Yu Ting Klostu Nau Graun Bai Bagarap?
Yu bai bekim dispela askim olsem wanem?
Klostu nau, ol samting long graun bai
(a) kamap gutpela?
(b) stap wankain?
(c) go nogut moa?
OLSEM WANEM? Yu traim long holim gutpela tingting long ol samting bai kamap bihain? Dispela bai helpim yu long planti rot. Sampela wok painimaut i kamapim olsem ol manmeri i tingting olsem gutpela samting bai kamap, tingting bilong ol i wok gut na ol i no save sik tumas. Ol i bin skelim ol man inap longpela taim na ol i kisim save olsem ol man i ting gutpela samting bai kamap, planti bilong ol i no kisim sik bilong klok, tasol ol man em ol i ting i no gat gutpela samting inap kamap, planti bilong ol inap kisim dispela sik. Save ol i kisim long dispela wok painimaut i stret wantaim tok Baibel i bin mekim inap planti handet yia i go pinis, olsem: “Pasin bilong belgut i olsem marasin bilong mekim man i stap gut. Tasol sapos tingting bilong man i bagarap, dispela i olsem sik nogut i wok long bagarapim ol bun bilong en.”—Sindaun 17:22.
Tasol tok bilong ol saientis long ol samting bai painim dispela graun long bihain i mekim na planti man i pilim olsem i hatwok long ting gutpela samting bai kamap bihain. Tingim sampela tok bilong ol em ol nius i save stori long en.
Graun i Laik Bagarap
Long 2002, wanpela lain i gat nem (Stockholm Environment Institute) i tok lukaut olsem sapos ol man i tingim tasol mani na bisnis samting na i no lusim ol pasin i save bagarapim win na graun, “dispela inap senisim tru taim bilong san na ren na ol samting i save helpim graun long i stap gut.” Ol i tok moa olsem planti man long olgeta hap i stap rabis, i mekim yet pasin i no stret, na i wok long bagarapim bikbus na wara samting, na dispela inap mekim na “ol bikpela hevi bai wok long bagarapim ol samting long graun, na sindaun bilong ol man.”
Long 2005, Yunaitet Nesen i kamapim wanpela ripot (Millennium Ecosystem Assessment Synthesis Report) we ol i bin skelim ol samting bilong graun na win na wara inap 4-pela yia. Winim 1,360 saveman bilong 95 kantri i insait long dispela wok, na ol i kamapim dispela tok lukaut: “Ol samting ol man i mekim i putim bikpela hevi long ol wok bilong graun, olsem na yumi no ken ting ol samting long graun bai stap gut na bai ol lain man i kamap bihain inap i stap long graun.” Ripot i tok, bilong abrusim bagarap ol man i mas “kamapim ol bikpela senis long ol oganaisesen na long pasin bilong mekim ol samting, tasol ol dispela kain senis i no kirap yet.”
Anna Tibaijuka, em dairekta bilong wanpela lain (United Nations Human Settlements Programme), em i kamapim tingting bilong planti saveman. Em i tok: “Sapos yumi wok long mekim ol samting olsem yumi save mekim long nau, bikpela bagarap bai painim yumi.”
As na Yumi Ken Ting Gutpela Samting Bai Kamap
Ol Witnes Bilong Jehova husat i save wokim dispela nius, ol tu i bilip olsem klostu nau ol bikpela senis bai kamap long graun. Tasol ol i bilip olsem ol dispela senis bai i no kamapim ol samting nogut, nogat, ol i bilip olsem ol senis bai kamapim ol nambawan gutpela samting hia long graun. Bilong wanem ol i ting ol gutpela samting bai kamap? Long wanem, ol i bilip long ol tok promis i stap long Tok Bilong God, em Baibel. Tingim wanpela bilong ol dispela tok promis: “I no longtaim na bai ol man nogut i lus olgeta. Bai yu wok long painim ol long ples bilong ol, tasol yu no inap lukim ol. Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”—Song 37:10, 11.
Yu ting kain tok olsem i olsem driman nating tasol? Paslain long bekim dispela askim, tingim dispela tok: Inap 2 tausen yia paslain long taim bilong yumi, Baibel i tok profet long planti bikpela hevi nau yumi lukim na i save painim dispela graun na ol manmeri. Plis ritim ol skripsa long stori i kamap bihain long dispela, na skelim tok bilong ol wantaim ol samting yu lukim i wok long kamap long graun. Taim yu mekim olsem, bai yu bilip strong olsem Baibel i tok profet long ol samting bai kamap bihain.