Ol Yangpela i Laik Save . . .

Olsem Wanem Mi Ken Kisim Sampela Mani?

“Mi laik kisim wanpela wok i gat bikpela pe bilong en.”​—Em tok bilong Tanya.

PLANTI yangpela i gat wankain tingting olsem Tanya. Wanpela manki, nem bilong em Sergio, em i tok: “Mi laik kisim mani bilong baim wanpela ka na bilong baim ol klos. Mi no laik kisim mani long papamama tasol bilong baim ol samting.” Yangpela Laurie-Ann i gat wankain tingting na em i save wok mani. Em i tok: “Mi wanpela meri na mi amamas long baim ol samting.”

Olsem na yumi no kirap nogut long tok bilong wanpela nius (U.S.News & World Report) i tok olsem: ‘Long olgeta 4-pela 4-pela yangpela long haiskul long Yunaitet Stets, 3-pela i save mekim liklik wok mani taim skul i pinis long apinun, na long ol Sarere Sande.’ Dispela i kamapim klia olsem, sampela i no gat stretpela tingting long pasin bilong “laikim tumas mani,” em pasin bilong planti man long nau. (1 Timoti 6:10) Tasol i no olgeta yangpela i laik kisim wok mani ol i pundaun long pasin bilong laikim tumas mani kago, nogat.

Baibel i tok: ‘Mani i save helpim yumi long taim nogut.’ (Saveman 7:12) Na ating i gat sampela gutpela as na wanpela yangpela Kristen olsem yu i laik mekim wok bilong kisim mani.a Tingim yangpela Avian. Em i stori long as na em i wok mani 2-pela de long olgeta wik, em i tok: ‘Dispela i save helpim mi bambai mi inap lukautim mi yet taim mi mekim wok painia oltaim.’

Ating long ol wankain as yu laik kisim wanpela liklik wok haptaim. Ating yu laik go long wanpela kibung Kristen, o yu laik kisim sampela klos i stret bilong putim long taim bilong ol miting Kristen. Orait, yu mas i gat mani bilong kisim ol dispela samting. Tru, Jisas i tok promis olsem God bai givim ol samting long man i wok pastaim long painim Kingdom bilong God. (Matyu 6:33) Tasol dispela i no makim olsem yu yet i no ken kirap na mekim wanpela samting, nogat. (Skelim wantaim Aposel 18:​1-3.) Orait, wanem sampela gutpela samting yu inap mekim sapos yu mas kisim sampela mani?

Kirap Painim Wok

Sapos papamama i orait long yu kisim liklik wok, namba wan samting yu inap mekim, em yu ken i go lukim ol man i sindaun klostu long yu, na ol tisa, na ol wanblut, na tokim ol olsem yu painim wok. Sapos yu sem long askim ol, orait yu inap askim ol long ol i bin mekim wanem kain wok taim ol i yangpela. Ating ol inap givim sampela gutpela tingting long yu. Sapos planti man i save yu laik painim wok, yu bai kisim planti helpim.

Bihain yu ken putim toksave long niuspepa, long notis-bot bilong ol stua, long skul bilong yu, na long ol narapela hap em planti man i save wokabaut long en. Yangpela Dave i tok: “Mi kisim wok mani bilong mi long dispela rot. Mi lukim niuspepa, na long rot bilong masin feks mi salim toksave long ol samting bilong mi yet na ol wok mi bin mekim, na bihain mi telefon long ol.” Tasol planti wok mani i no gat toksave i kamap long ol niuspepa samting. Olsem wanem? Yu bin save long dispela samting? Nius Seventeen i tok, sampela man i skelim dispela samting na ol i tok, “long olgeta 10-pela 10-pela wok, i no gat 3-pela wok i go inap long taim man i stret long mekim dispela wok em i kam askim bos long wok.” Ating yu inap kirapim wanpela bos long ting i gutpela sapos em i ken painim wanpela wok bilong yu!

Tasol olsem wanem yu inap mekim olsem? Yu inap ting: ‘Mi no gat save long mekim wanpela wok.’ Orait, tingting gen. Olsem wanem? Yu bin lukautim wanpela liklik brata o susa bilong yu taim papamama i no stap o yu bin lukautim pikinini bilong sampela man na ol i baim yu? Sapos olsem, dispela i kamapim klia olsem yu inap holim wanpela wok. Olsem wanem? Yu bin helpim papa long stretim ka? Sapos olsem, ating dispela i makim olsem yu inap mekim wok mekenik. Olsem wanem? Yu save long paitim taipraita o mekim wok long kompyuta? O yu bin kisim bikpela mak long wanpela samting yu yet yu bin kamapim? Em ol gutpela samting bos i laik save long en na dispela inap kirapim tingting bilong em.

Na no ken lusim tingting long ol liklik wok bilong amamas yu save mekim long sampela taim. Olsem: Sapos yu save pilaim musik, orait go lukim papa bilong wanpela stua i save salim ol gita samting na askim em, em i laikim wokman o nogat. Yu gat laik long ol samting dispela kain stua i save salim, na yu gat save long bekim askim bilong ol man i kam baim gita samting.

Taim Yu Laik Kisim Wok

Orait, yumi ken ting olsem yu pasim tok pinis long go toktok wantaim wanpela bos. Tingim gut bilas bilong yu, long wanem, bilas inap givim tingting long bos. Bilas bilong yu inap makim olsem yu man bilong “holim gut wok, na mekim gut wok, na stretim gut ol samting”​—⁠o pasin bilong yu i narapela kain. Tok bilong Baibel i stret taim em i kirapim ol meri Kristen long “putim ol gutpela klos samting, inap tasol long ol.” (1 Timoti 2:⁠9) Dispela tok i stret long ol man tu. Taim yu go toktok wantaim wanpela bos, maski em wanem kain wok yu laik kisim, yu no ken pasim ol nupela kain klos i bilong pulim ai bilong ol man, o ol klos i bikpela tumas long skin.

Na tingting na pasin bilong yu i bikpela samting. Bihainim lo bilong Krais, olsem: Mekim long ol narapela olsem yu laik bai ol i mekim long yu. (Matyu 7:12) Kamap long taim stret bilong toktok wantaim bos. Yu mas amamas na no ken mekim olsem yu laik slip. Mekim tok long gutpela pasin. Tokim em olsem i gat wanem as na yu ting save bilong yu em inap long mekim dispela wok, tasol no ken hambak o bilasim tok bilong yu. Tok klia na bos i ken pilim tok bilong yu.

Sampela saveman i tok, em i gutpela sapos yu kisim pepa i go wantaim yu (o salim paslain long taim yu laik i go), em pepa yu bin raitim gut na stret sampela samting long en. Long pepa yu mas raitim nem bilong yu, atres, namba bilong telefon, kain wok yu laik kisim, skul yu bin kisim (sampela kos tu sapos yu bin kisim), olgeta wok yu bin mekim bipo (maski man i baim yu o yu wok volantia), save bilong yu long mekim wanpela kain wok, ol samting yu save laikim na ol liklik wok bilong amamas yu save mekim (ating dispela bai helpim bos long save yu inap mekim wanem kain wok), na yu ken raitim tok olsem, sapos bos i laik save long sampela man ol i save gut long yu na long wok yu inap mekim, orait yu bai toksave long em sapos em i laik. Na yu ken redim narapela pepa i gat nem na atres na namba bilong telefon bilong sampela man em ol inap tokaut olsem yu gutpela man bilong kisim dispela wok. Tasol yu no ken mekim nating; yu mas kisim tok orait long ol pastaim. Ating sampela kain man olsem, em ol olpela bos bilong yu, wanpela tisa, wanpela bikman bilong skul, o wanpela pren i bikpela long yu​—⁠olsem wanpela man em inap tokaut long save bilong yu long mekim wok o tokaut long pasin bilong yu.

Kirapim Wok Bilong Yu Yet

Tasol olsem wanem sapos yu bin wok strong tasol yu no inap painim wok? Dispela samting i save kamap long planti kantri. Tasol yu no ken bel hevi. Sapos yu kirapim bisnis bilong yu yet ating dispela em wanpela rot bilong helpim yu. Wanem ol gutpela samting inap kamap long dispela? Ating yu inap makim taim bilong yu long wok, na long laik bilong yu yet yu ken mekim liklik wok o bikpela wok. Tasol sapos yu kirapim wanpela bisnis bilong yu yet, orait bel bilong yu i mas kirapim yu long wok, na yu mas bosim gut skin, na yu yet yu mas kirap na mekim ol samting.

Tasol yu inap kirapim wanem kain bisnis? Orait, tingim hap yu sindaun long en. Olsem wanem? I gat sampela samting ol man i mas kisim na i no gat narapela i save mekim dispela wok? Olsem: Sapos yu save laikim ol animal, yu ken askim ol man i gat dok samting long baim yu bilong wasim dok o kain samting olsem. O olsem wanem sapos yu save pilaim musik? Yu inap skulim ol narapela long dispela musik? O ating yu inap mekim wanpela wok ol narapela i no gat laik long mekim, olsem wasim ol windo o klinim banis samting. Wanpela Kristen i no save sem long mekim wok long han bilong em. (Efesus 4:28) O ating yu inap traim long lain long mekim narapela wok. Go long ol haus buk bilong kisim ol buk i stori long olsem wanem yu ken mekim sampela kain wok, o askim wanpela pren long skulim yu long mekim. Yangpela Joshua em i bin skul long mekim ol naispela rait. Bihain em i kirapim wanpela liklik bisnis i wokim ol kat bilong singautim ol man i kam long marit o pati.​—⁠Lukim blok “Ol Wok Yu Inap Kirapim.”

Tasol was gut. No ken hariap long kirapim wanpela bisnis na yu no bin skelim yet hamas mani yu mas tromoi long en o ol narapela samting bilong en. (Luk 14:​28-30) Pastaim yu mas toktok wantaim papamama. Na toktok wantaim ol narapela i gat wankain bisnis olsem yu laik kirapim. Olsem wanem? Yu mas tromoi takis long dispela wok? Yu mas kisim laisens o ol pepa bilong kirapim dispela bisnis? Askim ol bikman bilong taun long dispela samting.​—⁠Rom 13:​1-7.

Tingting Gut!

Tru, sampela hevi inap kamap sapos yu kisim planti wok tumas, winim skel bilong yu. Laurie-Ann i stori long sampela yangpela i wok mani, olsem: “Ol i no save mekim planti homwok, na skin bilong ol i les olgeta, olsem na ol i no inap putim gut tingting long ol samting i kamap long klas.” Tru, long sampela kantri ol yangpela i mas wok planti aua bilong helpim famili bilong ol long painim kaikai samting. Tasol sapos yu no gat dispela kain sindaun, bilong wanem yu laik putim bikpela hevi long skin bilong yu? Sampela saveman i tok, sapos ol skulmanki i winim 20 aua long olgeta wik long mekim wok mani, em planti aua tumas na dispela i no inap kamapim gutpela samting. Sampela i tok, mobeta ol i no winim 8-pela i go inap 10-pela aua long olgeta wik long mekim wok.

Sapos yu tromoi bikpela hap taim, na strong, na tingting bilong yu long wanpela wok mani taim skul i pinis long apinun, sik inap painim yu, na yu inap lus long kisim ol bikpela mak long skul, na bikpela samting moa, yu inap slek long ol samting bilong spirit. Tru tumas, i no ol bikpela manmeri tasol i bin pundaun long ‘bungim planti mani na kain kain samting.’ (Mak 4:19) Olsem na yu mas tingting gut. Solomon i toksave long pasin bilong mekim planti wok tumas, em i tok: “Mobeta yumi gat liklik samting tasol na yumi bel isi. Nogut yumi mekim planti wok oltaim, olsem man i ran i go bilong holimpas win.”​—⁠Saveman 4:⁠6.

Tru, ating yu mas wok mani. Na sapos tingting bilong yu i stret na gutpela long dispela samting, olsem Avian, em pastaim yumi stori long em, orait yu ken save Jehova bai blesim wok bilong yu. Tasol nogut dispela wok i mekim na yu lusim tingting long “skelim gut olgeta pasin,” olsem skelim wanem ol samting i bikpela samting tru​—⁠em ol samting bilong spirit. (Filipai 1:10) Tru, mani inap ‘helpim yu long taim nogut,’ tasol sapos yu stap pren bilong God, olgeta samting yu mekim bai i kamap gutpela tasol.​—⁠Saveman 7:12; Song 91:⁠14.

[Futnot]

[Blok long pes 20]

Ol Wok Yu Inap Kirapim

• Wasim ol windo

• Salim ol niuspepa bilong man i ken baim

• Lukautim ol plaua samting long banis bilong man o katim gras

• Lukautim pikinini bilong ol man

• Wasim skin bilong dok, o givim kaikai long en, o kisim em i go wokabaut

• Polisim su bilong ol man

• Stretim ol brukpela klos o ainim

• Wokim gaden na maketim kaikai

• Lukautim ol kakaruk o salim kiau

• Paitim taipraita o mekim wok long kompyuta

• Go long stua samting na baim sampela samting bilong ol man na karim i go bek long haus, na ol kain liklik wok olsem

• Skulim wanpela long musik o narapela samting

[Piksa long pes 19]

Sapos yu mekim planti wok tumas, yu no inap kisim bikpela mak long skul