Yu Ting Pasin Nogut i Win?
KIRAP long bipo yet na i kam inap long nau kain tingting olsem bai i gat bikpela pait tru namel long ol gutpela lain na lain nogut i kirapim ol man bilong raitim buk na ol saveman long kamapim kain kain stori nating long dispela samting. Tasol i gat wanpela buk i stori stret long pait i kamap namel long God na Satan. Dispela buk em Baibel. Em i kamapim gut as bilong dispela pait na em i helpim man long save husat i winim dispela pait.
Bihain liklik long God i wokim namba wan man na meri, wanpela spirit ol man i no inap lukim, em Satan, em i gat tok long wok bos bilong God. Olsem wanem em kamapim dispela samting? Em i tok God i pasim ol man em i bin wokim long kisim ol gutpela samting na sindaun bilong ol bai kamap gutpela moa sapos ol i bosim ol yet.—Stat 3:1-5; KTH 12:9.
Bihain, long taim bilong Jop, Satan i mekim narapela tok. Em i laik bagarapim pasin bilong Jop long i stap gut long God, olsem na Satan i tok: “Sapos wanpela man i laik i stap gut, em inap givim olgeta samting bilong en bilong baim bek laip bilong en.” (Jop 2:4) Man! Dispela tok em i mekim i go long yumi olgeta man! Taim Satan i mekim wok long dispela tok “wanpela man” na em i no kolim nem bilong Jop, em i laik tok olsem olgeta man i no inap i stap gut long God. Em i mekim tok i kain olsem: ‘Wanpela man i laik i stap gut, em bai givim olgeta samting bilong en bilong baim bek laip bilong en. Givim rot long mi na mi ken mekim man i givim baksait long God.’
Bilong yumi ken kisim save long husat i win long pait namel long God na Satan yumi ken skelim bekim bilong dispela tupela askim: Olsem wanem? Man inap tru long bosim em yet? Na Satan i bin mekim olgeta man i givim baksait long God?
Olsem Wanem? Ol Man Inap Long Bosim Gut Wokabaut Bilong Ol Yet?
Inap planti tausen yia pinis, ol man i bin traim kain kain gavman. Ol narapela narapela gavman ol i kolim olsem monaki, aristokratik, demokratik, otokratik, na gavman Fasis, na gavman Komiunis, ol man i bin traim pinis ol dispela kain gavman. Oltaim ol man i pilim olsem ol i gat wok long traim nupela kain gavman, dispela i kamapim klia olsem ol kain kain rot bilong bosim ol man i no helpim ol.
Long buk bilong em (A History of the World) ol i bin wokim long 1922, H. G. Wells i tok: “Ol manmeri bilong Rom ol i no save olsem ol i wok long kamapim nupela pasin long bosim ol man.” Em i tok moa: “Oltaim pasin ol i bihainim bilong bosim ol man i wok long senis. Sampela inap tok samting ol i traim i no kamap gut. Na sampela narapela inap tok samting ol i traim i no pinis yet, na Yurop na Amerika ol i wok yet long traim stretim ol hevi bilong bosim olgeta hap em pastaim ol man bilong Rom i bin traim stretim.”
Dispela pasin bilong kamapim ol nupela gavman i kam inap long taim bilong yumi. Long pinis bilong 1999 samting, planti kantri i laikim gavman demokratik winim long bipo. Gavman demokratik i bilong olgeta man i ken insait long en. Tasol olsem wanem? Gavman demokratik i soim olsem ol man inap long bosim ol yet na i no gat wok long God i bosim ol? Jawaharlal Nehru, em wanpela praim-minista bilong India long bipo, em i tok gavman demokratik i gutpela, tasol bihain em i tok: “Mi tok olsem, long wanem, ol narapela gavman i nogut moa.” Na presiden bilong Frans long bipo, em Valéry Giscard d’Estaing, em i tok: “Long nau yumi lukim bikpela hevi tru long dispela pasin bilong man i votim narapela long mekim ol wok gavman samting em yet i laikim.”
Winim 2,400 yia i go pinis wanpela saveman bilong Grik, em Pleto, em i tingim wanpela samting bilong gavman demokratik i nogut. Wanpela buk (A History of Political Theory), i tok Pleto i bin kros olsem “ol man bilong politik ol i no gat save na ol i no mekim gut wok bilong ol, na dispela em i hevi bilong gavman demokratik.” Planti man bilong politik long nau ol i tok ol i hatwok long painim ol man i gat save long mekim ol wok insait long gavman. Wanpela nius (The Wall Street Journal) i tok ol manmeri “i no amamas long ol lida bilong ol em ol i no gat save long stretim ol samting long taim bikpela hevi i kamap.” Nius i tok moa olsem: “Taim ol manmeri i lukluk long ol lida bilong soim rot long ol, ol i les tru long lukim ol lida i gat tupela tingting long mekim ol samting na korapsen insait long wok politik.”
Orait nau yumi ken tingim wok king bilong Solomon long Israel bipo. God Jehova i givim gutpela tingting na save long Solomon. (1 King 4:29-34) Olsem wanem long sindaun bilong ol manmeri long Israel long dispela 40 yia Solomon i stap king? Baibel i tok, “ol manmeri bilong Juda na Israel i bikpela lain tumas, inap olsem wesan bilong nambis. Ol i sindaun gut na ol i gat kaikai na dring na ol i amamas.” Na dispela hap bilong Baibel i tok moa olsem: “Taim Solomon i stap King, olgeta manmeri long olgeta hap bilong Juda na Israel, ol i sindaun gut klostu long gaden wain na diwai fik bilong ol, na i no gat wanpela samting nogut i kamap long ol.” (1 King 4:20, 25) Ol i gat wanpela king i gat gutpela tingting na save i bosim ol, na em i stap olsem mausman bilong Nambawan Bikpela King em ol man i no inap lukim, em Jehova God, olsem na ol Israel i stap bel isi na stap amamas, na ol i gat gutpela sindaun.
Wok bos bilong God i narapela kain tru long wok bos bilong ol man! Yu ting i stret long wanpela man i tok olsem Satan i win pinis long dispela tok bilong em olsem ol man inap bosim wokabaut bilong ol yet? Nogat, long wanem, profet Jeremaia i tokaut stret olsem: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.”—Jeremaia 10:23.
Olsem Wanem? Satan Inap Long Pulim Olgeta Man Long Lusim God?
Olsem wanem? Dispela tok bilong Satan olsem olgeta man bai lusim God i bin kamap tru? Long sapta 11 bilong Buk Hibru, aposel Pol i kolim nem bilong sampela ol man na meri i stap gut long God paslain long taim bilong ol Kristen. Na em i tok: “Mi no gat taim bilong stori long Gideon na Barak na Samson na Jepta na long Devit na Samuel na long ol profet.” (Hibru 11:32) Pol i tok long ol dispela man i stap gut long God olsem, “ol dispela manmeri bilong bipo ol i sanap na raunim yumi i stap olsem bikpela klaut.” (Hibru 12:1) Long tok Grik dispela tok “klaut” i no makim wanpela klaut i gat ol mak stret long en, nogat, em i tok long wanpela bikpela klaut i bikpela tru na i karamapim skai. Dispela tok i stret, long wanem, ol dispela gutpela wokman bilong God long bipo ol i bikpela lain tru, olsem na ol i olsem wanpela bikpela klaut. Tru tumas, kirap long bipo yet na i kam inap long nau, bikpela lain manmeri em yumi no inap long kaunim namba bilong ol, long laik bilong ol yet ol i bin stap gut long Jehova God.—Josua 24:15.
Yumi lukim wanem samting long taim bilong yumi? Namba bilong ol Witnes Bilong Jehova long olgeta hap bilong graun i go antap winim 6 milion, maski ol man i birua na mekim nogut tru long ol. Na narapela 9 milion samting ol i bung wantaim ol, na planti bilong ol dispela lain ol i wok long mekim ol samting bilong ol i ken pas gut wantaim God.
Pasin Pikinini bilong God yet, Jisas Krais i bihainim i olsem nambawan bekim bilong dispela tok Satan i sutim olsem em inap long mekim ol man i givim baksait long Jehova. Maski em i kisim bikpela pen tru long diwai pos em i no lusim Jehova. Klostu long taim Jisas i dai, em i singaut: “Papa, mi putim spirit bilong mi long han bilong yu.”—Luk 23:46.
Satan i save mekim wok long kain kain samting—ol traim na pasin birua—bilong mekim ol man i stap aninit long em. Em i save mekim wok long “pasin bilong bel kirap na aigris na bikhet” long traim ol manmeri, na em i traim pasim rot bilong ol man long pas gut long Jehova o pulim ol man long lusim Jehova. (1 Jon 2:16) Satan i ‘bin pasim tingting bilong ol man i no bilip, na lait bilong gutnius bilong marimari na sori bilong Krais, em i no inap i go insait long bel bilong ol.’ (2 Korin 4:4) Na oltaim Satan i redi long mekim wok long pasin bilong pret long man bilong inapim laik bilong em.—Aposel 5:40.
Tasol ol man i stap gut long God, Satan i no inap daunim ol. Ol i bin kisim save long Jehova God na ‘ol i laikim em tru long bel bilong ol na long spirit bilong ol na long tingting bilong ol.’ (Matyu 22:37) Tru tumas, pasin bilong Jisas Krais na planti ol narapela long i stap gut long God i kamapim klia olsem Satan i lus tru.
Wanem Samting Bai Kamap Bihain?
Yu ting ol man bai wok long kamapim ol kain kain gavman inap oltaim oltaim? Daniel i tok profet olsem: “Taim ol dispela king i stap yet God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.” (Daniel 2:44) Dispela Kingdom em God bilong heven i kamapim em i wanpela gavman bilong heven, na Jisas Krais i bosim. Em dispela Kingdom Jisas i lainim ol disaipel bilong em long beten long en. (Matyu 6:9, 10) Dispela Kingdom bai bagarapim ol gavman bilong ol man long “dispela bikpela de [bai kamap] bilong God I Gat Olgeta Strong i kotim ol manmeri,” na dispela bai bikpela samting long graun olgeta.—KTH 16:14, 16.
Wanem samting bai painim Satan? Baibel i stori long dispela samting bai kamap bihain na em i tok: “[Wanpela ensel bilong Jehova] i holimpas dispela bikpela snek, em snek bilong bipo tru, em Satan, dispela ‘Man I Save Kotim Olgeta Man.’ Na ensel i pasim em long sen na em bai i stap olsem inap long 1,000 yia. Na ensel i tromoi em i go daun long hul i no gat as, na i pasim dua bilong dispela hul na i lokim strong. Olsem na Satan bai i no inap giamanim moa ol manmeri bilong olgeta lain. Em i mas wetim 1,000 yia i pinis pastaim.” (KTH 20:1-3) Wan tausen yia bilong Jisas Krais i mekim wok king bai kirap bihain long ol i tromoi Satan i go insait long hul i no gat as.
Graun bai kamap gutpela ples tru! Pasin nogut wantaim ol man i kamapim ol dispela pasin ol bai i no i stap moa. Baibel i tok promis olsem: “Ol man nogut bai i bagarap olgeta . . . Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” (Song 37:9-11) Ol man bai stap gut na i no gat wanpela samting—man o animal—bai mekim ol i pret. (Aisaia 11:6-9) Planti milion man long bipo, em ol i no save long Jehova na ol i no gat rot long kisim save long em, i olsem ol i helpim Satan, tasol ol bai kirap bek na God bai skulim ol.—Aposel 24:15.
Long pinis bilong 1,000 yia, graun bai kamap ples paradais, na ol man i stap long en bai kamap gutpela olgeta. Satan bai lusim kalabus inap “sotpela taim tasol” na bihain em wantaim ol lain bilong em i no laikim wok bos bilong God ol bai bagarap olgeta.—KTH 20:3, 7-10.
Yu Bai Stap Gut Long Husat?
Long laspela wan handet yia samting Satan i mekim na graun i bagarap tru. Ol hevi i stap nau i no soim olsem em i win, tasol ol i olsem mak i soim olsem yumi stap long taim bilong las de bilong pasin nogut bilong dispela graun. (Matyu 24:3-14; KTH 6:1-8) Pasin nogut tru i stap long graun o tingting bilong bikpela lain man, dispela i no makim husat tru i win. Ol samting i kamapim klia tru olsem husat i win, em wok bos bilong husat i gutpela moa na i bin i gat sampela ol man i lotuim God long wanem ol i laikim em tru o nogat. Long dispela tupela samting Jehova i win.
Sapos dispela hap taim God i larim Satan long i stap i kamapim long ples klia pinis olsem Satan i giaman, orait bilong wanem God i larim pasin nogut i stap yet? Jehova i soim olsem em i isi na wet i stap, long wanem, “em i no laik bai wanpela i man i lus. Em i laik bai olgeta man i mas tanim bel.” (2 Pita 3:9) God i laik “kisim bek olgeta manmeri, bai ol i ken save long as bilong tok i tru.” (1 Timoti 2:4) Long taim i stap yet i gutpela yu stadi long Baibel na ‘kisim save long God tru na Jisas Krais, em i bin salim i kam.’ (Jon 17:3) Ol Witnes Bilong Jehova bai amamas long helpim yu long kisim dispela save na bai yu tu inap bung wantaim planti milion manmeri em ol i stap gut long God.
[Ol Piksa long pes 5]
Pasin bilong ol Witnes Bilong Jehova long stap gut long God i kamapim klia olsem Satan i lus
[Piksa long pes 7]
I gat planti man ol i stap gut long Jehova