Ol Yangpela i Laik Save . . .
Bai Mi Mekim Wanem Long Laip Bilong Mi?
“Pastaim mi no bin tingting planti long i stap bilong mi long bihain. Tasol klostu long taim mi pinis long skul, mi luksave olsem mi bai bungim ol hevi bilong olgeta wan wan de, mi mas painim wok mani na baim ol kaikai samting.”—Alex, 17.
OLSEM WANEM? Taim yu liklik, yu bin tingting long yu bai mekim wanem taim yu kamap bikpela? Long nau yu gat wanem kain tingting long ol dispela samting yu bin tingting long en? Yu tingting planti long olsem wanem yu bai lukautim yu yet long taim yu kamap bikpela man o meri? Sapos olsem, i no yu tasol i gat kain tingting olsem. Wanpela buk (Career Coaching Your Kids) i tok: “Wok bilong skelim na makim wanem kain wok ol bai mekim, em wanpela samting ol yangpela i pilim i hatwok long mekim.”
Tasol long nau, ating yu no tingting liklik long wok mani. Ating yu tingting long painim amamas tasol. I no gat rong long painim amamas, long wanem, Baibel i tokim yu long ‘amamas long taim yu yangpela yet.’ (Saveman 11:9) Tasol maski i olsem, nau em i gutpela taim long tingting long wanem samting yu laik mekim long laip bilong yu. Sindaun 14:15 i tok: “Man i gat gutpela tingting, em i save was gut long ol pasin em i mekim.” Olsem wanem yu ken mekim olsem?
“Save Long Hap Yu Laik Go Long En”
Piksaim long tingting olsem yu wok long stretim rot bilong i go long wanpela longwe ples. Ating pastaim yu bai sekim wanpela mep bilong skelim wanem rot i gutpela bilong bihainim. Dispela i wankain long ol samting yu tingting long mekim long bihain. Michael, wanpela yangpela man i mekim wok long brens ofis bilong ol Witnes Bilong Jehova, em i tok: “I gat planti samting yu inap mekim.” Olsem wanem yu ken makim wanpela bilong ol dispela samting long mekim? Michael i tok: “Ol mak yu laik winim inap helpim yu long makim samting yu laik mekim.”
Tingim mak yu laik winim i olsem ples yu laik go long en. Yu bai no inap kamap long dispela ples sapos yu raun raun nating. Em i gutpela moa long kisim mep na makim rot yu mas bihainim bilong kamap long dispela ples. Long dispela rot yu bai bihainim tok i stap long Sindaun 4:26, em i tok: “Tingting gut long wokabaut bilong yu.” Baibel Contemporary English Version i tanim dispela tok olsem: “Save long hap yu laik go long en.”
Long ol yia bihain, yu bai mekim planti bikpela disisen long ol samting bilong lotu, wok mani, marit, famili na ol narapela bikpela samting. Bai yu mekim ol gutpela disisen sapos yu save long ol samting yu laik mekim. Na taim yu wok long makim ol samting yu bai mekim long laip bilong yu, i gat wanpela samting yu no ken lusim tingting long en.
Tingim Man Bilong Wokim Yu
Sapos yu laik i stap amamas tru, yu mas tingim gut tok bilong saveman King Solomon, em i tok: “God i bin wokim yumi olgeta. Olsem na long taim yupela i yangpela yet, yupela i mas tingim em.” (Saveman 12:1) Laik bilong yu long amamasim God i mas stiaim yu taim yu makim ol samting yu laik mekim long laip bilong yu.
Bilong wanem dispela i bikpela samting? Long Kamapim Tok Hait 4:11, Baibel i tok: “Bikpela, yu God bilong mipela. Yu tasol yu stap antap tru na inap tru long olgeta man i ken amamas long yu na litimapim nem bilong yu na i stap aninit long strong bilong yu. Long wanem, yu bin wokim olgeta samting. Long laik bilong yu yet yu bin mekim olgeta samting i kamap, na nau dispela olgeta samting i stap.” Tru tumas, olgeta samting long heven na long graun i mas tok tenkyu long Man Bilong Wokim ol. Olsem wanem? Yu amamas olsem em i bin givim yu “laip na win na olgeta samting”? (Aposel 17:25) Dispela i kirapim yu long givim sampela samting i go bek long God Jehova bilong soim olsem yu amamas long ol samting em i givim yu?
Planti yangpela namel long ol Witnes Bilong Jehova i tingim Man Bilong Wokim ol na ol i makim wok bilong autim tok fultaim olsem wok bilong ol. Wok bilong autim tok fultaim em i wanpela gutpela mak bilong winim, na em bai bringim planti blesing. (Malakai 3:10) Tasol pastaim yu mas skelim gut ol samting. Olsem: Askim yu yet, ‘Mi gat save long mekim wanem kain wok na dispela wok inap lukautim mi long ol samting bilong skin, na nau mi inap mekim wok autim tok fultaim?’
Kelly, nau em i gat 27 krismas, taim em i yangpela yet em i bin tingting long wanem samting em bai mekim. Em i bin putim mak long mekim wok autim tok fultaim. Taim em i gat 18 krismas samting, Kelly i kirap skelim wanem kain wok mani em bai mekim. Em i tok: “Mi mas makim wanpela kain wok we em bai helpim mi long mekim wok autim tok.”
Long haiskul Kelly i kisim wanpela kos bilong kamap helpim bilong dentis. Na em i bin winim wanpela bikpela tes bilong skul long dispela wok em i skul long en. Tasol dispela i no mekim na em i lusim tingting long mak em i putim long winim, nogat. Kelly i tok: “Wok bilong autim tok fultaim em wok mi laik mekim. Olgeta arapela samting i namba tu tasol.” Kelly i amamas yet long mekim wok autim tok fultaim. Em i tok: “Mi pilim olsem disisen mi bin wokim em i nambawan gutpela disisen.”
Askim Ol Narapela
Sapos yu raun long wanpela hap yu no save long en, ating bai yu askim ol narapela long soim rot long yu—maski yu holim mep. Yu ken mekim olsem tu taim yu wok long skelim ol samting yu bai mekim long bihain. Kisim tingting bilong ol arapela. Sindaun 20:18 i tok: “Kisim gutpela tingting pastaim na bai wok bilong yu i go het gut.” Ol papamama bilong yu inap givim gutpela tingting long yu. Na tu, yu ken askim ol strongpela Kristen i save bihainim savetingting bilong God long givim gutpela tingting long yu. Roberto i tok: “Toktok wantaim ol brata o sista i stap olsem gutpela piksa long kongrigesen bilong yu o ol narapela kongrigesen i stap klostu. Ol inap tokim yu long sampela samting em yu bai kirap nogut long en.”
God Jehova i gat bikpela laik long helpim yu long wokim ol disisen em ol bai mekim yu i stap amamas. Olsem na askim em long helpim yu long ‘save gut long laik bilong em’ long ol samting yu bai mekim long bihain. (Efesus 5:17) Sapos yu bilip strong long Jehova, “em bai i soim yu stretpela rot long bihainim.”—Sindaun 3:5, 6.
SAMTING BILONG TINGIM
◼ Yu gat save long mekim wanem kain wok?
◼ Yu inap tingim sampela rot em yu inap mekim wok long save bilong yu long litimapim nem bilong Jehova?
◼ Yu laikim wanem kain wok fultaim em mipela i stori long en?
[Blok long pes 15]
ROT I KAMAPIM HEVI
Baibel i tok: “Ol man i laikim tumas long kisim planti mani samting, ol traim bai i kamap na holimpas ol olsem umben i holimpas wanpela abus. Bel bilong ol bai i kirap long mekim planti samting nogut na dispela bai i paulim ol tru. Na long dispela pasin ol bai i bagarap olgeta.” Rot man i bihainim bilong kisim planti mani kago i kamapim ol hevi tasol! Em inap mekim na man i gat dinau, em i tingting planti, na i no pas gut moa wantaim God.—1 Timoti 6:9, 10.
[Blok/Ol Piksa long pes 16, 17]
WOK PAINIA
Painia em wanpela pablisa i baptais pinis na i bihainim gutpela pasin Kristen, na em i bin stretim rot bilong lusim 70 aua long olgeta mun long autim gutnius bilong Kingdom Bilong God. Ol samting ol i lainim na ol samting i painim ol, dispela i helpim ol long kamap gutpela tisa bilong Baibel.
WOK LONG BETEL
Ol lain i wok long Betel i mekim wok long ol brens ofis bilong ol Witnes Bilong Jehova, na ol i helpim wok bilong redim, wokim, na salim ol buk na nius bilong Baibel i go long ol kongrigesen. Olgeta wok long Betel ol i wok holi.
GO LONG HAP I SOT LONG OL MAN BILONG AUTIM TOK
Sampela painia ol inap go long ol hap we ol i sot long ol man bilong autim tok bilong Kingdom. Sampela narapela ol i lainim wanpela tok ples na i go long narapela kantri o ol i bung wantaim kongrigesen i mekim dispela tok ples.
INTENESENEL SEVIS
Ol intenesenel sevan i save go long ol narapela kantri na helpim wok bilong sanapim ol Haus Kingdom na ol haus brens. Dispela em wanpela wok holi wankain olsem wok bilong ol lain i wokim tempel bilong Solomon.—1 King 8:13-18.
MINISTERIAL TRENING SKUL
Dispela skul i bilong 8-pela wik na i skulim ol elda na ol kongrigesen sevan husat i singel na i winim mak. Ol i skul long ol samting bilong oganaisesen na long pasin bilong mekim tok long ol miting. Ol i makim sampela long mekim wok long kantri bilong ol yet na sampela long wok long narapela kantri.
WOK MISINERI
Ol i save skulim ol painia husat i no gat sik na i gat strongpela skin long mekim wok long ol narapela kantri. Ol misineri i stap amamas na laip bilong ol i gat as bilong en.
[Blok/Piksa long pes 16]
WHAT WILL I DO WITH MY LIFE?
Ol Witnes Bilong Jehova i wokim dispela DVD na em i gat ol inteviu ol i mekim wantaim ol yangpela long Brasil, Briten, Jemani, na Amerika. Klostu nau ol bai wokim long ol narapela tok ples tu.
[Piksa long pes 15]
“Ol mak yu laik winim inap helpim yu.”—Michael, wanpela brata long Betel
[Piksa long pes 16]
“Em nambawan gutpela disisen mi bin mekim.”—Kelly, em i mekim wok painia inap 6-pela yia
[Piksa long pes 17]
“Toktok wantaim ol brata o sista i stap olsem gutpela piksa.”—Roberto, wanpela brata long Betel