Kingdom News No. 36

Nupela Milenium—Wanem Samting Bai Painim Yu Long Bihain?

Nupela Milenium—Em i Kirap Bilong Wanpela Nupela Taim?

DISPELA wan handet yia i bin kirap long yia 1900 ol i pinis long biknait bilong Disemba 31, 1999.a Planti samting nogut i bin kamap insait long dispela wan handet yia. Tasol ol man i bin kisim planti nupela save tu, na ol kain kain nupela marasin, na ol i kisim planti save long rot bilong redio, televisen, ol buk, na kompiuta samting, na wok bisnis long olgeta hap i bin i go bikpela. Olsem na planti manmeri ol i bilip olsem long nupela mileniumb ol gutpela senis bai kamap. Olsem wanem? Bai yumi lukim ol sik, pasin bilong pait, stap rabis, na bagarapim win na wara, ol i pinis long dispela taim?

Planti man i bilip olsem. Tasol yu ting nupela milenium inap kamapim sampela senis bilong helpim yu na famili bilong yu long i stap bel isi? Orait, yumi ken skelim sampela bikpela hevi i save painim yumi.

Bagarapim Win, Wara, na Graun

Ol kantri i gat planti faktori ol i “wok long bagarapim win na wara long olgeta hap bilong graun.” Sapos ol i wok yet long mekim olsem, “win na wara bilong graun inap bagarap olgeta.”​​—⁠“Global Environment Outlook​—⁠2000,” United Nations Environment Programme.

Ol Bikpela Sik

“Ol saveman i ting long yia 2020, long olgeta 10-pela 10-pela man i dai long ol kantri i stap rabis, 7-pela man bai dai long ol sik i no save kalap long ol narapela. Long nau namba bilong ol man i dai long kain sik olsem em 40 pesen samting.”​​—⁠“The Global Burden of Disease,” Harvard University Press, 1996.

Sampela saveman i tok “i go inap long yia 2010, 66 milion manmeri bai dai long sik AIDS long 23 kantri em sik AIDS i go bikpela moa long en winim ol narapela kantri.”​—⁠“Confronting AIDS: Evidence From the Developing World,” wanpela ripot bilong European Commission na World Bank.

Stap Rabis

“Klostu 1.3 bilion manmeri, mani ol i holim bilong lukautim ol long olgeta wan wan de i no winim wanpela dola (U.S.), na klostu 1 bilion manmeri i no gat rot bilong kisim kaikai inap long lukautim skin bilong ol.”​—⁠“Human Development Report 1999,” United Nations Development Programme.

Ol Pait

“Ol pait insait long sampela kantri inap i go bikpela moa winim olgeta narapela taim bilong bipo. As bilong ol dispela pait i olsem: ol man i birua long ol narapela lain, o ples, o lotu, . . . dispela kain pait bai kamap . . . planti, winim ol narapela as bilong pait insait long 25 yia i kirap long nau . . . , na dispela kain pait bai kilim i dai sampela handet tausen manmeri long olgeta wan wan yia.”​​—⁠“New World Coming: American Security in the 21st Century,” U.S. Commission on National Security/21st Century.

Ol manmeri i amamas long tingim kirap bilong nupela milenium na ol i no tingim gut olsem win na wara i wok long bagarap, ol sik i go nogut, ol man i stap rabis nogut tru, na ol pait i kamap planti. As bilong ol dispela hevi i olsem, ol man i save mangal, na ol i no bilipim narapela, na ol i tingim ol yet tasol. Tasol save bilong saientis na ol gutpela gutpela masin na wok politik i no inap pinisim ol dispela kain pasin.

Wanpela Milenium Em Olgeta Man Bai Kisim Blesing Long En

WANPELA man bilong raitim tok long bipo tru em i bin tok: “Mipela man i no inap bosim wokabaut bilong mipela yet.” (Jeremaia 10:23) Ol man i no inap bosim ol narapela man, na tu, em i no stret ol i mekim olsem. Man i bin wokim yumi, God Jehova, em tasol i gat save inap long stretim ol hevi bilong olgeta manmeri na i stret em bai mekim.​​—⁠Rom 11:​33-​36; KTH 4:⁠11.

Tasol em bai mekim long wanem taim? Na em bai mekim olsem wanem? I gat planti samting i makim olsem yumi stap klostu long pinis bilong “taim bilong las de.” Plis opim Baibel bilong yu na kaunim 2 Timoti 3:​1-5. Em i stori stret tru long ol pasin ol man bai bihainim nau long dispela taim bilong “planti hevi nogut tru.” Matyu 24:​3-14 na Luk 21:​10, 11 i stori tu long “taim bilong las de.” Ol dispela skripsa i stori long ol samting i bin kamap bihain long yia 1914 na i kam inap long nau, olsem ol pait bilong olgeta hap bilong graun, ol bikpela sik, na ol man i sot long kaikai long planti hap.

Klostu nau “taim bilong las de” bai pinis. Daniel 2:44 i tok: “God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.” Olsem na God i bin tok profet olsem em bai kirapim wanpela kingdom, o gavman, bilong bosim dispela graun. Olsem Kamapim Tok Hait 20:4 i tok, dispela gavman bai mekim wok bos inap wan tausen yia​—⁠em wanpela milenium! Long dispela Wan Tausen Yia i stap bilong ol man bai kamap gutpela moa. Skelim sampela samting bai kamap:

Ol Samting Bilong Skin. “Ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring. Ol birua bai i no inap kam moa na rausim ol manmeri bilong mi na sindaun long ol haus bilong ol na kisim ol gaden wain bilong ol na wokim wain na dring.”​​—⁠Aisaia 65:​21, 22.

Nogat Sik. “Ol aipas bai ol i lukluk, na ol yaupas bai ol i harim toktok. Na ol lek nogut bai ol i kalap olsem ol dia, na ol mauspas bai ol i singaut na amamas.” “Bai i no gat wanpela man i tok: ‘Mi gat sik.’ ”​​—⁠Aisaia 33:​24, “NW”; 35:​5, 6.

Graun, Win na Wara. God bai “bagarapim ol man i bin bagarapim graun.”​​—⁠KTH 11:⁠18.

Pasin i Stap Namel Long Ol Man. “Long olgeta ples antap long maunten bilong Bikpela, olgeta samting bai i stap gut wantaim. Bai i no gat wanpela i mekim nogut long narapela, long wanem, olgeta samting long graun bai i save tru long Bikpela. Dispela save bai inapim olgeta hap graun.”​​—⁠Aisaia 11:⁠9.

Planti milion manmeri i bilipim ol dispela tok promis bilong Baibel, olsem na ol i kisim tingting olsem ol gutpela samting bai kamap long bihain. Na dispela i save helpim ol long karim ol hevi i save painim ol. Olsem wanem tok bilong Baibel inap stiaim wokabaut bilong yu?

Save i Bringim Man Long Laip Oltaim!

SAMPELA taim yumi kirap nogut long ol samting ol saientis i mekim na ol nupela masin samting ol i wokim! Tasol save bilong ol man i no bin givim amamas na bel isi long ol manmeri. Wanpela kain save tasol inap mekim olsem, na long Jon 17:3 Baibel i stori long dispela save olsem: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.”

Dispela kain save bai yu painim insait long Baibel. Planti man bai kamapim strongpela tingting bilong ol yet long dispela buk holi, tasol planti bilong ol i no bin skelim gut dispela buk. Olsem wanem long yu? Tru, pasin bilong kaunim Baibel em i bikpela wok. Tasol bai yu kisim gutpela samting taim yu mekim. I no gat narapela buk em “spirit bilong God yet i bin kamapim olgeta tok i stap long [en]” na ‘em i gutpela samting tru bilong skulim yumi na bilong stretim tingting bilong yumi i no stret na bilong stretim wokabaut bilong yumi na bilong skulim yumi long ol pasin i stret long ai bilong God.’​​—⁠2 Timoti 3:⁠16.

Long wanem rot bai yu inap kirap kisim save long ol tok bilong Baibel? Gutpela sapos yu kisim helpim long ol Witnes Bilong Jehova. Ol i save skulim sampela milion manmeri long Baibel, ol i mekim long haus bilong ol, no gat pe. Bilong helpim ol man, ol i save mekim wok long kain kain buk na nius em Baibel i as bilong en. Wanpela em liklik buk God i Laik Yumi Mas Mekim Wanem? Em i bekim klia planti askim bilong ol man long Baibel, olsem: God em i husat? Wanem laik bilong God long dispela graun? Kingdom bilong God em i wanem samting? Olsem wanem tok bilong Baibel inap strongim famili bilong yu?

Sapos yu laik bai wanpela Witnes Bilong Jehova i kam lukim yu long haus bilong yu yet, plis raitim nem na atres long hap daunbilo. Ol bai amamas long helpim yu long kisim sampela save moa long dispela gutpela wok Kingdom bilong God bai mekim inap 1,000 yia!

□ Salim wanpela liklik buk God i Laik Yumi Mas Mekim Wanem? long mi. Makim wanem tok ples

□ Plis kam lukim mi, mi laik stadi long Baibel, no gat pe.

[Ol Futnot]