Tru Ol i Bin i Stap Laip Longpela Taim?

Baibel i tok, Adam i bin i stap laip inap 930 yia, Set i stap inap 912 yia, na Metusela i stap inap 969 yia​—⁠narapela 31 yia moa na em bai kamap 1000 yia! (Stat 5:​5, 8, 27) Olsem wanem? Longpela bilong ol dispela yia i wankain long ol yia bilong yumi long nau, o ol i sotpela haptaim tasol wankain olsem ol mun bilong yumi, olsem sampela man i ting?

Ol stori bilong Baibel i kamapim klia olsem ol yia bilong bipo i longpela wankain olsem ol yia bilong yumi long nau. Tingim: Sapos ol dispela yia bilong bipo ol i wankain long ol mun bilong yumi, sampela man bai kamapim pikinini taim ol i liklik mangi yet. Olsem: Ating Kenan bai kamapim pikinini long taim em i gat klostu 6-pela krismas samting na Mahalalel na Enok bai kamapim pikinini bihain tasol long ol i winim 5-pela krismas.​—⁠Stat 5:​12, 15, 21.

Na tu, ol man i bin stap long dispela taim bipo ol i save olsem ol de, ol mun, na ol yia, ol i narapela narapela. (Stat 1:​14-​16; 8:13) Stori bilong Noa long ol de na mun we ol samting i bin kamap i helpim yumi long tingim longpela bilong wan wan mun. Tok bilong Stat 7:​11, 24, na Stat 8:​3, 4, i soim olsem 5-pela mun​—⁠kirap long namba 17 de bilong namba 2 mun i go inap long namba 17 de bilong namba 7 mun​—⁠i gat 150 de. Dispela i kamapim klia olsem Noa i kaunim ol mun i gat 30 de long en, na 12-pela bilong ol dispela mun i makim wanpela yia.​—⁠Stat 8:​5-​13.a

Tasol olsem wanem ol man inap i stap laip inap 900 yia o moa? Baibel i tok, God i wokim ol manmeri bilong i stap laip inap oltaim oltaim, tasol sin bilong Adam i mekim na ol man i no gutpela olgeta na dai i save painim ol. (Stat 2:17; 3:​17-​19; Rom 5:12) Ol man i bin stap paslain long Bikpela Tait, skin bilong ol i gutpela moa, winim yumi long nau, na dispela em i nambawan as na ol i bin i stap laip longpela taim. Olsem: Metusela i kamap long namba 8 lain tumbuna pikinini bilong Adam.​—⁠Luk 3:​37, 38.

Klostu nau, Jehova bai pinisim tru sin bilong Adam long olgeta lain i bilip long blut bilong Pikinini bilong em, Jisas Krais. “Sin i save givim pe long ol wokboi bilong en. Dispela pe em dai tasol. Tasol God i save givim nating presen long yumi, em laip i stap oltaim. Dispela laip yumi kisim long wok bilong Jisas Krais, Bikpela bilong yumi.” (Rom 6:23) Yes, i gat wanpela taim bai kamap we krismas bilong Metusela em 969 yia, yumi bai tingim olsem em i sotpela haptaim tru!

[Futnot]

[Graph on page 22]

(Bilong save ol dispela rait i stap we long pes, lukim buk o magasin)

1000

Metusela

Adam

 Set

900

800

700

600

500

400

300

200

100

Ol man long nau