Skul na Ol Wok Bilong Spirit Yu Laik Mekim
1 Taim yu stap yangpela yet na yu skul gut, dispela bai helpim yu long kisim gut save long rit na rait na long kisim sampela save long ol samting bilong kantri, ol samting i bin kamap bipo, pasin bilong wokim ol namba, na saiens. Taim yu mekim olsem, bai yu lain long wokim gut tingting, skelim gut ol samting, stretim ol hevi, na kamapim ol gutpela tingting. Kain skul olsem bai helpim gut yu long olgeta taim yu stap laip. Olsem wanem skul yu kisim inap helpim yu long ol wok bilong spirit yu laik mekim na long helpim yu long kisim “gutpela tingting na save”?—Snd 3:21, 22.
2 Kamap Gutpela Long Mekim Wok Bilong God: Taim yu stap long skul, putim gut yau long tok bilong tisa, na mekim gut ol homwok bilong yu. Sapos yu lain gut long pasin bilong rit na stadi, dispela bai helpim yu long skelim gut ol tok bilong Baibel na bai yu stap strong long ol samting bilong spirit. (Ap 17:11) Taim yu lain long ol narapela narapela samting long skul, dispela bai helpim yu na long taim bilong wok autim tok, yu inap toktok wantaim kain kain man i gat kain kain laik na bilip. Ol save yu kisim long skul bai helpim yu long mekim gut ol wok Kristen bilong yu insait long oganaisesen bilong God.—Skelim wantaim 2 Timoti 2:21; 4:11.
3 Lain Long Lukautim Yu Yet: Sapos yu givim bel long skul, yu inap lain tu long sampela wok em inap helpim yu long painim wanpela wok mani taim yu winim skul. (Skelim wantaim 1 Timoti 5:8.) Yu mas skelim gut wanem samting yu laik lain long en. Tingting long lainim wanpela wok em inap helpim yu long painim wanpela gutpela wok mani long wanem hap yu stap long en—no ken lainim wanpela wok em i no inap helpim yu long painim hariap wanpela wok mani. (Snd 22:29) Taim yu lain long ol kain wok olsem, dispela bai helpim yu long lukautim yu yet sapos yu tingting long mekim wok long ol hap i sot long man bilong autim tok.—Skelim wantaim Aposel 18:1-4.
4 Sapos yu skul gut, dispela bai helpim yu long mekim moa yet wok autim tok. Wok strong long kisim sampela save em inap helpim yu long mekim ol wok samting bilong lukautim yu yet taim yu mekim wok bilong Jehova. Long dispela rot ol samting yu lain long en long skul bai helpim yu long mekim ol wok bilong spirit yu laik mekim.