Rot Namba 3
Mekim Wok Bilong Yu Long Bosim Ol Pikinini
Bilong wanem yu mas mekim olsem? Wanpela nius (Parents) i tok ol i bin kisim save olsem ‘ol pikinini em papamama i laikim ol, na ol i bosim na stretim gut ol, tingting bilong ol i wok gut na ol inap kisim bikpela save long skul, na kisim pasin bilong toktok gut wantaim ol narapela, na amamas long ol yet, na ol i stap amamas, winim ol pikinini em papamama i no save stretim ol o ol i mekim hatpela pasin long ol.’
Hatwok bilong en: Kirap long taim ol i liklik yet na i go inap long ol i gat 16 krismas samting, ol bai tok olsem yupela i no gat rait long bosim na stretim ol. Long buk Parent Power! John Rosemond i tok: “Ol pikinini i save pilim kwik olsem papamama i pret long stretim ol na papamama bai i les na larim ol.” Na em i tok moa: “Ol pikinini i mas save papamama i bos bilong famili, sapos nogat, ol pikinini bai mekim dispela wok.”
Wanem samting inap helpim yu? Yu no ken tingting planti olsem sapos yu mekim wok bilong yu long bosim ol pikinini, bai ol i no laikim yu o yu bagarapim bel bilong ol. God Jehova, em Man bilong kamapim famili, em i no tok ol pikinini i mas kamapim tingting bilong ol long pasin bilong bosim famili, nogat. Em i givim wok long papamama long bosim ol pikinini, na em i tokim ol pikinini: “Yupela i mas bihainim tok bilong papamama.”—Efesus 3:14, 15; 6:1-4.
Yu ken bosim na stretim ol pikinini tasol yu no mekim dispela wok long hatpela pasin. Bai yu mekim olsem wanem? Yu ken bihainim pasin bilong Jehova. Em i gat strong long subim ol pikinini bilong em long graun long mekim laik bilong em, tasol em i no mekim olsem, nogat, em i tok isi long yumi bilong kirapim yumi long mekim. Long Baibel em i tok: “Sapos yupela i bin harim tok bilong mi, orait nau yupela inap i stap gut na oltaim laip bilong yupela bai i pulap long amamas, olsem wara i ran oltaim na i no save pinis.” (Aisaia 48:18) Jehova i laik bai yumi bihainim tok bilong em, long wanem, yumi laikim em tru na i no olsem yumi pret nogut tru long em na yumi mekim, nogat. (1 Jon 5:3) Em i mekim pasin isi long yumi taim em i tokim yumi long mekim samting inap long skel bilong yumi wan wan, na em i save sapos yumi bihainim ol stretpela lo bilong em dispela bai helpim yumi.—Song 19:7-11.
Olsem wanem yu inap strongim bel bambai yu ken bosim ol pikinini long pasin i stret long mekim? Namba wan, yu mas bilip olsem God i laik bai yu mekim dispela wok. Namba tu, yu mas bilip tru olsem pasin bilong bihainim ol stretpela lo bilong God bai i helpim gut yu wantaim ol pikinini bilong yu.—Rom 12:2.
Yu mas mekim wanem bikpela samting bilong bosim ol pikinini?
[Rait long pes 5]
“Sapos yu stretim pikinini . . . bai em i mekim gutpela pasin na bai yu gat bel isi na yu amamas.”—Sindaun 29:17