Holim Strongpela Tingting Olsem Gutpela Samting Bai Kamap Inap Helpim Helt?

“Pasin bilong belgut i olsem marasin,” wanpela king bilong ol Israel i gat savetingting i raitim dispela tok 3,000 yia i go pinis. (Sindaun 17:22) Long nau ol dokta i luksave long savetingting i stap long dispela tok bilong God. Tasol ating planti bilong yumi i hatwok long i stap “belgut.”

Wan wan bilong yumi inap abrusim ol samting i givim hevi long yumi long olgeta de. Em ol samting inap mekim yumi bel hevi na yumi no ting wanpela gutpela samting bai kamap. Tasol ol ripot bilong nau i soim olsem, maski i gat ol hevi i stap, yumi inap kisim dispela pasin bilong bilip strong olsem gutpela samting bai kamap.

Man i save bilip strong olsem gutpela samting bai kamap, em bai pilim olsem wanem taim hevi i kamap? Em bai i no pilim olsem dispela hevi bai stap longtaim, nogat. Em i save olsem hevi bai kamap. Em i karim dispela hevi na i skelim dispela samting. Na taim rot i op, em bai traim narapela rot o mekim dispela samting i kamap gutpela moa.

Tasol man i no ting gutpela samting bai kamap, planti taim em bai tok em asua bilong em yet na hevi i kamap. Em bai tok dispela hevi i no inap pinis, long wanem, em yet i no bin tingting gut, o em i no gat inap save long stretim dispela hevi, o em i no luk gut long ai bilong ol narapela. Dispela i mekim na em bai givap.

Yu ting pasin bilong bilip strong olsem gutpela samting bai kamap, dispela bai mekim sampela samting long helt na laip bilong yumi? Yes em inap. Insait long 30 yia, ol saientis i mekim sampela wok painimaut long 800 sikman long Mayo Clinic, Rochester, Minnesota, long Amerika. Na ol i kisim save olsem ol man husat i bilip strong olsem gutpela samting bai kamap, helt bilong ol i gutpela moa long ol narapela na ol i stap longpela taim moa. Ol man bilong mekim wok painimaut i kisim save olsem ol dispela man inap winim hevi na sik bilong bel hevi i no inap kisim ol hariap.

Tasol long dispela taim we ol hevi i wok long i go bikpela tru, i hatwok long bilip strong olsem gutpela samting bai kamap. Olsem na yumi no kirap nogut olsem planti man i hatwok long ting gutpela samting bai kamap. Wanem samting inap daunim dispela hevi? Lukim sampela gutpela tok i stap long blok daunbilo na dispela inap helpim yu.

Tru pasin bilong belgut i no inap stretim olgeta samting, tasol em i ken helpim helt na laip bilong yu. Baibel i tok: “Man i sot long ol samting, em i stap nogut na i gat bikpela hevi oltaim. Tasol sapos em i man bilong belgut na amamas, orait olgeta de i olsem de bilong pati.”​—⁠Sindaun 15:⁠15.

[Blok/Piksa long pes 16]

Sampela Tok Bilong Helpim Yua

◼ Taim yu ting olsem yu no inap amamas long mekim wanpela samting o yu ting sampela samting yu mekim bai i no kamap gutpela, yu mas sakim dispela tingting. Tingting strong olsem gutpela samting bai kamap.

◼ Amamas long wok bilong yu. Maski em wanem kain wok, traim painim sampela samting long dispela wok em yu laikim.

◼ Poromanim ol pren husat i gat strongpela bilip olsem gutpela samting bai kamap long laip bilong ol.

◼ Stretim ol hevi em yu inap long stretim. Na luksave olsem i gat sampela hevi em yu no inap stretim.

◼ Long olgeta de, raitim 3-pela gutpela samting i bin painim yu.

[Futnot]