Bihain Long Yia 2000—Bai Yu Inap Kisim Gutpela Sindaun?
OL MAN i wokim bikpela klok na pasim long banis bilong wanpela kain haus skul long Bobek, long biktaun Paris, long kantri Frans. Dispela klok i makim hamas liklik hap minit, olsem sekon, i stap yet i go inap long biknait long Disemba 31, 1999. Long dispela taim bai yia 2000 i kamap, na kirap long dispela yia i go inap long yia 3000, em wanpela nupela taim bilong 1,000 yia i kamap.
Wanpela man bilong skelim pasin bilong ol man, em Profesa Bernward Joerges bilong Berlin, long Jemani, em i tok: “Yia 2,000 em i wanpela yia planti man tru i wet long en, winim olgeta narapela samting ol i bin wet long en.” Tasol yia 2000 em wanpela yia em bai kamap na i go pinis wankain olsem ol narapela yia, olsem na bilong wanem ol man i gat bikpela tingting long dispela yia? Na ol man i bihainim kalenda bilong hap bilong Wes, ol tasol i tingim dispela yia. Long kalenda bilong lotu Muslim, dispela yia 2000 em i yia 1420; na long kalenda bilong ol Juda, em i yia 5,760 bihain long taim God i bin wokim man.
Tasol wanpela man bilong wanpela nius bilong Swiden (Dagens Nyheter) em i bin toktok wantaim dispela profesa na profesa i tok, ‘Ol kantri long hap bilong Wes i bin i go kisim ol narapela kantri na ol i bosim, na bipo i gat ol bikman o king i bosim planti lain. Long dispela rot kalenda bilong Wes (Gregorian), em i kirap long yia ol i ting mama i bin karim Jisas long en, dispela kalenda i go kamap long planti hap bilong graun na nau planti lain ol i bihainim.’ Olsem na yia 2000 bai kamap wanpela bikpela yia bilong planti man tru long olgeta hap bilong graun. Dispela profesa i tok: “Olgeta man bai tingim dispela yia i bikpela samting long i stap bilong ol yet na long olgeta narapela samting tu.”
Tasol planti man i no tingting tasol olsem dispela yia i makim wanpela taim nating. Nogat. Dispela profesa i tok, ‘Ol man i wok long tingim kain kain bikpela samting ol i ken mekim bilong makim dispela taim na amamas long en, na ol i kirap pinis long redim ol dispela samting.’ Na em i tok, ‘Long olgeta hap bilong graun, ol man bilong tingim rot bilong mekim wok bisnis na ol man bilong kamapim ol so, ol i wok long tingim ol bikpela bikpela samting ol i ken mekim long dispela taim.’ Sampela man i ting bai ol man i raitim planti tumas buk bilong stori long ol samting i bin kamap insait long 100 yia i kamap paslain long dispela yia. Na ol i ting bai ol nius na redio na televisen i putim planti stori tru long dispela nupela taim bilong 1,000 yia em bai kirap long yia 2000. Wanpela lain bilong televisen long Wes Jemani ol i tingting long ol bai wok inap 24 aua long putim piksa bilong san i kamap long ol narapela narapela hap bilong graun long namba wan de bilong dispela yia.
Na yumi save, long ol nius na long redio na televisen bai ol i putim bikpela stori long laspela pikinini i kamap long yia 1999 na namba wan pikinini i kamap long yia 2000. Na ol man bilong raitim stori long ol nius bai ol i wok strong long painim ol wan wan man, em mama i bin karim ol long 1890 samting na ol i stap yet long yia 2000. Ol i laik bai ol dispela man i ken stori long i stap bilong ol long dispela bikpela hap taim ol i bin i stap long en! Sampela man i ting olgeta dispela planti toktok na stori na so samting long taim bilong yia 2000 bai kirapim tumas bel bilong planti man na paulim tingting bilong ol na bai ol i longlong nabaut. Sampela man i ting samting nogut tru bai kamap, olsem: Ol i ting long 12 klok biknait long Disemba 31, long yia 1999, bai planti man i kirap na kilim i dai skin bilong ol yet.
Tru ol man i tingting long mekim planti tumas samting bilong makim yia 2000 i kamap, tasol i gat as na planti man i gat bikpela tingting long dispela yia. Planti man i les long ol hevi bilong nau na ol i ting long dispela nupela taim bilong 1,000 yia gutpela taim i mas kamap. Sampela i ting olsem bikpela save bilong graun ol man i kisim bai helpim ol long kamapim gutpela taim, na bai yumi inap kisim gutpela kaikai, na i stap planti yia moa, na yumi no ken lusim planti aua long mekim ol wok bilong skin olsem yumi mekim long nau—bai yumi gat bikpela hap taim bilong malolo. Ol i ting long dispela gutpela taim bai ol masin i mekim ol wok ol man i les long mekim, na bai ol saveman inap wokim rot bilong tanim wara i kamap bensin samting. Ol i ting bai i gat narapela kain televisen, em piksa bilong en i olsem samting tru, na bai i gat ol narapela kain telefon, em yu inap lukim man yu toktok wantaim em, na bai i gat ol masin bilong salim tok na piksa i gat kala, na ol telefon i tanim tok wantu tasol. Ol i ting bai ol inap i go raun long Mun o Mars o narapela sta samting long antap, na bai ol inap kisim silva o gol samting i stap long en.
Tasol planti man i ting bai i no gat gutpela taim i kamap. Sampela man bilong skelim ol samting na kisim save ol i ting olsem long dispela nupela taim bilong 1,000 yia bai ol lain man i kamap planti tumas na bai i no gat rot bilong pasim dispela samting, na bai graun na win samting i bagarap. Ol i ting bai win bilong graun i bagarap, na bai olgeta hap bilong graun i kamap olsem traipela ples hat. Long nau bikpela ais i karamapim sampela hap, tasol ol man i ting bihain dispela ais bai tanim i kamap wara, na bai solwara i go bikpela na i karamapim ol hap bilong graun i gat gaden na ol man i stap long en, na bai bikpela hap graun bilong wokim gaden i bagarap na i kamap olsem ples nating. Ol i ting ol wok bisnis bai bagarap na bai mani i no gat strong moa, na bai ol lain politik i bruk nabaut na dispela bai bagarapim ol gavman na sindaun bilong ol man. Ol i ting pasin raskol bai go bikpela olgeta na i no gat rot bilong pasim. Na ol i ting samting nogut moa yet bai kamap, olsem: Ol i ting bai bikpela pait nuklia i kamap na bai olgeta man meri pikinini long graun i bagarap.
Em, ol dispela man i kolim planti samting ol i ting bai i kamap, tasol ol i no save tru long ol samting bai kamap long dispela nupela taim bilong 1,000 yia kirap long yia 2000 i go inap long yia 3000. I gat planti samting ol i no save long en, olsem na ol i no inap kolim stret ol samting bai kamap long dispela taim.
Yumi no save wanem samting tru bai kamap long yia 2000; yumi mas wetim dispela yia i kamap pastaim. Tasol i no olsem yu no inap save wanem samting inap painim yu long bihain. Baibel i makim olsem wanpela bikpela taim tru bilong 1,000 yia i laik kamap, i winim tru dispela taim bilong 1,000 yia em bai kirap long yia 2000. Long dispela Taim Bilong 1,000 Yia em Baibel i tok long en, gutpela taim tru bai kamap, i winim gutpela taim ol man i bin ting long en! Orait, wanem samting tru bai kamap long dispela Taim Bilong 1,000 Yia? Mipela laik bai yu kaunim tok i kamap bihain long dispela bambai yu ken save long ol tok bilong Baibel long dispela samting.