Ol Yangpela i Laik Save . . .

Olsem Wanem Mi Ken Redi Long Mekim Wok Mani?

OL I BIN askim wanpela yangpela meri i gat 16 krismas, em Morin, em i ting olsem wanem long mekim wok mani, na em i tok, “Mi pret na mi amamas wantaim! ” Ating yumi olgeta i save pilim olsem taim yumi tingting long kisim wok mani. Taim yangpela man Rene i laik lusim skul, em i tok: “Mi winim 12-pela yia nau long skul na mi pilim olsem em i bin putim bikpela hevi long mi, olsem na bai mi amamas long kisim wok mani.”

Maski yu gat wanem kain tingting long nau, ating bihain bai yu mekim wanpela kain wok mani. Olsem wanem yu ken redi bilong mekim wok mani? Taim yu stap yet long skul dispela bai helpim yu. Olsem: Yu lain long kamap kwiktaim long skul. Na sampela yangpela, taim ol i skul yet ol i save wok hap taim long wanpela wok mani. Tasol bilong redi gut long mekim wok mani, yu mas tingim gut wanem ol samting yu laik lainim long skul.

Kisim Stretpela Tingting Long Wok Mani

Pastaim yu mas skelim, yu laik kisim wanem ol samting taim yu mekim wok mani? Sampela yangpela ol i tingting tasol long kisim mani olsem pe bilong ol. Tru, “mani . . . i save helpim yumi long taim nogut” na em i olsem wanpela samting bilong helpim yumi. (Saveman 7:12) Tasol Baibel i tok stret: “Maski yu yet yu gat planti samting moa, tasol yu no inap kisim laip long ol dispela samting bilong yu.” (Luk 12:15) Wanpela buk (Yes​—I Can! em Barkai, Barkai na Yeo i raitim) i tok: “Yu no ken tingting tasol long kisim bikpela mani long wok mani bilong yu. Nogat. Bikpela samting tu, em yu mas amamas long mekim wok mani bilong yu.” Yangpela man Polo em i gat stretpela tingting long dispela samting na em i tok: “Mi laik kisim wok mani mi ken amamas long en na kisim ol samting inap long skel bilong mi, em tasol.”

Tasol sapos yu wanpela Kristen, i gat sampela samting moa yu mas tingim. Maski yu amamas tru long wok mani, dispela wok mani i no inap amamasim yu long ol samting bilong spirit. Baibel i tok, “namba wan samting long laip bilong yumi man i olsem: Yumi mas aninit long God tasol na bihainim ol lo bilong em.” (Saveman 12:13) God i putim lo long ol Kristen olsem: Ol i mas “mekim olgeta lain manmeri i kamap disaipel,” olsem na planti yangpela bilong ol Witnes Bilong Jehova ol i tingting long mekim dispela wok olsem wok painia. (Matyu 28:​19, 20) Wanpela yangpela meri bilong Saut Afrika, em Sulamait, em i bihainim dispela tingting, na em i tok, em i “kisim bikpela amamas long helpim ol narapela man long ol samting bilong spirit.”

Ating yu tu yu gat laik long mekim wok autim tok long olgeta taim, a? Tasol ating yu mas mekim liklik wok mani tu bilong lukautim yu yet long ol samting bilong skin. Na ating bihain bai yu marit na kisim pikinini, na yu mas lukautim ol long samting bilong skin. O ating i gat wanpela samting i pasim yu na yu no inap mekim wok painia, olsem na yu mas mekim wok mani oltaim. Maski wanem samting i kamap, ating yu laik painim wanpela wok mani i no ken pasim yu tumas long mekim wok bilong God, a? Orait, yu mas tingim gut ol samting yu lain long en long skul na bai dispela i ken helpim yu long mekim olsem.

Lainim Ol Samting Inap Helpim Yu Long Bihain

Long sampela kantri ol yangpela i ken makim ol samting ol i laik lain long en long skul. Olsem: Samting bilong ol akaun, o wok bisnis, o samting ol i wokim long han olsem ol i mekim long skul vokesenel. Pastaim i gutpela sapos yu skelim gut wanem kain wok mani yu inap kisim long ples bilong yu yet, nogut yu lain long wanpela samting long skul na i no gat dispela kain wok mani long hap bilong yu. Yu ken wokim wanpela lista long ol samting yu laik mekim na yu save mekim gut, olsem: Yu save gut long bungim ol namba? Yu save gut long kompyuta o mekim wok mekenik? Dispela lista bai helpim yu long tingim wanem kain wok i gutpela long yu na wanem wok yu mas lain long en long skul. Sapos yu toktok wantaim papamama o ol narapela man i gat gutpela tingting na save, ating ol inap helpim yu long save, yu inap tru long mekim dispela wok o nogat.​—Sindaun 15:22.

Olsem: Yu save amamas long bung wantaim ol narapela man? Sapos olsem, orait, yu ken lain long ol samting inap helpim yu long mekim wok olsem raun long ol kampani na salim ol samting. O sapos yu save gut long mekim wok long han bilong yu, orait, yu ken go long wanpela skul vokesenel na lain long mekim kain wok olsem. Planti painia i lukautim ol yet long samting bilong skin long rot bilong ol samting ol i bin lain long en long hai-skul. Sampela ol i painim wok mani haptaim long mekim wok leba, o stretim ol samting i wok long paua, o wok kamda, o samapim laplap, o wok long kompyuta, o mekim wok kuskus long ofis.

Yangpela meri Damaris, bilong Kolombia long Saut Amerika, em i lain long taipraita na long ol akaun taim em i skul, na dispela i helpim em taim em i lusim skul. Em inap kisim wok olsem seketeri long wanpela ofis na em i wok hap de long ol wan wan de long dispela wok na bihain em i mekim wok long autim tok bilong Baibel. Sampela Kristen i mekim wok bilong klinim haus samting o ol i wok gaden samting na ol inap kisim skel bilong ol long samting bilong skin.

Olsem Wanem Sapos i No Gat Planti Wok Yu Ken Lain Long Mekim?

I no olgeta skul i save lainim ol sumatin long kisim ol gutpela wok bihain, na sampela skul i no save lainim gut ol sumatin long rit rait. Olsem na ating ol i mas go long narapela skul samting. Yu inap mekim wanpela kos inap sotpela taim tasol bambai yu inap kisim wok mani. Sampela ol i bin mekim olsem na ol i no lusim wok painia bilong ol.

Ating ol yangpela i stap long sampela kantri bai i hatwok long mekim kos olsem o lain long mekim wanpela wok. Wanpela yangpela man bilong wanpela liklik taun long bus bilong Afrika, nem bilong em Katiti, em i hatwok tru long wanem, ol tisa yet i makim ol samting em i mas lain long en, olsem na em i lainim tok ples Rom, na em i lain long ol namba, na saiens, tasol em i save, dispela i no inap helpim em long kisim wanpela wok mani long ples. Tasol bihain Katiti i bin painim wanpela wok. Olsem wanem na em i kisim wok mani? Em i mekim wok long save em i bin kisim long skul bilong helpim em long wokim ol samting long ples. Taim em i lusim skul, em i wokim gaden na wokim ol laplap long gras bilong bulmakau samting na em i maket long en, na tu, em i gat laisens long baim marasin i go long ol man long bus. Long skul em i lain gut long toktok na harim gut tok bilong narapela, na dispela save i helpim em long mekim kain wok olsem.

Wanpela buk (Choosing Your Career and Your Higher Education) i tok, long ples wok yu mas ‘toktok gut wantaim ol narapela, na pilim ol tingting bilong ol, na ol tu i mas save gut long yu.’ Long skul yu mas lain gut long rait, na long pasin bilong toktok, na long putim gut yau long harim tok bilong ol narapela man. Sapos yu go painim wanpela wok mani na yu inap toktok gut wantaim bos bilong dispela wok, ating yu inap kisim dispela wok. Planti yangpela Witnes Bilong Jehova i lain long toktok gut taim ol i insait long Skul Bilong Wok Autim Tok long kongrigesen Kristen bilong ol.

Lusim Sampela Samting

Wanpela buk (Your Child at School) i tok: ‘Olgeta man i narapela narapela kain.’ Sampela yangpela i save gut long wokim ol samting long han bilong ol na ol narapela i gat save long ol namba samting. Na sampela i gat save long lainim ol samting olsem musik, o wokim piksa, o pilai spot samting. Sapos Kristen i lain na wokim ol dispela samting olsem wok mani bilong em, em i gutpela, tasol nogut dispela laik bilong kisim bikpela mani na bikpela nem i pasim em long ol samting bilong spirit. Na tu dispela kain wok inap pasim yu na yu no gat bikpela hap taim bilong mekim ol wok Kristen, olsem go long ol miting na autim tok. Olsem na yu ting i gutpela sapos yu lusim planti yia na lain gut long ol dispela samting tasol, dispela i pasim yu long ol samting bilong spirit?​—1 Korin 7:29.

Yangpela Witnes, em Filip, em i bin makim pilai tenis olsem wanpela wok mani em i laik holim. Tasol em i tok: “Mi lukim olsem i no gat bikpela hap taim bilong mekim gut pilai tenis bilong mi na mekim ol samting bilong wok Kristen wantaim, olsem na mi mas skelim wanem samting em i bikpela samting​—pilai tenis o wok Kristen. Mi bin lusim pilai tenis, maski long dispela taim i hatwok tru long lusim, tasol mi amamas mi bin mekim olsem.”

Aposel Pol i bin mekim wankain samting tu. Em i bin skul long ol lo bilong lotu Juda, tasol em i lusim na em i kirap mekim wok bilong autim tok. Bilong lukautim em yet long ol samting bilong skin em i bin samapim ol haus sel. (Aposel 18:3; 22:3) Pol i no bin tingting planti long samting em i mekim. Em i tok: “Sapos mi bihainim rot bilong dispela ol samting bilong bodi, orait mi bai winim tru ol arapela man. Tasol mi lukim olgeta dispela samting i olsem samting nating, na mi bihainim rot bilong Krais. . . . Mi save long Krais Jisas, em i Bikpela bilong mi, na mi lukim dispela save tasol em i samting tru, na olgeta gutpela samting bilong dispela graun ol i olsem pipia nating. Mi laik . . . holimpas Krais.”​—Filipai 3:​7, 8.

Ating dispela bai kirapim yu tu long mekim wankain samting olsem aposel Pol. Bai yu wok strong long givim bel long ol samting bilong spirit, na ol wok bilong skin ating bai i stap namba 2 long sindaun bilong yu. Sapos olsem ating yu mas lain long wanpela wok em planti manmeri i no laik mekim. Ating wanpela yangpela inap lain long wanpela kain wok sapos em i wok wantaim papa bilong em, olsem wok kamda, o wok plama, o narapela wok.

Olsem na wanem wanem samting yu ting bai yu mekim, gutpela sapos yu tingting long i stap bilong yu long bihain. Makim gut ol kos samting bai yu mekim long skul na tingim God em inap helpim yu long redi gut long ol samting yu laik mekim taim yu kisim wok mani!

[Piksa long pes 26]

Planti ol i lukautim ol yet long samting bilong skin long wanem ol i bin lain gut long skul