Ol i Hariap Tumas o Ol i Bihaintaim Tumas?

LONG nau planti man i toktok long yia 2000 na long narapela 1,000 yia i laik kamap, kirap long taim mama i bin karim Krais Jisas. Nius Newsweek i tok, ‘taim bilong yumi em i bin kirap olsem Taim Bilong Pait, na em i kamap olsem Taim Bilong Nuklia, na i olsem pinis bilong en bai em i Taim Bilong Amamas.’ Dispela nius bilong Janueri 22, 1997, i tok: “Long olgeta hap, ol man i kisim pinis olgeta rum long ol hotel bilong amamas long Disemba 31, 1999, em de paslain long nupela yia i laik kirap.”

Tasol sampela man i tok, ol man i hariap tumas bilong amamas long laspela de bilong yia 1999. Ol i tok, maski planti man i ting narapela 1,000 yia bai kirap long Janueri 1, 2000, em bai kirap long Janueri 1, 2001. I no gat yia 0, olsem na namba wan taim bilong 100 yia i bin kirap long yia wan i go inap long pinis bilong yia 100, na namba tu taim bilong 100 yia i bin kirap long yia 101 i go inap long pinis bilong yia 200, olsem olsem. Olsem na ol i tok, taim bilong yumi em i bin kirap long Janueri 1, 1901, na namba tu taim bilong ol 1,000 yia i bin kirap long Janueri 1, 1001, na dispela bai go i go inap long pinis bilong Disemba 31, 2000.

Na yumi mas tingim narapela samting. Kalenda bilong yumi i save brukim ol yia paslain long taim mama i bin karim Jisas na bihain long en. Olsem na ol saveman i bilip olsem mama i bin karim Jisas paslain long taim ol i bin ting em i kamap, olsem na dispela i mekim na yia dispela kalenda i makim i no stret. Ol man i gat narapela narapela tingting long taim mama i karim Jisas, olsem na yia bilong ol samting i bin kamap olsem Baibel i makim, em i makim yia 2 B.C.E. olsem yia em i bin kamap. Long dispela pasin bilong kaunim ol yia, namba tri taim bilong wan tausen yia bihain long taim Krais i kamap, em i kirap tru long Oktoba samting bilong dispela yia! Kirap! (tok Inglis) bilong Me 22, 1997 long pes 28, na bilong Disemba 8, 1976, pes 19, em i gat sampela tok moa bilong dispela samting.a

Tasol yumi no ken tokaut stret olsem namba tri taim bilong 1,000 yia bai kirap inap long sampela wik bihain, nogat. Tasol tingting bilong planti man i mekim, olsem na Kirap! i ting i stret sapos long dispela taim yumi toktok long “Taim Bilong Yumi​—⁠Ol Yia Bilong Bikpela Senis.”

[Futnot]