Baibel i Tok Wanem?

I Gat Rong Long Kisim Famili Plening?

WANEM tingting bilong yu? I gat rong long ol marit i kisim famili plening? Ating ol bilip bilong lotu bilong yu bai stiaim bekim bilong yu. Misin Katolik i save tok olsem olgeta wok bilong pasim rot bilong kamapim pikinini em i “bikpela rong.” Misin i tok, taim tupela marit i mekim maritpasin, rot i mas op yet long meri i kisim bel. Olsem na long Misin Katolik, pasin bilong pasim bel i “gat rong.”

Tasol planti manmeri i hatwok long bihainim dispela tingting. Wanpela stori long nius Pittsburgh Post-Gazette i tok, “75 pesen bilong ol Katolik long Amerika ol i tok misin i mas larim ol long mekim wok long ol samting bilong pasim bel. . . . Long olgeta de planti milion manmeri i save sakim dispela tambu.” Wanpela bilong ol, em Linda, na em i gat 3-pela pikinini, em i tok em i save yusim famili plening na i tok: “Mi no ting mi mekim rong.”

Tok Bilong God i tok wanem long dispela samting?

Laip Em i Gutpela Samting Tru

God i save tingim laip bilong pikinini i wanpela gutpela samting tru, maski pikinini i stap blut yet. Holi spirit i kirapim King Devit bilong Israel long tok olsem: “Yu wokim mi olgeta insait long bel bilong mama. Yu lukim mi taim mama i no karim mi yet. Mi no kamap yet long graun, tasol yu raitim pinis long buk bilong yu.” (Song 139:​13, 16) Taim meri i kisim bel, em nau, laip bilong pikinini i kirap. Na Lo Bilong Moses i tok, sapos wanpela man i bagarapim bebi i stap yet long bel bilong mama, orait dispela man i gat asua. Kisim Bek 21:​22, 23 i tok, sapos tupela man i pait na meri i gat bel o pikinini i stap long bel i kisim bagarap, ol jas i mas skelim samting i bin kamap​—⁠long laik bilong man yet em i kilim i dai dispela meri o pikinini, o em i popaia tasol na mekim. Tasol strafe ol jas i kolim inap olsem: Ol i “mas kilim dispela man i dai”​—⁠olsem bekim bilong dispela laip em i bin bagarapim.

Ol dispela stiatok i gutpela long tingim, long wanem, i gat sampela samting bilong famili plening em inap rausim bel, olsem kilim pikinini i dai. Ol kain samting olsem i no stret wantaim tingting bilong God, em i tingim laip i bikpela samting tru. Tasol klostu olgeta samting bilong famili plening i no inap kilim bebi i stap yet long bel. Orait olsem wanem long pasin bilong mekim wok long ol dispela samting?

I no gat wanpela tok long Baibel i tok ol Kristen i mas kamapim pikinini. God i tokim namba wan man na meri na famili bilong Noa: “Yupela i mas kamap planti na i go sindaun long olgeta hap bilong graun.” Tasol God i no kolim gen dispela lo long ol Kristen. (Stat 1:​28; 9:⁠1) Olsem na ol marit yet i ken skelim olsem ol bai kamapim pikinini o nogat, na ol bai kamapim hamas pikinini, na long wanem taim ol bai i gat pikinini. Na Baibel i no tambuim pasin bilong mekim wok long samting na bai meri i no kisim bel. Olsem na pasin bilong mekim wok long samting bilong pasim bel o nogat, em samting bilong tupela marit yet i mas skelim. Tasol bilong wanem Misin Katolik i tambuim pasin bilong pasim bel?

Tingting Bilong Ol Man i Narapela Kain Long Tingting Bilong God

Buk New Catholic Encyclopedia i tok olsem 200 yia samting bihain long Krais, em namba wan taim na ol man i tok ol i Kristen ol i kisim wanpela tingting olsem maritpasin i bilong mekim wanpela wok tasol, em bilong kamapim pikinini. Baibel i no as bilong dispela bilip. Em tingting bilong ol man tasol. Insait long planti handet yia bihain, sampela tisa bilong lotu Katolik i skruim sampela tok moa long dispela bilip.a Bihain moa ol i tok olsem sapos ol marit i mekim maritpasin bilong amamasim tasol ol yet, dispela em i wanpela sin, na sapos ol i pasim rot bambai ol i no inap kamapim pikinini, dispela tu em wanpela sin. Tasol Baibel i no tok olsem.

Buk Sindaun long Baibel i mekim tok piksa na i stori long amamas em maritpasin inap givim long man na meri marit, olsem: “Yu no ken i go long hul wara bilong narapela man. Yu mas i stap gut wantaim meri bilong yu, na slip wantaim em wanpela tasol, olsem man i dring wara long hul wara bilong em yet. God i ken mekim gut long meri bilong yu. Meri i olsem hul wara bilong yu na yu ken amamas long em. Em i naispela tumas na pasin bilong en i gutpela tru. Em i save laikim yu tumas, olsem na oltaim yu mas tingting long em na laikim em tru. Na yu mas amamas oltaim long susu bilong en.”​​—⁠Sindaun 5:​15, 18, 19.

Maritpasin namel long man na meri marit em wanpela presen i kam long God. Tasol wok bilong maritpasin i no bilong kamapim pikinini tasol, nogat. Maritpasin i givim rot long tupela marit long kamapim pasin bilong laikim narapela narapela. Olsem na sapos tupela marit i laik yusim famili plening bambai ol i no ken kamapim pikinini, em samting bilong ol yet long skelim, na narapela i no ken sutim tok long ol.​​—⁠Rom 14:​4, 10-​13.

YU LAIK SAVE?

◼ Olsem wanem? Maritpasin namel long man na meri marit, dispela i gat rong long en?​​—⁠Sindaun 5:​15, 18, 19.

◼ Sapos ol Kristen i yusim famili plening, ol i mas tingim wanem samting?​​—⁠Kisim Bek 21:​22, 23.

◼ Ol man i mas i gat wanem tingting long ol marit i yusim famili plening?​​—⁠Rom 14:​4, 10-​13.

[Futnot]

[Rait long pes 21]

God i tokim namba wan man na meri na famili bilong Noa: “Yupela i mas kamap planti na i go sindaun long olgeta hap bilong graun.” Tasol God i no kolim gen dispela tok long ol Kristen