Faipela Rot Bilong Painim Wok

HUSAT i save kisim nambawan gutpela wok? Yu ting em man i gat gutpela save tru long mekim dispela wok? “Nogat. Planti taim man i givim bel long painim wok, em dispela man husat i save kisim gutpela wok.” Em tok bilong Brian, man bilong helpim ol man long painim wok. Orait yu ken mekim wanem bilong mekim gut moa ol samting bilong painim wok mani? Nau yumi ken skelim 5-pela rot.

Makim Ol Samting Yu Bai Mekim

Sapos ol i bin pinisim yu long wanpela gutpela wok o inap sampela taim nau yu no gat wok, em i isi tru long bel hevi. Katharina long Jemani, em meri bilong samapim ol dres, em i tok: “Taim ol i pinisim mi long wok, pastaim mi gat tingting olsem bai mi inap kisim narapela wok. Tasol sampela mun i go pinis na mi no inap painim wok, na nau mi bel hevi. Bihain, mi hatwok long toktok long dispela samting wantaim ol pren bilong mi.”

Yu ken mekim wanem na bai yu no pilim olsem yu no gat rot? Buk Get a Job in 30 Days or Less i tok: “Em i bikpela samting long yu mas wokim sediul i olsem yu laik go long wok na nau long kirap bilong de yu save pinis long ol samting yu mas mekim.” Ol man i raitim dispela buk i tok em i gutpela long “putim ol mak bilong wan wan de na raitim long notbuk ol samting yu bin mekim.” Na tu, ol i tok “long olgeta de yu mas putim ol klos i kain olsem yu laik go long wok.” Bilong wanem yu mas mekim olsem? “Taim yu putim ol gutpela klos, dispela bai strongim tingting bilong yu, na em bai helpim yu taim yu toktok long telefon tu.”

Em nau, yu mas givim bel long painim wok, maski dispela i kisim longpela taim. Katharina, em yumi stori pinis long em, em i mekim olsem. Em i tok: “Long rot bilong lain i gat wok long helpim ol man long painim wok, mi kisim atres na telefon namba bilong ol kampani samting. Mi ringim ol lain i putim edvetaismen long niuspepa. Mi skelim telefon buk na raitim lista bilong ol kampani em mi ting ol i gat wok ol i no edvetaisim yet, na mi ringim o go lukim ol. Mi wokim tu wanpela CVa na salim i go long ol dispela kampani.” Taim Katharina i mekim kain bikpela wok olsem, em i kisim wok.

Painim Ol Wok Ol i No Edvetaisim

Man bilong kisim pis i gat bikpela umben, ating em bai kisim pis. Na olsem tasol, taim yu save long rot bilong mekim “umben” bilong yu i go bikpela, dispela bai helpim yu long painim wok. Sapos yu painim wok long rot bilong ringim ol lain i putim edvetaismen long niuspepa o Intenet na em tasol, ating bai yu no kisim save long planti wok i stap bilong kisim. I gat planti wok ol i no save edvetaisim. Olsem wanem yu inap kisim save long ol dispela kain wok?

Yu mas ringim o go lukim ol kampani i putim edvetaismen, na tu, olsem Katharina yu mas makim haptaim long olgeta wik bilong ringim o go lukim ol kampani yu ting ol i gat sampela wok yu inap mekim. Yu no ken wet long ol i edvetaisim ol dispela wok. Sapos wanpela maneja i tok em i no gat wok, askim em sapos em i save long sampela kampani yu inap painim wok long en na i gutpela long yu toktok wantaim husat. Sapos em i kolim nem bilong wanpela kampani, makim taim bilong go lukim lain bilong dispela kampani, na kolim nem bilong dispela man i bin tokim yu long go lukim ol.

Tony, em yumi stori pinis long em, em i painim wok long dispela rot. Em i tok: “Mi ringim o go lukim sampela kampani, maski ol i no edvetaisim wok. Wanpela kampani i tok ol i no gat wok long nau, tasol ol i tok mi ken go lukim ol gen long 3-pela mun bihain. Mi mekim olsem na mi kisim wok.”

Primrose, em wanpela mama wanpis long Saut Afrika, em i mekim wankain samting. Em i tok: “Taim mi go long fest-eid kos, mi lukim ol i wok long sanapim nupela haus long hapsait bilong rot na mi kisim save olsem em bai kamap haus sik bilong ol lapun. Planti taim mi traim long makim taim bilong go lukim bos bilong dispela haus. Bihain em i tokim mi olsem ol i no gat wok. Tasol mi wok long i go bek bilong kisim save sapos mi inap wok long dispela haus sik, na mi redi long mekim wok volantia tu. Bihain, mi kisim wok bilong liklik taim. Mi givim bel long mekim wanem wanem wok ol i givim long mi. Dispela i mekim na mi lain long mekim kain kain wok na mi kisim wok fultaim long dispela haus sik.”

Yu ken askim ol pren, famili, na ol narapela long helpim yu long painim ol wok ol i no save edvetaisim. Jacobus i kisim wok long dispela rot, em wanpela seifti ofisa long Saut Afrika. Em i tok: “Taim ol i pasim kampani mi wok long en, mi tokim ol pren na famili olsem mi wok long painim wok. Wanpela de pren bilong mi i harim tupela meri i toktok taim ol i sanap long lain long wanpela stua. Narapela meri i askim narapela sapos em i save long wanpela man i painim wok. Pren bilong mi i tokim meri ya long mi. Ol i wokim rot bilong mi go lukim meri, na mi kisim wok.”

Redi Long Mekim Kain Kain Wok

Yu mas redi long mekim kain kain wok na bai yu no hatwok tumas long kisim wok. Jaime, em yumi stori pinis long em, em i tok: “Ating yu no inap painim wanpela wok em yu bai amamas long olgeta samting bilong en. Yu mas lain long mekim tasol ol wok em yu no amamas tumas long mekim.”

Bilong redi long mekim kain kain wok, ating yu mas daunim tingting kranki yu gat long sampela wok. Tingim Ericka husat i stap long Meksiko. Em i bin kisim skul long kamap seketeri, tasol pastaim em i no inap painim wanpela wok em i laikim. Em i tok: “Mi lain long redi long mekim kain kain wok. Inap liklik taim mi wok long wanpela stua. Mi salim kaikai tu long rot na klinim ol haus. Bihain, mi kisim wok mi bin lain long mekim.”

Taim Mary, em yumi stori pinis long em, i lusim wok bilong em olsem kuskus, em tu i luksave olsem em i mas redi long mekim kain kain wok. Em i tok: “Mi no strong strong long mi mas painim wankain wok olsem bipo mi bin mekim. Taim mi harim olsem i gat wok long sampela kampani, mi ringim o go lukim ol, maski sapos em wanpela wok sampela inap ting em wok i no gat nem. Olsem na mi inap kisim wok na lukautim tupela pikinini bilong mi.”

Wokim Gutpela CV

Ol man i laik kisim wok olsem maneja samting, ol i mas wokim na tilim long ol kampani wanpela gutpela CV. Tasol maski yu wok long painim wanem kain wok, gutpela CV inap helpim yu tru. Nigel, em man bilong helpim ol man long painim wok long Australia, em i tok: “CV i toksave long ol kampani samting long yu husat, na yu bin mekim wanem kain wok, na yu inap mekim wanem bilong helpim kampani.”

Olsem wanem yu inap wokim wanpela CV? Raitim nem, atres, telefon namba, na E-meil atres bilong yu. Raitim wok yu laik mekim. Stori long ol skul yu bin go long en, kamapim klia save yu gat bilong mekim dispela wok yu wok long painim. Stori long ol wok yu bin mekim long bipo. Kolim ol samting yu bin mekim, na tu, ol mak yu bin winim na ol gutpela samting yu bin mekim bilong helpim kampani bipo yu wok long en. Kamapim tu ol samting bilong wok bipo yu bin mekim em dispela i soim olsem yu winim mak bilong mekim dispela wok nau yu laik kisim. Kolim sampela pasin bilong yu yet, na ol samting yu amamas long mekim. Ol kampani i gat narapela narapela wok, olsem na ating yu mas senisim sampela tok bilong CV bilong yu bambai em i stret long wan wan kampani.

Yu ting yu mas wokim CV taim yu painim wok long namba wan taim? Yes, yu mas wokim! Ating yu bin kisim save long mekim planti samting. Olsem wanem? Yu save amamas long mekim sampela wok olsem wokim ol samting long timba o fiksim ol ka? Yu ken raitim ol dispela samting. Yu bin mekim sampela wok volantia? Raitim ol wok volantia yu bin mekim na ol mak yu bin winim.​—⁠Lukim blok “CV Bilong Man i No Gat Ekspiriens Long Wok.”

Sapos i no gat rot long yu kisim wanpela inteviu, orait lusim wanpela pepa i gat nem, atres, telefon namba, na E-meil atres bilong yu, na sotpela tok long ol wok yu inap mekim na ol samting yu mekim pinis. Tilim dispela pepa i go long ol man husat inap helpim yu long painim wok, askim ol long givim dispela pepa long ol kampani samting i gat dispela kain wok yu wok long painim. Taim wanpela bos i lukim dispela pepa, ating em bai laik inteviuim yu​—⁠na ating yu inap kisim wok!

Taim yu redim wanpela CV, dispela bai helpim yu long pilim olsem yu bosim i stap bilong yu taim yu wok long painim wok. Nigel, em yumi stori pinis long em, em i tok: “Taim yu raitim CV, dispela i helpim yu long bungim gut ol tingting bilong yu na ol mak yu laik winim. Em i strongim tu tingting bilong yu na i helpim yu long redi long ol askim ol inap kamapim taim ol i inteviuim yu.”​—⁠Lukim blok long pes 7.

Redi Gut Long Inteviu

Yu mas mekim wanem bilong redi long inteviu? Yu ken painim sampela save long dispela kampani yu gat laik long wok long en. Taim yu save long sampela samting bilong kampani, man i inteviuim yu bai kisim gutpela tingting long yu. Na tu, save yu kisim long kampani bai helpim yu long save dispela kampani i gat kain wok yu laik mekim o long yu gat laik long wok long kain kampani olsem.

Orait nau tingim ol klos yu bai werim long inteviu. Sapos wok yu painim i sampela kain wok leba, werim ol klos i stret long dispela na i klin. Sapos ol klos i klin na yu komim gut gras, bos inap luksave olsem yu gat gutpela tingting long yu yet, olsem na ating bai yu gat gutpela tingting long wok bilong yu tu. Sapos yu laik wok long wanpela ofis, werim ol klos i stret long ol lain i wok long ofis long hap yu sindaun long en. Nigel i tok: “Paslain tru long yu go long inteviu, makim ol klos yu bai werim na bai yu no pilim olsem yu mas hariap hariap bilong redi na dispela bai givim presa long yu paslain long inteviu.”

Nigel i tok em i gutpela long kamap long inteviu 15 minit paslain long taim bilong mekim inteviu. Tasol no ken kam paslain tumas. Sapos yu kam leit, dispela i nogut tru. Ol saveman i tok, 3-pela seken long kirap bilong inteviu i bikpela samting. Insait long dispela sotpela haptaim, man i mekim inteviu bai skelim lukluk na pasin bilong yu na dispela i stiaim tingting em i kisim long yu. Sapos yu kam leit, man i mekim inteviu bai i no amamas long yu. Tingim, yu no gat namba tu sans bilong stretim tingting dispela man i kisim long yu long pastaim.

Tingim tu olsem man i inteviuim yu em i no birua bilong yu. Ating em tu i bin putim aplikesen bilong kisim wok bilong em, olsem na em i save long yu pilim olsem wanem. Em tu inap tingting planti, nogut em i bin kisim liklik trening tasol o i no bin kisim trening long pasin bilong mekim inteviu. Na tu, sapos man bilong mekim inteviu em bos bilong kampani, kampani inap kisim hevi sapos em i givim wok long man i no mekim gut wok.

Olsem na smail na sekanim gut man i mekim inteviu. Long taim bilong inteviu, tingting long ol samting kampani i laik yu bai mekim na long ol wok samting yu inap mekim. Nigel i stori long ol samting yu no ken mekim, olsem: “No ken meknais nabaut o sanap o sindaun krungut​—⁠taim yu sindaun stret dispela i soim olsem yu bilip long yu yet. No ken toktok olsem yu save toktok long ol pren bilong yu o mekim planti tok, na no ken mekim ol tok nogut. No ken sutim sampela tok long bos na ol wanwok bilong yu long bipo​—⁠sapos yu mekim kain tok olsem, man i mekim inteviu inap ting yu bai mekim ol kain tok olsem long dispela wok tu.”

Ol saveman i stori long ol samting i gutpela long mekim na toktok long en long taim bilong inteviu, olsem: Lukluk gut long man i mekim inteviu, na taim yu toktok, wokim han samting olsem yu save mekim long olgeta taim, na kolim klia ol tok. Mekim sotpela tok na tok tru taim yu bekim ol askim, na mekim sampela askim i stret long kampani na long dispela wok yu laik kisim. Taim inteviu i pinis na yu gat laik yet long kisim dispela wok, orait askim stret long kisim wok. Dispela bai soim olsem yu gat laik tru long mekim dispela wok.

Taim yu bihainim ol tok i stap antap, ating yu inap kisim wok hariap. Sapos olsem, orait yu ken mekim wanem bilong holim dispela wok?

[Futnot]

[Blok/Piksa long pes 6]

CV Bilong Man i No Gat Ekspiriens Long Wok

Nem Bilong Yu:

Atres Bilong Yu:

Telefon Namba na E-meil Atres Bilong Yu:

Wok Yu Laik Mekim: Wanpela wok ol nupela man inap mekim.

Skul: Greduet long (raitim nem bilong skul) Haiskul, long 2004.

Ol Kos: Lainim ol tok ples, matematiks, yusim kompiuta, wokim ol samting long timba.

Ol Samting Mi Gat Save Long Mekim: Mi inap mekim gutpela wok long han bilong mi. Planti taim mi fiksim ka bilong mipela. Mi yusim timba long wokim ol sia na tebol long woksop bilong mipela long haus. Amamas long yusim save bilong mi long matematiks taim mi wokim ol tebol samting. Wokim rup bilong wanpela haus long wanpela wok volantia. Mi gat save long ol kompiuta na mi amamas long lainim ol nupela kompiuta program.

Ol Samting Bilong Mi Yet: Mi save go long lotu. Mi save mekim wok volantia long komiuniti na mi amamas long helpim ol lapun. Mi amamas long pilai volibal, na fiksim ol ka na wokim ol samting long timba.

Ol Referens: Yupela inap kisim ol referens sapos yupela i laikim.b

[Futnot]

[Blok/Piksa long pes 7]

Ol Askim Ol Inap Mekim Long Inteviu

❑ Bilong wanem yu aplai long dispela wok?

❑ Bilong wanem yu laik wok long dispela kampani?

❑ Yu gat wanem save long dispela wok o kampani?

❑ Yu bin mekim dispela kain wok long bipo?

❑ Yu inap mekim wok long wanem kain masin?

❑ Yu gat wanem kain ekspiriens long mekim dispela kain wok?

❑ Yu gat wanem save em inap helpim yu long mekim dispela wok?

❑ Stori long yu yet.

❑ Yu inap wok taim i gat presa long mekim planti wok?

❑ Bilong wanem yu lusim wok bipo yu bin mekim?

❑ Bilong wanem yu no bin i gat wok inap longpela taim?

❑ Bos bilong yu long bipo i gat wanem tingting long yu?

❑ Long wok yu bin holim bipo, inap hamas de yu no bin go long wok?

❑ Yu tingting long mekim wanem samting long bihain?

❑ Wanem taim yu redi long kirap mekim dispela wok?

❑ Yu save gut long mekim wanem ol samting?

[Blok/Piksa long pes 9]

Ol Narapela Wok Yu Inap Mekim

❑ Mekim wok bebisita o hausmeri

❑ Salim gaden kaikai o ol plaua

❑ Samapim ol klos

❑ Wokim skon na kukim kaikai

❑ Wokim bilum, basket, mat, sospen graun, na ol kain samting olsem

❑ Yusim kompiuta bilong mekim sampela ofis wok long haus

❑ Rentim rum o haus bilong yu i go long narapela man

❑ Wasim ol ka

❑ Klinim ol stua, ofis, na ol haus

❑ Stretim na wokim gut ol samting i bagarap long haus bilong ol man (sampela buk long laibreri bai helpim yu long kisim save long dispela wok)

❑ Kain wok olsem wokim kabot, dua, veranda, penim haus, samapim morota, o wokim banis samting

❑ Klinim kopi gaden o kakau gaden bilong ol man

❑ Lukautim ol plaua long ol ofis, beng, na hotel samting

❑ Kisim ol niuspepa na salim long ol man long rot

❑ Katim gras, planim na lukautim ol plaua, salim paiawut

❑ Kisim piksa bilong ol manmeri

❑ Yu ken putim toksave bilong sampela wok olsem long niuspepa o long notisbot bilong ol bikpela stua (dispela i no gat pe o i gat liklik pe tasol)

[Sat/Piksa long pes 5]

WOK

Redi gut long inteviu

Wokim gutpela CV

Redi long mekim kain kain wok

Painim ol wok ol i no edvetaisim

Makim ol samting yu bai mekim

[Piksa long pes 7]

Bilong painim wok, yu mas wok strong na mekim gut wok painimaut

[Piksa long pes 8]

Taim yu stap long inteviu, mekim pasin olsem yu gat save long mekim wok