2000—Yu Ting Dispela Yia i Bikpela Samting?
OLSEM WANEM? Yia 2000 i bikpela samting? Ol man i stap long ol kantri long hap bilong Wes ol i ting em namba wan yia bilong narapela 1,000 yia i laik kamap. Ol man i wok long redim kain kain bilaspasin bilong tingim dispela yia. Ol i wok long sanapim ol traipela klok bilong makim hamas sekon i stap yet i go inap long yia 2000 i kamap. Ol i wok long stretim rot long kamapim ol bikpela bikpela danis long laspela de bilong yia 1999. Ol stua long ol liklik ples na ol bikpela stua long ol biktaun i save salim ol T-siot i gat rait long en bilong makim pinis bilong dispela 1,000 yia nau yumi stap long en.
Ol bikpela lotu na ol liklik lotu tu, ol bai insait long ol bung bilong amamas i kamap insait long yia 2000. Bihain liklik long yia 2000 i kamap, ol i ting Pop John Paul Namba Tu bai go long Israel na mekim wok olsem gopas bilong ol Katolik insait long wanpela bung bilong ‘Lotu Katolik bilong tingim yia 2000.’ Ol i ting olsem tu na hap milion i go inap 6 milion turis—ol man i givim bel long lotu na ol man i kam lukluk tasol—ol bai kam long Israel long yia 2000.
Bilong wanem planti manmeri i gat tingting long kam long Israel? Wanpela bikman bilong Vatiken na mausman bilong Pop, kadinal Roger Etchegaray, em i tok: “Yia 2000 i bilong tingim Krais na i stap bilong em long dispela kantri. Olsem na i stret Pop i kam long hia.” Olsem wanem Krais i insait long dispela yia 2000? Ol man i ting yia 2000 i makim 2,000 yia stret bihain long taim mama i karim Jisas. Tasol dispela tingting bilong ol i stret o olsem wanem? Orait nau bai yumi skelim dispela samting.
Yia 2000 i bikpela samting moa yet long lain bilong sampela lotu. Ol i bilip olsem long yia 2000 o yia 2001, Jisas bai kam bek long maunten Oliv, na pait bilong Armagedon em Buk Kamapim Tok Hait i stori long en, em bai kamap long ples daun bilong Megido. (KTH 16:14-16) Olsem na planti handet man long Amerika ol i wok long salim haus na planti samting bilong ol na ol i go sindaun long Israel. Bilong helpim ol man i no inap lusim Amerika, ol i tok wanpela man i gat nem long autim tok bilong lotu em i tok promis pinis long kamapim stori bilong kambek bilong Jisas long televisen—i gat kala kala long en!
Long ol kantri long hap bilong Wes, ol i wok strong long redim ol samting bilong tingim dispela narapela tausen yia. Tasol long ol narapela kantri ol man i no save mekim olsem—ol i stap tasol long mekim ol samting ol i save mekim long olgeta taim. Ol dispela man—ol i planti tru—ol i no bilip olsem Jisas bilong Nasaret em i Mesaia. Na ating ol i no bihainim pasin bilong kaunim ol yia yumi kolim B.C.-A.D.a Olsem: Planti Muslim i bihainim kalenda bilong ol yet, na long dispela kalenda, yia antap long dispela yia, em yia 1420—i no 2000. Ol Muslim i kaunim ol yia kirap long taim profet Mohamet i ranawe lusim Meka na i go long Medina. I gat 40 narapela narapela kain kalenda ol man long olgeta hap bilong graun i save bihainim.
Olsem wanem? Yia 2000 i bikpela samting long ol Kristen? Tru Janueri 1, 2000, em i bikpela de? Stori i kamap bihain long dispela bai bekim ol dispela askim.
[Futnot]
a Pasin bilong kaunim ol yia olsem B.C.-A.D. i olsem: Ol yia paslain long taim ol i tok mama i karim Jisas ol i save makim olsem “B.C.” (paslain long Krais); ol yia i kamap bihain long dispela, ol i makim olsem “A.D.” (Ano Domini—“long yia bilong Bikpela.”) Tasol sampela saveman i laik makim olsem “B.C.E.” na “C.E.”