Nius i Kam Long Olgeta Hap

◼ Insait long 37 milion manmeri bilong Tansania, inap 14 milion i go 19 milion i save kisim malaria long olgeta yia. “Dispela sik i kilim i dai 100 tausen samting manmeri long olgeta yia.”​—⁠THE GUARDIAN, TANSANIA.

◼ Wanpela wok painimaut i tok, inap olsem 26.4 pesen bilong ol pikinini long Taiwan i stap long gret 5 na 6 “i bin tingting long kilim i dai ol yet.”​—⁠THE CHINA POST, TAIWAN.

◼ Long 2005, i gat 28 woa na 11-pela pait long olgeta hap bilong graun.​—⁠VITAL SIGNS 2006-​2007, WORLDWATCH INSTITUTE.

Pis i Lukautim Wara Saplai

Sampela siti long Not Amerika i save yusim wanpela kain pis ol i kolim blugil bilong skelim wara saplai em i gutpela bilong dring o nogat. Ol i yusim ol dispela pis, long wanem, pis i save pilim hariap sapos i gat marasin i stap insait long wara. Wanpela nius The Associated Press i tok: “Ol i putim sampela pis insait long ol tang em ol i save pulapim oltaim long wara saplai. Na i gat ol masin i save wok oltaim bilong skelim ol senis i kamap long pasin bilong pis long pulim win, na wok bilong klok bilong ol, na pasin bilong ol long swim taim i gat marasin nogut insait long wara.” Nius i tok moa olsem long wanpela taim long New York Siti ‘ol dispela pis i pilim disel i stap insait long wara tupela aua paslain long ol masin i kamapim dispela samting,’ olsem na ol pis i pasim dispela marasin nogut na em i no go insait long wara saplai bilong taun.

Mak Bilong Nikotin i Go Antap

Ol lain bilong helt i wok long tokaut long ol man i mas lusim pasin bilong smok. Nius The New York Times i tok ol kampani bilong wokim smok i bin apim mak bilong nikotin “long pasin hait inap 10 pesen insait long 6-pela yia i go pinis, na bai ol man i kalabus moa long smok.” I gat wanpela nupela masin em ol i ting em inap skelim gut moa smok, na masin i kamapim klia olsem ol kampani bilong wokim smok i traim “long kalabusim ol nupela yangpela long smok na ol lain i bin smok longtaim pinis i no ken lusim pasin bilong smok.” Ol i traim “olgeta kain smok na klostu olgeta i gat planti marasin nikotin inap long mekim man i kalabus tru long smok.”

Yu Ting Ol Vidio Gem Inap Kalabusim Man?

“Ol samting i save kamap long kru bilong ol man i save pilaim ol kompiuta gem i wankain long kru bilong ol man i kalabus long alkohol o spak brus.” Em tok bilong Ralf Thalemann, em wanpela saveman na gopas bilong wanpela lain bilong skelim pasin bilong kalabus long ol samting, long Charité University Hospital long Berlin, Jemani. Ol i ting olsem sapos man i pilai kompiuta gem planti taim tumas, dispela inap kamapim planti marasin dopamine insait long kru, na dispela i mekim man i pilim gut na amamas na isi isi dispela inap “kalabusim” em. Wanpela wok painimaut i tok dispela samting inap kamap long 10 pesen bilong ol lain i save pilaim ol vidio gem.

Wok Bilong Fam i Gutpela Bilong Ol Man i Gat Sik Long Tingting

I no longtaim i go pinis, winim 100 saveman bilong 14 kantri i bung long Stavanger, Nowe, bilong kisim save long Green Care, em wanpela program i bungim wok bilong fam, wok tisa, na wok bilong lukautim helt. Wanpela redio stesin (Norwegian National Broadcasting Company) i tok, sampela em ol i bin i gat sik bilong tingting inap planti yia, ol i no gat wok moa long i stap long haus sik taim ol i kirap mekim wok long fam. Dispela wok i “gutpela bilong helpim tingting na bodi.” Winim 600 fam long ol ples long Nowe i wok gut wantaim Green Care, na ol i kisim sampela mani moa long dispela rot.