“Wanpela Moa Dring Tasol”

ALLEN i kirap dring planti alkohol taim em i gat 11-pela krismas.a Em wantaim ol pren bilong em, ol i pilai long bus. Ol i giaman long bihainim pasin bilong ol man ol i lukim long ol muvi, tasol alkohol em Allen na ol pren bilong em i dring em alkohol tru.

Tony i gat 40 krismas taim em i kirap dring planti. Pastaim em i kisim wanpela o tupela dring tasol, na isi isi em i kisim 5-pela o 6-pela dring long olgeta nait. Bihain, em i no inap kaunim moa hamas dring em i save kisim long de olgeta.

Allen i askim sampela long helpim em long lusim hevi bilong dring planti. Tony i sakim helpim ol famili na pren i laik givim em. Allen i stap laip yet bilong kamapim stori bilong em; Tony i dai sampela yia i go pinis long wanpela eksiden bilong ka, long wanem, em i bin dring planti alkohol.

Maski wanpela i dring planti alkohol taim em yet tasol i stap, samting i kamap long dispela inap bagarapim sindaun bilong sampela narapela manmeri, na planti taim bikpela hevi tru i kamap.b Planti taim pasin bilong dring tumas i mekim na ol man i tok nogut, paitim na kilim i dai narapela, insait long ka eksiden, eksiden long ples wok, na ol i gat planti hevi long helt bilong ol. Long olgeta yia ol manmeri i mas tromoi planti bilion dola long ol hevi em pasin bilong dring tumas i kamapim, na tu, dispela pasin i save bagarapim tingting bilong ol man yet, na bilong famili na ol pikinini.

Lain U.S. National Institutes of Health i tok: “I no olgeta man i save dring oltaim ol i gat hevi long dring tumas, na i no olgeta man i gat hevi long dring tumas ol i save dring long olgeta de.” Planti man husat i no kalabus long dring ol i kisim pasin bilong dring planti, tasol ol i ting ol i no gat hevi long pasin bilong dring tumas. Sampela i save dring sampela taim tasol, tasol ol i kisim 5-pela o moa dring long wanpela taim.

Sapos yu dring alkohol, hamas dring em planti tumas? Long wanem taim i no gutpela long kisim “wanpela moa dring tasol”? (Sindaun 23:​29, 30, Baibel Contemporary English Version) Ol stori i kamap bihain long dispela bai kamapim ol tok bilong helpim ol man i gat hevi long dring planti.

[Ol Futnot]