutpela stori bilong ol samting God i wokim.
4 Pasin bilong famili i sindaun wantaim na ritim Baibel na ol i no hariap long mekim olsem, dispela bai helpim famili olgeta long tingim gut ol tok na bihainim ol pasin bilong God long i stap bilong ol. (Hi. 4:12) Long ol narapela taim, yupela inap sindaun wantaim na lukim ol vidio em oganaisesen bilong Jehova i wokim na stori long samting yupela i lukim. Bai yupela i gat rot long skelim gut wanem samting yupela bai stadi long en na olsem wanem yupela inap mekim olsem. Em i gutpela sapos yu askim famili bilong yu long wanem samting ol bai amamas long stadi long en.
5 As na Em i Bikpela Samting Long Nau: Strongim pasin bilong yumi long pas gut wantaim Jehova, na dispela bai redim yumi long ‘sanap strong na lukim olgeta samting Bikpela i laik mekim bilong helpim yumi.’ (Kis. 14:13) Ol papamama i mas larim God i stiaim ol long mekim bikpela long ol pikinini em ol i stap “namel long ol lain manmeri bilong dispela graun, em ol lain i bin lusim stretpela pasin na mekim planti rong.” (Fl. 2:15) Ol pikinini i mas kisim helpim long bihainim gutpela pasin long skul we planti pikinini i wok long lusim stretpela pasin. (Snd. 22:3, 6) Ol marit i mas wok strong long strongim “tripela string” insait long marit bilong ol, olsem ol i mas pas gut moa wantaim Jehova. (Sav. 4:12) Olsem na yumi mas mekim gutpela wok long dispela haptaim i stap yet bilong strongim “gutpela bilip God yet i bin givim long [yumi]”!—Ju. 20.
[Askim Bilong Stadi]
1. Lain Gavening Bodi i gat bikpela laik tru long mekim wanem? Bilong wanem i olsem?
2. Olsem wanem yumi inap stretim ol samting bilong mekim famili lotu long apinun?
3, 4. Wanem sampela samting yumi inap yusim bilong stadi long en? Yumi mas tingting long mekim wanem?
5. Bilong wanem Baibel stadi bilong yumi yet na bilong famili, em i bikpela samting tru long i stap bilong yumi long nau?