Ol Yangpela i Laik Save
I Stret Mi Lusim Skul?
Yu ting yu mas lusim skul long wanem gret?
․․․․․
Papamama bilong yu i laik bai yu lusim skul long wanem gret?
․․․․․
BEKIM yu kamapim long dispela tupela askim long antap ol i wankain o nogat? Maski sapos bekim bilong tupela i wankain na yu stap yet long skul, ating sampela taim yu laik tru long lusim skul. Ating bai yu wanbel long ol dispela tok em sampela yangpela i mekim.
● “Sampela taim mi save pilim les tru na mi no laik kirap long slip long moningtaim. Mi save tingting olsem, ‘Wai bai mi go long skul na lainim ol samting we mi no inap mekim wok long en?’ ”—Rachel.
● “Planti taim mi les long skul na mi laik lusim na kisim wanpela wok. Mi pilim olsem mi no lainim wanpela samting long skul, mobeta mi mekim wanpela wok we ol bai baim mi long en.”—John.
● “Long olgeta de, mi save lusim 4-pela aua bilong mekim ol homwok! Planti tumas asainmen, ol projek, na tes, i daunim mi tru. Olsem na mi pilim olsem mi no inap moa long mekim ol dispela samting na mi laik lusim skul.”—Cindy.
● “Long skul ol i tok olsem i gat bom, na inap 3-pela taim sampela i bin laik kilim ol yet i dai, na wanpela i bin mekim tru tru, na i gat ol geng i save pait insait long skul. Sampela taim hevi i go bikpela tumas na mi laik lusim skul!”—Rose.
Olsem wanem? Yu bungim ol wankain hevi? Sapos olsem, wanem samting stret i mekim na yu laik lusim skul?
․․․․․
Ating nau yu tingting strong long lusim skul. Tasol olsem wanem bai yu save sapos nau em taim bilong yu long lusim skul o yu les pinis long skul na yu laik lusim nating skul?
Yu Ting i Gutpela Long Lusim Skul?
Yu bin save tu olsem long sampela kantri, ol sumatin i ken grediuet long skul taim ol i skul pinis inap 5-pela o 8-pela yia? Long sampela narapela kantri ol sumatin i mas skul inap 10-pela yia i go 12-pela yia. Olsem na olgeta wan wan kantri i gat mak bilong ol yet long pikinini i mas i gat hamas krismas, na em i mas inapim wanem gret bilong pinisim skul.
Na tu, long sampela kantri, ol i save orait long ol sumatin i ken stap long haus na kisim sampela o olgeta kos na i no gat wok long i go long skul. I no olsem ol dispela sumatin i lusim skul, nogat. Papamama bilong ol i orait long ol i stap long haus na skul na papamama na ol pikinini i wok bung wantaim.
Tasol sapos yu tingting long lusim skul paslain long yu grediuet maski yu stap long haus na yu skul, o yu save go long skul, yu mas skelim ol dispela askim:
Lo i tok wanem? I no stret long lusim skul paslain long yu kamap long gret em lo i makim bilong pinisim skul. Sapos yu mekim olsem, em nau yu sakim tok bilong Baibel long stap “aninit long ol gavman.”—Rom 13:1.
Mi winim pinis ol mak mi putim? Yu bin putim wanem ol mak em yu laik bai skul i helpim yu long winim? Ating yu no save, a? Mobeta yu mas save! Sapos yu no save yet, orait yu wankain olsem wanpela pasindia i raun long tren na em i no makim yet wanem hap em i laik i go long en. Sapos i olsem, orait yu mas sindaun wantaim papamama bilong yu na bekim ol askim i stap aninit long het tok “Ol Mak Mi Laik Winim,” long pes 28. Sapos yu mekim olsem, dispela bai helpim yu long holim wanpela tingting tasol na helpim yu na papamama bilong yu long makim hamas yia yu mas stap long skul.—Sindaun 21:5.
Ating ol tisa na ol narapela bai tokim yu long hamas skul yu mas kisim. Tasol maski i olsem, papamama bilong yu tasol i gat namba long makim hamas skul yu mas kisim. (Sindaun 1:8; Kolosi 3:20) Sapos yu lusim skul paslain long yu inapim mak em yu na papamama bilong yu i putim, dispela i olsem yu lusim skul long laik bilong yu yet.
I gat wanem ol as na mi laik lusim skul? No ken giamanim yu yet. (Jeremaia 17:9) Em pasin bilong yumi ol man long ting olsem i gat gutpela risen long yumi mekim ol samting bilong inapim laik bilong yumi yet.—Jems 1:22.
Raitim sampela gutpela risen bilong yu long lusim skul paslain long yu grediuet.
․․․․․
Raitim sampela risen long yu laik lusim skul bilong inapim laik bilong yu yet.
․․․․․
Yu bin raitim wanem ol gutpela risen? Ating sampela bilong ol dispela risen em olsem: Yu laik helpim famili long sait bilong mani o yu laik mekim wok lotu bilong helpim ol narapela. Ol risen long sait bilong inapim laik bilong yu yet em olsem: Ating yu no laik mekim ol tes na ol homwok. Em i bikpela samting long yu mas skelim gut wanem samting tru i kirapim yu long kisim dispela laik bilong lusim skul—yu laik helpim ol narapela o yu laik inapim laik bilong yu yet?
Skelim gen lista bilong ol risen yu raitim na stat long putim namba long ol, kirap long namba 1 i go long namba 5 (namba 1 i makim risen i no bikpela samting tumas, na namba 5 i makim risen we i bikpela samting). Sapos yu lusim skul long wanem yu laik abrusim sampela hevi, orait yu bai kirap nogut long samting tru bai painim yu long bihain.
Bilong Wanem i No Gutpela Long Lusim Skul?
Sapos yu lusim skul, dispela i olsem yu kalap i go ausait long tren paslain long yu kamap long hap yu laik go long en. Ating yu kalap i go ausait long tren, long wanem, sampela sia bilong tren i bruk na ol pasindia i no gat pasin pren. Tasol sapos yu kalap i go ausait long tren, bai yu no kamap long hap yu laik go long en na ating yu bai kisim bikpela bagarap. Olsem tasol, sapos yu lusim skul, ating bai yu no inap winim ol mak yu laik winim long sait bilong ediukesen, na ating yu inap givim hevi long yu yet, olsem:
Ol hevi inap kamap Ating bai i hatwok tru long yu kisim wanpela wok, na maski sapos yu kisim wanpela wok, ating pe yu kisim bai aninit long pe yu inap kisim sapos yu pinisim gut skul. Bilong helpim sindaun bilong yu, ating yu mas wok planti aua moa long ol hap we i nogut moa winim hap yu skul long en.
Ol hevi inap kamap bihain Wok painimaut i soim olsem ol sumatin husat i hariap tumas long lusim skul, helt bilong ol bai i no gutpela tumas, ol bai kamapim pikinini taim ol i yangpela yet, go long kalabus, na ol i mas kisim helpim long ol narapela.
Tru, maski yu pinisim gut skul, dispela i no makim olsem bai yu abrusim ol dispela hevi. Tasol bilong wanem bai yu lusim nating skul na givim hevi long yu yet?
Gutpela Samting i Kamap Sapos Yu No Lusim Skul
Tru, ating yu feilim wanpela tes o sampela hevi i painim yu long skul, na dispela i mekim na yu tingting long lusim skul—ating yu ting hevi i painim yu long nau i bikpela moa winim hevi bai kamap bihain. Tasol paslain long yu tingting long lusim skul, tingim tok bilong ol sumatin em pastaim yumi bin stori long ol. Ol i stori long ol gutpela samting i bin painim ol, long wanem, ol i no bin lusim skul.
● “Mi kisim pasin bilong sanap strong na karim hevi na mi lain long strongim tingting. Mi lain tu olsem, sapos mi laik kisim amamas long wok mi mekim, orait mi yet i mas amamas long mekim dispela wok. Skul i redim mi long kisim wok long bihain.”—Rachel.
● “Nau mi save, sapos mi wok strong bai mi inap winim ol mak mi putim. Long haiskul mi kisim wanpela kos we inap helpim mi long kisim wok mi laik mekim, em mekenik bilong fiksim ol masin bilong prinim buk.”—John.
● “Skul i lainim mi long pasin bilong stretim ol hevi i kamap long klasrum o long narapela hap. Mi kisim save long wanem samting mi ken mekim bilong karim ol hevi bilong skul, ol samting mi mekim wantaim ol narapela na ol hevi bilong laip, na dispela i helpim mi long kamap bikpela long tingting.”—Cindy.
● “Skul i redim mi long karim ol hevi i save kamap long ples wok. Na tu, planti samting i kamap long skul i kirapim mi long skelim as bilong bilip bilong mi. Olsem na taim mi stap long skul, dispela i opim rot long bilip bilong mi i kamap strong moa.”—Rose.
Saveman King Solomon i tok: “Sapos man i kirapim wanpela wok, orait dispela i gutpela pasin. Tasol sapos em i pinisim dispela wok, orait dispela i win tru.” (Saveman 7:8) Olsem na yu no ken hariap long lusim skul, mobeta yu stap yet long skul na lain long karim ol hevi i painim yu. Sapos yu mekim olsem, bai yu kisim save olsem sindaun bilong yu long bihain bai gutpela moa.
Bilong lukim sampela stori moa long hap “Ol Yangpela i Laik Save” long tok Inglis, lukim Web-sait www.watchtower.org/ype
SAMTING BILONG TINGIM
● Ol mak bilong skul yu putim bilong winim insait long sotpela taim, olsem wanem dispela bai helpim yu long stap gut long skul?
● Bilong wanem em i bikpela samting long yu mas save long wanem kain wok yu laik mekim taim yu pinisim skul?
[Blok/ Ol Piksa long pes 27]
TOK BILONG OL WANLAIN
“Skul i helpim mi long kisim pasin bilong amamas long rit. Em gutpela samting long yu inap save long tingting na filings bilong wanpela long rot bilong ritim ol buk.”
“Mi no save makim gut taim bilong mekim ol samting. Sapos mi no bin go long skul, em bai hatwok moa. Skul i helpim mi long makim stret taim bilong mekim ol samting na inapim ol bikpela samting mi mas mekim.”
[Ol Piksa]
Esme
Christopher
[Blok long pes 28]
OL MAK MI LAIK WINIM
Wok bilong skul em bilong redim yu long kisim wanpela wok we bai helpim yu long lukautim yu na famili bilong yu yet long bihain. (2 Tesalonaika 3:10, 12) Olsem wanem? Yu makim pinis wanpela wok yu laik mekim na olsem wanem skul yu kisim bai redim yu long kisim dispela wok? Bilong helpim yu long save sapos skul yu kisim i stiaim yu stret long mak yu putim, bekim ol dispela askim:
Mi gutpela long wanem ol samting? (Olsem, yu save wok gut wantaim ol narapela? Yu save amamas long wokim na stretim ol samting? Yu save skelim na painimaut gut as bilong ol hevi?)
․․․․․
Wanem ol wok bai opim rot long mi inap mekim wok long save mi gat pinis?
․․․․․
Wanem ol wok i stap long hap bilong mi em mi inap mekim?
․․․․․
Mi kisim wanem ol kos we inap redim mi long kisim wanpela wok?
․․․․․
Wanem kain ol skul i stap we mi inap kisim na dispela bai helpim mi long winim ol mak mi putim?
․․․․․
Tingim, mak yu laik winim em olsem: Yu laik pinisim gut skul na kisim save em yu inap long yusim. Olsem na no ken stap tasol olsem wanpela sumatin—olsem sumatin husat i stap tasol long tren na i no laik mekim ol samting olsem man i bikpela pinis.
[Blok long pes 29]
TOK I GO LONG PAPAMAMA
“Ol tisa bilong mi ol i skin dai lain!” “Ol tisa i save givim mi planti homwok tumas!” “Mi save traim hat tru long kisim gutpela mak—wai na mi westim nating taim?” Kain ol samting olsem i mekim na sampela sumatin i tingting long lusim skul paslain long ol i kisim save em ol bai nidim long helpim sindaun bilong ol long bihain. Sapos pikinini man o pikinini meri bilong yu i tingting long lusim skul, yu ken mekim wanem?
Yu yet i bin i gat wanem tingting long ediukesen? Yu bin ting olsem yu westim nating taim bilong yu long skul? Yu pilim olsem yu stap kalabus na yu mas wet inap longpela taim bilong mekim samting yu amamas long en? Sapos olsem, ol pikinini bilong yu tu bai kisim wankain tingting olsem yu. Sapos pikinini i pinisim gut skul, em bai kisim “gutpela tingting na save”—em ol pasin em i mas i gat bilong helpim em taim em i kamap bikpela.—Sindaun 3:21.
Givim pikinini ol samting em i nidim. Sampela inap kisim gutpela mak long skul, tasol ol i no save long pasin bilong stadi—o ol i no gat gutpela hap bilong mekim stadi. Bilong redim gutpela hap bilong pikinini i ken stadi, tebol i no ken i gat planti samting tumas long en, na i mas i gat gutpela lait na dikseneri samting. Sapos yu mekim olsem, pikinini bai inap long stadi gut na tingim tingim ol nupela save em i kisim long skul. Dispela bai helpim em long mekim gut long skul na long sait bilong lotu.—1 Timoti 4:15.
Wok bung wantaim. Tingim olsem ol tisa na ol lain bilong givim skultok long ol sumatin, ol i stap olsem helpim bilong yu. Go bungim ol na kisim save long nem bilong ol. Toktok wantaim ol long ol mak em pikinini bilong yu i laik winim na ol samting em i painim hatwok long en. Sapos pikinini bilong yu i no kisim gutpela mak long skul, traim long painimaut as bilong dispela samting. Nogut em i pilim olsem sapos em i wokim gut long skul, ol narapela sumatin bai mekim nogut long em. O, nogut em i gat hevi wantaim wanpela tisa. Olsem wanem long ol kos em i kisim? Pikinini bilong yu i mas kisim helpim long kamap gutpela moa long kos em i mekim, na em i no ken pilim olsem dispela kos i hatwok tumas long em i mekim. Narapela samting tu we inap mekim na pikinini i no mekim gut long skul em olsem: Nogut em i gat hevi long ai na em i no inap lukluk gut o em i gat hevi long lain gut.
Sapos yu insait tru long wok bilong mekim bikpela long pikinini bilong yu, long sait bilong skul na long sait bilong lotu, orait dispela bai helpim gut pikinini bilong yu long bihain.—Sindaun 22:6.
[Piksa long pes 29]
Sapos yu lusim skul, dispela i olsem yu kalap i go ausait long tren paslain long yu kamap long hap yu laik go long en