Helpim Ol Man i Bin Harim Tok Taim Yumi Tilim Kingdom Nius Namba 36
1 Olsem wanem? Yu tilim pinis olgeta Kingdom Nius Namba 36 ol i bin makim bilong yu long tilim? Em i kamapim wanpela askim i stret long taim bilong yumi na olgeta man i ken tingting long en, olsem: “Nupela Milenium—Wanem Samting Bai Painim Yu Long Bihain?” Taim yia 2000 i wok long kam klostu, ol man i gat kain kain tingting long samting bai kamap long dispela nupela milenium. Kingdom Nius Namba 36 i kamapim sampela tingting bilong ol man na i tokaut olsem ol hevi i kamap long graun i no givim tingting long yumi olsem bihain gutpela taim bai kamap. Tasol wanpela samting bai kamapim bel isi na gutaim em planti man i wok long painim, em dispela Taim Bilong Wan Tausen Yia Bilong Krais i Stap King. Yumi bilip olsem dispela Kingdom em i samting tru na dispela i bin kirapim yumi long tilim Kingdom Nius Namba 36 long olgeta man.
2 Tingting Bilong Ol Man Long Kingdom Nius: Ol Kingdom Nius yumi bin tilim long bipo i kamapim klia olsem ol i gutpela samting bilong helpim wok bilong yumi. Brens-ofis long Kanada i stori long wok bilong tilim Kingdom Nius Namba 35 olsem: “Ol pablisa na ol painia i amamas tru long helpim dispela wok bilong tilim dispela nius long ol man, na ol i amamas long kisim planti gutpela ekspiriens.” Ating yu tu i bin amamas tru long tilim Kingdom Nius Namba 36.
3 Hap taim mipela i makim bilong tilim Kingdom Nius long dispela yia bai pinis long Novemba 17, 2000. Olsem wanem? Yupela i pinisim olgeta teritori ol i makim bilong kongrigesen bilong yupela? Sapos nogat, orait ol elda i ken askim yupela long mekim dispela wok i go inap long pinis bilong Novemba.
4 Ol man long hap bilong yu ol i gat wanem tingting long wok bilong tilim Kingdom Nius Namba 36? Wan wan man bai raitim nem na atres long hap i stap long baksait bilong Kingdom Nius bilong kisim buklet Yumi Mas Mekim Wanem? o ol i toksave olsem ol i laik stadi long Baibel. Tasol planti man i bin amamas long harim ol tok bilong Kingdom Nius ol bai i no inap mekim wanpela samting inap long taim wanpela Witnes Bilong Jehova i go bek lukim ol. Yumi mas i go na lukim gen olgeta man i bin harim tok. Wanem taim em i gutpela taim bilong mekim olsem? Yumi mas i go bek lukim ol hariap.
5 Harim ol ekspiriens bilong samting i bin kamap taim ol Witnes i go bek lukim ol man i bin kisim Kingdom Nius Namba 35. Wanpela painia long Aialan i bin tilim Kingdom Nius long bos bilong wanpela haus kaikai. Dispela meri i pilim tru dispela tok na em i askim sista long i kam bek lukim em. Bihain long 2-pela de sista i go bek lukim em na em i kirapim Baibel-stadi. Long Denmak ol Witnes i lusim wanpela Kingdom Nius long wanpela haus i no gat man. Long dispela de yet, meri i save sindaun long dispela haus i salim hap pepa i stap long baksait bilong Kingdom Nius i go long brens-ofis, na brens-ofis i salim dispela pepa i go long wanpela kongrigesen long dispela hap. Long dispela wik yet, 2-pela sista i go lukim dispela meri, ol i stretim rot bilong mekim stadi, na dispela meri i go long miting long Haus Kingdom long namba wan taim!
6 Ol Tok Yu Ken Mekim Taim Yu Go Bek: Wok bilong mekim gobek long ol man yumi tilim Kingdom Nius long ol em i no hatwok na yumi inap amamas long dispela wok bilong yumi. Taim yu mekim gobek em i gutpela long kisim wanpela Kingdom Nius Namba 36 wantaim yu, nogut man bilong haus i no holim nius em i bin kisim. Yu ken mekim ol dispela tok.
7 Taim yu tokim man bilong haus pinis olsem yu bin kam lukim em bipo, orait yu ken tok:
◼ “Mi bin lusim wanpela nius wantaim yu, nem bilong en ‘Nupela Milenium—Wanem Samting Bai Painim Yu Long Bihain?’ Ating yu bin amamas long kaunim olsem klostu nau Taim Bilong Wan Tausen Yia Bilong Krais i Stap King bai kirap, na em bai kamapim Paradais hia long graun, a? [Soim piksa bilong Paradais i stap long Kingdom Nius Namba 36.] Long baksait ol i putim tok olsem yu ken askim mipela long kisim wanpela buklet God i Laik Yumi Mas Mekim Wanem?” Soim buklet long em, tanim i go long stadi 5 na kaunim namba wan askim na kaunim paragraf 1 na 2, givim askim long man bilong haus na bai em i bekim sampela tok. Kaunim wanpela o tupela skripsa na stori long en. Sapos inap, kaunim narapela askim na paragraf, na stretim tok long go bek long narapela taim bilong stori wantaim em.
8 Long mun Novemba bai yumi tilim buklet “Yumi Mas Mekim Wanem?” o buk “Save,” olsem na ating yu ken tok:
◼ “Taim mi kam lukim yu i no longtaim i go pinis, mi bin givim yu wanpela nius ‘Nupela Milenium—Wanem Samting Bai Painim Yu Long Bihain?’ Em i kirapim ol man long mekim Baibel-stadi i no gat pe. Mi kam bek bilong soim yu long samting bilong helpim yu long stadi em mipela i save mekim wok long en. [Soim em buklet Yumi Mas Mekim Wanem?, na tanim buklet i go long baksait; o soim buk Save long em na opim long pes 188, 189.] Dispela Wan Tausen Yia Bilong Krais i Stap King em Baibel i toktok long en em bai kamapim ol samting olsem i stap long dispela piksa. Bilong i stap long Paradais, yumi mas kisim stretpela save long God. Plis, mi laik soim yu inap sampela minit long olsem wanem mipela i save stadi long Baibel.”
9 Wok bilong tilim Kingdom Nius Namba 36 i bin kirapim yumi long wok strong moa long autim tok, na yumi bin autim tok long planti man tru. Yumi save dispela i bin kirapim planti manmeri long teritori long harim sampela tok moa. Taim yumi olgeta i wanbel wantaim na wok strong long go lukim ol man i laik harim tok, orait Jehova bai helpim yumi, na bai yumi inap painim planti manmeri i olsem sipsip.—Mt 10:11; Ap 13:48, 49, 52.