Nius i Kam Long Olgeta Hap
Long Serbia, lain Ministry of Religious Affairs i orait long aplikesen bilong rejistaim wanpela koporesen i makim lain Witnes Bilong Jehova. Ol ripot bilong gavman i soim olsem ol Witnes Bilong Jehova i kirap mekim wok bilong ol long Serbia stat long 1930 samting.
Long 2009, ol man long olgeta hap bilong graun i daunloudim 95 pesen musik long kompiuta, em ol musik ol i no gat rait long kisim.—TIME, U.S.A.
Ol Guria—“Bikpela Bagarap i Kilim i Dai Planti Manmeri Tru”
Lain United Nations International Strategy for Disaster Reduction, em ol i stap long Geneva, Swiselan, i tok, “insait long 10-pela yia i go pinis, ol guria i bin kamapim bikpela bagarap i kilim i dai planti manmeri tru.” Ol man husat i dai long ol bikpela bagarap long nau, inap olsem 60 pesen bilong ol i dai long ol guria. Ol dispela bagarap i stap yet olsem samting we inap kilim i dai planti manmeri moa. Long wanem, long 10-pela siti bilong graun we i gat planti manmeri tru long en, 8-pela bilong ol dispela siti i stap long ol hap stret we guria bai kamap long en. Insait long 10-pela yia i go pinis, inap 3,852 bikpela guria i bin kamap na dispela i bin kilim i dai 780,000 manmeri.
Wok Em Planti Man i Kisim Bagarap Long En
Lain International Press Institute i stap long Vienna, Austria, i stori long wok bilong ol niuslain na i tok, “long 2009, inap 110 niusman i dai taim ol i mekim wok bilong ol, na dispela i mekim na 2009 em yia nogut bilong dispela kain wok.” Long ol hap we pait i wok long kamap long en olsem Afganistan, Irak, Pakistan, na Somalia, nius i tok, “ol paitman i birua tru long ol niuslain.” Dispela i mekim na i no gat planti nius tumas i stori long ol hevi i kamap long ol dispela hap, na ‘ol man i no kliagut long as bilong ol dispela hevi.’ Insait long 10-pela yia i go pinis, namba wan kantri we planti niuslain tru i bin kisim bagarap long en, em Irak, na bihain long kantri Irak, em Filipins, Kolambia, Meksiko, na Rasia.
I No Gat Planti Stilman Bikos Ol Kago i No Dia Tumas
Reuters nius bilong London i kamapim tok bilong James Treadwell, em wanpela leksara long yunivesiti bilong Leicester, Inglan, na i tok, “long nau i gat planti redio na DVD samting i no gat bikpela pe long en,” na dispela i mekim na nau i no gat as long ol stilman long Briten i stilim ol samting. Olsem: Pe bilong ol nupela DVD pleya i daun tru, olsem na Treadwell i tok, “sapos ol stilman i stilim ol dispela samting na ol i salim gen, ol i no inap kisim mani long en.” Tasol maski prais bilong ol samting i go daun, dispela i no pinisim pasin raskol. Long nau ol stilman i wok strong moa long stilim ol samting i gat bikpela pe na ol samting em ol inap long salim, ‘olsem ol mobail fon, MP3, na iPod samting.’ Ol stilman em pastaim ol i save brukim ol stua na stil, nau ol i mekim ol narapela pasin bilong stil, olsem holim ol man long ol pablik ples na strit samting na stilim mani bilong ol.