Mi No Moa Kalabus Long Alkohol
Pasin bilong dring liklik alkohol inap mekim kaikai i swit moa o inap kamapim sampela amamas moa long wanpela bung. Tasol long sampela manmeri, pasin bilong dring alkohol inap kamapim planti hevi. Tingim stori bilong wanpela man husat i bin lusim kalabus bilong dring alkohol.
LONG nau yet, mi hatwok long stori long hevi i bin i stap insait long famili bilong mi. Papa na Mama i kirap long dring, na bihain Papa i save paitim Mama. Planti taim Papa i save paitim mi. Taim ol i seperet, mi gat 4-pela krismas tasol. Mi tingim yet ol i bin lusim mi long i stap long haus bilong bubu meri.
Mi pilim olsem i no gat wanpela i laikim mi. Taim mi gat 7-pela krismas, long pasin hait mi save go long wanpela rum daunbilo long haus na dring wain em famili yet i bin wokim, na i olsem dispela i daunim bel hevi bilong mi. Taim mi gat 12-pela krismas, Mama wantaim bubu meri i tok pait na mi as bilong dispela tok pait bilong tupela. Mama i belhat nogut tru na i tromoi traipela fok long mi. Mi kalap bilong abrusim fok na mi no kisim bagarap! I no long dispela taim tasol samting i laik bagarapim laip bilong mi. Tasol ol mak bilong ol sua mi gat long skin i no bikpela olsem bagarap mi bin kisim long bel na tingting.
Taim mi gat 14 krismas, mi save dring olgeta taim. Taim mi gat 17 krismas, mi ranawe long famili. Pasin bilong dring i mekim na mi pilim olsem mi ken bosim mi yet, na mi kisim pasin bilong kros planti, na mi kamapim ol hevi long ol haus kaikai i stap long hap mi stap long en. Pasin bilong dring tasol i save givim amamas long mi. Long wanpela de tasol mi inap dring 5 lita wain, sampela bia, na sampela strongpela dring tu.
Taim mi marit, pasin bilong mi long dring i kamapim ol bikpela hevi long meri bilong mi. Pasin bilong mi long bel nogut na kros i go bikpela, na mi save paitim em na ol pikinini, mi kamapim gen dispela sindaun em mi bin i kamap bikpela long en. Klostu olgeta mani mi kisim i save pinis long alkohol. Mipela i no gat ol tebol na bet samting, olsem na mi wantaim meri bilong mi, mipela i save slip long plua. Mi pilim olsem i stap bilong mi i no gat as bilong en, na mi no mekim wanpela samting bilong stretim sindaun bilong mipela.
Wanpela taim mi toktok wantaim wanpela Witnes Bilong Jehova. Mi askim em olsem bilong wanem i gat planti pen na hevi, na dispela Witnes i soim mi long Baibel tok promis bilong God long kamapim wanpela taim i no gat ol hevi long en. Dispela i kirapim tru tingting bilong mi long kirap stadi long Baibel wantaim ol Witnes. Taim mi bihainim ol tok bilong Baibel na mi dring liklik tasol, sindaun bilong famili bilong mipela i kamap gutpela. Tasol mi luksave olsem, sapos mi laik mekim wok bilong God Jehova long pasin em i orait long en, mi mas lusim pasin bilong dring alkohol. Insait long 3-pela mun mi wok hat tru na mi lusim pasin bilong dring alkohol. Bihain long 6-pela mun, mi dediket long God na mi kamapim klia dediket bilong mi long rot bilong kisim baptais.
Taim mi lusim kalabus bilong alkohol, mi inap bekim olgeta mani mi bin kisim olsem dinau. Bihain, mi baim wanpela haus na wanpela ka, em mipela i save yusim bilong go long ol miting Kristen na long autim tok long ol haus. Nau mi kisim pasin bilong amamas long mi yet.
Sampela taim long ol bung ol i laik givim wanpela dring long mi. Planti i no save long bikpela hatwok mi bin mekim bilong lusim kalabus bilong alkohol, na sapos mi kisim wanpela dring tasol, dispela inap mekim na mi go bek long olpela pasin bilong mi. Dispela laik bilong kisim alkohol i stap yet insait long mi. Mi mas beten na tingting strong bilong mi ken tok nogat long kisim alkohol. Taim nek bilong mi i drai, mi save dring planti narapela dring i no gat alkohol long en. Mi no bin dring alkohol liklik inap 10-pela yia nau.
Jehova inap mekim samting em man i no inap mekim. Em i bin helpim mi long i stap fri, em samting mi no bin ting inap painim mi! Bel hevi bilong ol samting nogut i bin painim mi long taim mi liklik, dispela i stap yet long mi, na oltaim mi mas wok strong long daunim ol tingting i save bagarapim bel. Tasol i gat ol gutpela samting tru mi amamas long en, em mi inap pas gut wantaim God, na mi insait long wanpela kongrigesen i gat ol gutpela pren, na mi gat gutpela famili em ol i gat wankain bilip olsem mi. Meri na ol pikinini bilong mi i givim bel olgeta long helpim mi long winim hevi bilong dring alkohol. Meri bilong mi i tok: “Pastaim laip bilong mi i nogut olgeta. Nau mi tenkyu tru long Jehova long mi inap sindaun gut na amamas wantaim man na tupela pikinini bilong mi.”—Wanpela man i salim dispela stori i kam.
[Rait long pes 11]
Taim mi gat 14 krismas, mi save dring olgeta taim
[Rait long pes 12]
Jehova inap mekim samting em man i no inap mekim
[Blok/Ol Piksa long pes 12]
TOK BILONG BAIBEL NA ALKOHOL
◼ Baibel i no tambuim pasin bilong dring alkohol. Em i tok wain i mekim bel bilong man i amamas na em i wanpela presen God i givim long ol manmeri. (Song 104:14, 15) Baibel i tok tu long diwai wain i olsem piksa bilong makim man i gat gutpela sindaun na i no pret. (Maika 4:4) Namba wan mirakel Jisas i bin wokim, em i tanim wara i kamap wain long wanpela kaikai bilong marit. (Jon 2:7-9) Na taim aposel Pol i harim olsem ‘oltaim sik i save kamap’ long Timoti, em i tokim em long “dring liklik wain.”—1 Timoti 5:23.
◼ Baibel i tambuim pasin bilong dring planti alkohol:
“Ol man i save spak, . . . bai i no inap i go insait long kingdom bilong God.”—1 Korin 6:9-11.
“Yupela i no ken dring planti na spak. Nogat. Dispela kain pasin i save bagarapim yupela.”—Efesus 5:18.
“Wanem ol man i gat bikpela hevi na i save sori long ol yet? Na wanem ol man i save toktok planti na kirapim pait? Na wanem ol man i save kisim sua long skin bilong ol? Na ai bilong wanem ol man i save ret oltaim? Em ol man i save dring planti wain na bia samting, ol dispela man tasol. Nogut yu larim wain i pulim yu, maski em i gat naispela kala na em i lait gut insait long glas, na em i gutpela long nek bilong yu. Bihain bai yu pilim olsem wanpela snek nogut i bin kaikaim yu. Bai tingting bilong yu i bagarap na yu ting yu lukim ol kain kain samting. Na bai yu mauswara planti long olkain samting nabaut.”—Sindaun 23:29-33.
Olsem dispela stori i kamapim, sampela em bipo ol i gat hevi long dring alkohol, ol i bihainim savetingting na lusim alkohol olgeta.—Matyu 5:29.