Baibel i Tok Wanem?

Yia 2000 i Bikpela Samting?

LONG ol kantri long hap bilong Wes na long planti narapela kantri tu, planti manmeri i ting ol samting bai kamap long yia 2000, em i no samting bilong lotu. Olsem: Ol Juda, na ol Muslim, na ol Hindu, ol i gat kalenda bilong lotu bilong ol yet, na ol dispela kalenda i no wankain olsem kalenda bilong hap bilong Wes. Bilong makim ol de bilong lotu na ol de bilong ol tumbuna, ol Saina i save mekim wok long kalenda bilong ol yet. Olsem na planti bilion manmeri long nau, ating klostu olgeta manmeri bilong graun, ol i no ting yia 2000 i bikpela samting.a

Tasol long ol kantri long hap bilong Wes, planti manmeri i wetim taim yia 2000 bai kirap, olsem kalenda bilong Gregori i makim, na ol i laik save wanem samting bai kamap long dispela yia. Tasol sampela i no tingim dispela tasol. Ol i ting, long yia 2000 nupela taim bai kirap, olsem bikpela senis bai kamap. Planti man i tok ol i bilip long Baibel, ol i ting truim bilong ol tok profet bai kamap long yia 2000. Sampela i ting wanpela bikpela samting tru bilong spirit bai kamap. Ol narapela i pret bikpela bagarap bai kamap​—⁠olsem dispela graun bai pinis. Olsem wanem? Baibel i kamapim sampela tok bilong strongim ol dispela tingting?

Jehova, Man Bilong Makim Taim

Baibel i tok, God bilong Baibel em i “Man bilong bipo bipo yet.” (Daniel 7:⁠9) Em i save bosim gut taim, na dispela i kamap ples klia long wok bilong planti samting God i bin wokim, olsem wokabaut bilong ol planet na wok bilong ol liklik samting tru i stap insait long atom. Em i makim taim bilong mekim ol samting, na em i save bihainim stret dispela. Baibel i tok: “Em yet i bin makim taim bilong ol i ken i stap, na em i bin putim mak bilong graun bilong ol.” (Aposel 17:26) Jehova em i Man bilong makim stret taim.

Olsem na Baibel i save kolim stret ol yia samting i bin kamap. Baibel i stori long ol samting i bin kamap long bipo yet na i go inap long taim namba wan man na meri i kamap. Taim ol man i skelim ol yia olsem, ol i kisim save olsem God i bin wokim Adam long yia 4026 B.C.E. Inap 2,000 yia bihain long dispela, mama i karim Abraham. Na 2,000 yia moa bihain long dispela taim, mama i karim Jisas.

Sampela man i wok long kisim save long ol yia Baibel i kolim, ol i bin tokaut long ol de na yia stret ol yet i ting samting bai kamap long en bihain. Olsem: Ol i tingim ol 2,000 yia i stap namel long Adam, na Abraham, na Jisas, na ol i tok, 2,000 yia bihain long taim mama i karim Jisas wanpela bikpela samting bai kamap. Dispela em i wanpela bilong planti tingting bilong ol man long skelim ol yia, ol i tok Baibel i as bilong en.

Tru, Baibel i stori olsem bihain God Jehova bai kirap na bagarapim ol wok nogut bilong ol man na pinisim pasin nogut, na kamapim nupela taim. Tok profet bilong Baibel i stori long “las de,” na long “pasin bilong dispela graun i laik pinis,” na “taim bilong las de,” na “De bilong God.” (Daniel 8:17; Matyu 24:​3, NW; 2 Timoti 3:​1; 2 Pita 3:12) Tasol taim Baibel i tok profet long “pinis” em i no tok pinis bai kam long yia 2000. I no gat wanpela tok long Baibel i tok olsem taim yia 2000 i laik kirap, olsem kalenda bilong Gregori i makim, dispela i bikpela samting.

“Wanem Taim Bai Ol Dispela Samting i Kamap?”

Ol aposel bilong Jisas i laik save long taim God i makim bilong ol samting i mas kamap, olsem na ol i askim Jisas: “Yu tokim mipela, Wanem taim bai ol dispela samting i kamap, na wanem mak bai kamap bilong makim olsem yu kam i stap na pasin bilong dispela graun i laik pinis?” (Matyu 24:⁠3, NW) Planti manmeri long nau i gat wankain laik, ol tu i laik save long ol samting bai kamap bihain. I stret yumi gat laik long save long ol bikpela tok profet bilong Baibel, na long taim truim bilong en i kamap. Tasol em i savepasin long bilip na daun long tingting bilong God long dispela samting.

Long rot bilong Pikinini bilong em, Jehova i kamapim tingting bilong em na em i bekim stret dispela askim. Paslain liklik long taim Jisas i go bek long heven, ol disaipel i askim em gen long taim truim bilong ol tok promis bilong God bai kamap. Jisas i bekim tok olsem: “Em i no samting bilong yupela bai yupela i save long ol taim na ol de Papa i makim. Nogat. Em yet i bosim dispela samting.” (Aposel 1:⁠7) Paslain long dispela taim, Jisas i tokim ol disaipel olsem: “Tasol i no gat wanpela man i save wanem de na wanem aua dispela ol samting bai i kamap. Ol ensel long heven i no save, na Pikinini tu em i no save. Papa wanpela tasol em i save.”​—⁠Matyu 24:⁠36.

Tru tumas, ol man i no inap bosim “ol taim na ol de,” na bikpela samting moa ol i no inap bosim taim truim bilong ol tok profet bilong Baibel bai kamap. God i no laik kamapim dispela save long yumi. (Matyu 24:​22-44) Olsem wanem? Yumi inap stiaim laik bilong God taim yumi yet i skelim ‘de na aua,’ maski em i no laik yumi mekim olsem? Yumi save yumi no inap mekim olsem. (Namba 23:19; Rom 11:​33, 34) Baibel i tok: “Tasol taim Bikpela i tok long mekim wanpela samting, orait tok bilong en i stap strong oltaim.” (Song 33:11) Em i God i gat olgeta strong, olsem na olgeta taim laik bilong em i kamap tru.​—⁠Aisaia 55:​8-11.

Maski God i gat strong long bosim “ol taim na ol de,” planti man i laik toktok nabaut yet long ol de na yia. Long laik bilong ol yet sampela i kamap profet bilong tokaut long samting nogut tasol bai kamap. Long dispela as aposel Pol i skulim ol Tesalonaika long ol samting nogut inap painim ol, sapos ol i putim yau long tok bilong ol man i save toktok nabaut long ol de na yia. Em i tok: “Mipela i laik bai yupela i putim yau gut long dispela tok bilong mipela. Ating sampela man i tokim yupela long De bilong Bikpela i kamap pinis. Ating wanpela man i ting Holi Spirit i givim dispela kain tok profet long em, o wanpela man i autim tok bilong God na i mekim dispela tok, o wanpela man i tok mipela i bin raitim pas i gat kain tok olsem i stap long en. Tasol maski yupela i bin harim dispela kain tok long wanem hap, yupela i no ken kirap nogut kwiktaim na pilim hevi long tingting bilong yupela. Yupela i no ken larim wanpela man i giamanim yupela long tok bilong en o long pasin em i mekim.”​—⁠2 Tesalonaika 2:​1-3.

Ol Witnes Bilong Jehova i bilip tru olsem, ol samting God i laik mekim long bihain bai kamap long taim bilong em, long de na aua stret em i bin makim. (Habakuk 2:3; 2 Pita 3:​9, 10) Na mipela i bilip olsem ol dispela samting bai kamap klostu nau. (2 Timoti 3:​1-5) Tasol mipela i no toktok nabaut long dispela o helpim ol kain kain tingting bilong nau.b Tru tumas, yia 2000 o yia 2001, o narapela yia ol man yet i makim, ol i no stret wantaim ol det Jehova i makim.

[Ol Futnot]