Yupela Mas Skul Gut
1 Maski sampela hatwok na hevi i painim ol yangpela long skul, i gat planti gutpela samting tu ol yangpela inap kisim sapos ol i givim bel na skul gut.
2 Sapos man i skul gut inap sampela yia, dispela inap helpim em long kamap strong long ol samting bilong spirit. Ol samting man i mekim taim em i yangpela yet dispela inap helpim em long mekim gut ol samting taim em i bikpela pinis. Long ol samting bilong skul tu, ‘man i planim pikinini bilong wanem kain kaikai, em dispela kain kaikai tasol bai i kamap long gaden bilong em.’ (Ga 6:7) Ol yangpela i save wok strong long kisim gutpela save long skul, ol bai kisim save long ol samting em inap helpim ol long mekim bikpela wok moa bilong Jehova.
3 Bilong makim stret ol samting yu laik skul moa long en, yu mas tingting gut pastaim. Ol papamama i mas helpim ol pikinini long makim gut ol klas bilong skul em inap helpim gut ol long mekim ol wok bilong spirit long bihain. Taim ol i lain gut long ol samting, dispela bai helpim ol long mekim sampela wok na ol i ken lukautim ol yet taim ol i mekim wok painia. Skul ol i kisim i mas helpim ol long litimapim nem bilong Jehova, maski ol i mekim wanem wanem wok bilong spirit.
4 Yupela ol yangpela, taim yupela i stap long skul yupela i mas wok strong long kisim save. Taim yupela i mekim olsem, tingting long mekim ol gutpela wok holi bilong Jehova, na maski long wok strong bilong holim ol wok bilong dispela graun i gat namba. Wok strong long bihainim laik bilong Jehova long i stap bilong yupela. Long dispela rot, olgeta samting yupela i mekim bai kamap gutpela na i litimapim nem bilong Jehova.—Sng 1:3.