Narapela 1,000 Yia Bai Kirap Long Wanem Taim?

OLSEM WANEM? Yu bin harim sampela i tok olsem, narapela 1,000 yia bai kirap long yia 2001 na i no long yia 2000? Ating tok bilong ol i stret olsem: Sapos mama i karim Krais Jisas long yia 1 B.C.E., olsem sampela bipo i ting, orait Disemba 31, 2000 (na i no 1999), bai makim pinis bilong 2,000 yia, na Janueri 1, 2001, bai makim kirap bilong narapela 1,000 yia.a Tasol long nau, klostu olgeta saveman i wanbel long tok olsem mama i no karim Jisas long yia 1 B.C.E. Orait, Jisas i kamap long wanem yia?

Jisas i Kamap Long Wanem Yia?

Baibel i tok mama i karim Jisas “long taim Herot i stap king,” tasol Baibel i no tokaut long yia stret em i kamap. (Matyu 2:⁠1) Tasol planti saveman bilong Baibel i ting Herot i dai long yia 4 B.C.E. na Jisas i bin kamap paslain long dispela​—⁠ating long yia 5 o 6 B.C.E. As bilong dispela tingting long yia Herot i dai em ol tok bilong saveman Flavius Josifas, em wanpela Juda i bin stap long taim bilong ol aposel.b

Josifas i tok, paslain liklik long taim King Herot i dai, san i pasim ai bilong mun. Ol saveman bilong Baibel i tok san i bin pasim hap ai bilong mun long Mas 11, 4 B.C.E., olsem na Herot i dai long dispela yia. Tasol long yia 1 B.C.E., san i pasim ai olgeta bilong mun long Janueri 8 na hap ai bilong mun long Disemba 27. Taim Josifas i tok long san i pasim ai bilong mun, em i tingim yia 1 B.C.E. o yia 4 B.C.E., em yumi no save. Olsem na yumi no ken tingim tok bilong Josifas bilong makim yia stret Herot i bin i dai. Tasol maski tok bilong em inap makim stret dispela samting, dispela yet i no inap helpim yumi long save long yia mama i karim Jisas, nogat.

Ol samting i makim tru tru taim mama i karim Jisas, em ol tok bilong Baibel. Baibel i tok kasen-brata bilong Jisas, em Jon Bilong Baptais, i kirap mekim wok profet long namba 15 yia bilong Sisar Taiberius i stap king bilong Rom. (Luk 3:​1, 2) Ol buk ol saveman i bin raitim i tok Taiberius i kamap king long Septemba 15, long yia 14 C.E., olsem na dispela namba 15 yia em i stap king em i kirap long laspela hap bilong 28 C.E. na i pinis long laspela hap bilong 29 C.E. Jon i kirap mekim wok bilong em long dispela taim, na Jisas i kirap mekim wok bilong em long graun 6-pela mun bihain long dispela. (Luk 1:​24-​31) Dispela, wantaim sampela narapela samting, i makim olsem Jisas i kirap mekim wok bilong em long Oktoba samting long 29 C.E.c Baibel i tok Jisas “i gat samting olsem 30 krismas” taim em i kirap mekim wok bilong em long graun. (Luk 3:​23) Sapos em i gat 30 krismas long Oktoba 29 C.E., orait yumi save, mama i karim em long Oktoba long yia 2 B.C.E. Orait sapos yumi skruim 2,000 yia long Oktoba bilong yia 2 B.C.E. (i no gat yia 0, olsem na kirap long yia 2 B.C.E. i go 1 C.E. em tupela yia), yumi save olsem 2,000 yia i pinis long Oktoba 1999 na narapela 1,000 yia i kirap long Oktoba 1999!

Tasol yu ting dispela samting yumi stori pinis long en em i bikpela samting? Olsem: Yu ting kirap bilong dispela narapela 1,000 yia i laik kamap em i makim kirap bilong Taim Bilong Wan Tausen Yia Bilong Krais i Stap King, em Buk Kamapim Tok Hait i stori long en? Nogat, i no olsem. Baibel i no kamapim tok bilong makim olsem dispela narapela 1,000 yia na dispela Taim Bilong Wan Tausen Yia Bilong Krais i Stap King bai kirap long wankain taim, nogat.

Jisas i toksave long lain bilong em olsem ol i no ken toktok nabaut long ol yia ol i no save long en. Em i tokim ol disaipel bilong em: “Em i no samting bilong yupela bai yupela i save long ol taim na ol de Papa i makim. Nogat. Em yet i bosim dispela ol samting.” (Aposel 1:⁠7) Paslain long dispela taim, Jisas i kamapim klia olsem em yet i no save long taim stret God bai pinisim pasin nogut bilong nau na bai rot i op long kamapim Taim Bilong Wan Tausen Yia Bilong Krais i Stap King. Em i tok: “I no gat wanpela man i save wanem de na wanem aua dispela ol samting bai i kamap. Ol ensel long heven i no save, na Pikinini tu em i no save. Papa wanpela tasol em i save.”​—⁠Matyu 24:⁠36.

Olsem wanem? I stret long yumi ken ting olsem Krais bai kam bek 2,000 yia stret bihain long taim mama i karim em? Nogat, i no stret long yumi ting olsem. Jisas i save long de na yia stret mama i karim em. Na em i save tu long pasin bilong kaunim 2,000 yia kirap long dispela de na yia. Tasol Baibel i tok em i no save long de na aua em bai kam bek. Olsem na yumi no ken ting yumi inap save long taim stret em bai kam bek! Papa tasol i bosim “ol taim na ol de”​—⁠em wanpela tasol i save long dispela de na aua.

Na tu, Jisas i no tokim ol disaipel bilong em long wet long em long wanpela hap stret long graun. Em i tokim ol olsem ol i no ken bung wantaim long wanpela hap na wet i stap; ol i mas go nabaut “inap long olgeta hap bilong graun” na mekim ol manmeri bilong olgeta lain i kamap disaipel. Em i no bin senisim dispela tok.​—⁠Aposel 1:8; Matyu 28:​19, 20.

Olsem Wanem Long Ol Samting Ol i Wetim Bihain Long Yia 2000?

Tasol sampela lain bilong lotu ol i ting bikpela samting bai kamap long yia 2000. Ol i bilip olsem long ol mun bihain, truim bilong sampela hap bilong Buk Kamapim Tok Hait bai kamap. Ol i ting ol yet bai insait long dispela truim. Ol i tingim tok profet i stap long Kamapim Tok Hait 11:​3, 7, 8, em i stori long tupela man bilong autim tok ol i mekim wok profet long “bikpela taun, yumi save tok bokis na kolim em olsem, Sodom na Isip. Em dispela taun tasol bipo ol i bin nilim Bikpela bilong tupela long diwai . . . na kilim em i dai.” Taim tupela i pinisim wok bilong autim tok, wanpela wel abus nogut bai lusim hul i no gat as na i kam antap na kilim tupela i dai.

Nius The New York Times Magazine bilong Disemba 27, 1998, i tok hetman bilong wanpela lain bilong lotu “i bin tokim ol lain bilong em olsem em i wanpela bilong dispela tupela man bilong autim tok na em i mas tokaut olsem graun bai bagarap na Bikpela bai kam bek​—⁠mekim pinis orait Satan bai kilim em i dai long wanpela rot long Jerusalem.” Ol bikman long Israel ol i tingting planti. Ol i ting sampela man bai traim long “truim” dispela tok profet​—⁠maski dispela i kamapim pait! Tasol i no olsem God i mas i gat ol man bilong “helpim” em long kamapim laik bilong em, nogat. Truim bilong olgeta tok profet bilong Baibel bai kamap long taim na long rot God yet i bin makim.

Tok bilong Buk Kamapim Tok Hait i olsem tok “i stap hait.” Olsem Kamapim Tok Hait 1:​1 i tok, Jisas i laik soim “ol wokman bilong en” (i no olgeta man long graun) ol samting i mas kamap kwiktaim. Bilong save gut long ol tok bilong Buk Kamapim Tok Hait, ol wokman bilong Krais, olsem lain bilong em, ol i mas i gat spirit holi bilong God, em Jehova i save givim long ol man i mekim ol samting em i laikim. Tasol sapos i no gat ol tok hait long dispela buk, orait ol man i no bilip ol tu inap kaunim na klia gut long ol tok bilong en. Na bai i no gat as na ol Kristen i mas beten askim God long spirit holi i ken helpim ol long kisim gut ol tok bilong en.​—⁠Matyu 13:​10-​15.

Olsem Baibel i kamapim, yumi save pinis olsem sapos yumi kaunim ol yia kirap long yia mama i karim Jisas, orait dispela narapela 1,000 yia i laik kamap, em bai kirap long Oktoba 1999​—⁠tasol dispela yia i no bikpela samting, na Janueri 1, 2000, na Janueri 1, 2001, em tu i no bikpela samting. Tasol i gat wanpela taim bilong 1,000 yia em ol Kristen i laik save long en. Em i no dispela 1,000 yia i laik kamap, nogat. Orait wanem dispela 1,000 yia yumi laik save long en? Stori i kamap bihain long dispela bai bekim dispela askim.

[Ol Futnot]

[Blok long pes 5]

2000 o 2001?

Sampela i tok olsem sapos yumi kirap long yia mama i karim Jisas na yumi kaunim ol yia i go, orait namba 3 taim bilong 1,000 yia bai kirap long Janueri 1, 2001. Bilong helpim yumi long save long as na sampela i tok olsem, orait tingim dispela tok piksa: Sapos yu kaunim buk i gat 200 pes, orait taim yu kamap long pes 200, i olsem yu pinis long kaunim 199 pes na i gat wanpela pes moa i stap bilong kaunim. Taim yu kamap long pinis bilong pes 200, orait nau yu ken tok yu pinis long kaunim buk. Na olsem tasol, inap 999 yia bilong dispela 1,000 yia nau yumi stap long en bai pinis long Disemba 31, 1999, na i gat wanpela yia moa i mas lus bilong pinisim dispela 1,000 yia. Sapos yumi skelim ol yia olsem, orait dispela 1,000 yia i laik kamap, em bai kirap long Janueri 1, 2001. Tasol olsem dispela stori i tok, sapos yumi kaunim 2,000 yia stret kirap long taim mama i karim Jisas, i no olsem dispela 2,000 yia i pinis long Janueri 1, 2001, nogat.

[Blok long pes 6]

Ol Yia B.C.-A.D. i Bin Kamap Olsem Wanem?

Bihain liklik long yia 500 C.E., Pop Jon Namba Wan i givim wok long wanpela bruda, nem bilong em Dionisius Eksigus, long kamapim wanpela kalenda bilong helpim ol misin long makim wanpela de stret long ol i ken tingim Ista.

Dionisius i kirap mekim wok. Em i kaunim ol yia i go bek inap long taim ol i ting mama i karim Jisas. Orait nau em i kaunim ol yia kirap long dispela taim na i kam. Ol yia bihain long taim Jisas i kamap, Dionisius i kolim olsem “A.D.” (olsem Ano Domini​—⁠“long yia bilong Bikpela.”) Dispela wok em i mekim i bilong kamapim wanpela de stret bilong makim Ista long olgeta yia, tasol long dispela pasin em i kamapim tu pasin bilong kaunim ol yia kirap long taim mama i karim Krais na i go.

Tru, planti saveman i wanbel long tok olsem mama i no karim Jisas long yia Dionisius i makim, tasol pasin bilong em long kaunim ol yia i helpim yumi long save long yia ol samting i bin kamap.