Go Bek Lukim Ol Man i Bin Amamas Long Kisim Kingdom Nius
1 Inap sampela wik nau, yumi bin amamas long tilim Kingdom Nius Namba 35, nem bilong en “Olsem Wanem? Bihain Bai Olgeta Man i Laikim Tru Ol Narapela?” Long olgeta hap, ol pablisa i wok strong long toktok wantaim planti gutpela man long dispela Kingdom Nius. (Mt 10:11) Maski wok bilong tilim Kingdom Nius i mas pinis long Sande, Novemba 16, sapos i gat sampela teritori yupela i no wokim yet, ol elda bai askim yupela long tilim yet Kingdom Nius Namba 35 i go inap long ol nius long kongrigesen i pinis olgeta.
2 Dispela Kingdom Nius i bin kirapim tingting bilong planti manmeri. Ol i lukim olsem ol manmeri i lusim pinis pasin bilong laikim ol narapela olsem na ol i tingting planti long wanem samting bai painim ol long bihain. (2 Ti 3:3) Yumi laik i go bek lukim ol man i amamas long ol tok bilong dispela nius.
3 Kingdom Nius i Kamapim Ol Gutpela Samting: Long taim bilong tilim Kingdom Nius long 1995, wanpela meri i kisim wanpela nius em i kam long miting long Haus Kingdom, long wanem, em i laik kisim sampela save moa long ol samting ol Witnes Bilong Jehova i bilip long en. Long dispela miting em i orait long ol brata i stadi long Baibel wantaim em na bihain long dispela em i no lusim wanpela miting. I no longtaim bihain, em i raitim pas i go long lotu bilong em na rausim nem bilong em long dispela lotu!
4 Inap long nau, planti handet manmeri long teritori i kaunim pinis ol tok bilong Kingdom Nius Namba 35. Tasol ol i gat wanem tingting long en? Maski ol i wanbel long ol tok ol i bin kaunim, planti bai i no mekim wanpela samting inap long taim wanpela Witnes Bilong Jehova i go lukim ol gen. Yu makim taim long i go bek lukim ol? Sapos yumi sori na tingim ol narapela man, dispela bai kirapim yumi long mekim olsem. Yumi mas i go bek lukim olgeta man i bin amamas long kisim wanpela Kingdom Nius.
5 Taim Yu Go Bek, Bai Yu Tok Wanem? Yu ken mekim sampela tok long olsem wanem ol tok bilong Kingdom Nius i makim stret taim bilong yumi, na nau kamapim wanpela askim em inap kirapim tingting bilong man. Putim gut yau taim man bilong haus i toktok bambai yu inap save gut long tingting bilong em. Nau soim wanpela tok i stret long toktok bilong em long buklet Yumi Mas Mekim Wanem?, em dispela buklet Kingdom Nius i tokaut long en. Sapos man i amamas long harim tok, traim long kirapim Baibel-stadi long dispela taim stret.
6 Em hia sampela tok yu ken mekim taim yu go bek bilong lukim ol man i bin amamas long kisim “Kingdom Nius” Namba 35:
◼ “Ating yu inap tingim dispela nius mi bin lusim wantaim yu i no longtaim i go pinis. Ol tok bilong en i stori long wanpela bikpela samting i brukim ol manmeri long taim bilong yumi—ol i no gat pasin bilong laikim ol narapela.” Soim em ol tok i kamapim dispela samting olsem i stap long pes 2 bilong Kingdom Nius, aninit long het-tok “Ol Man i Lusim Pinis Pasin Bilong Laikim Tru Ol Narapela.” Nau yu ken askim em, “Yu ting em laik bilong God long ol manmeri i stap olsem?” Larim man i bekim tok. Opim buklet Yumi Mas Mekim Wanem? long Stadi 5, na traim long kirapim Baibel-stadi. Tilim buklet long 40 toea.
◼ “Taim mi bungim yu long namba wan taim, mi lusim wanpela nius wantaim yu. Em i tok: ‘Olsem Wanem? Bihain Bai Olgeta Man i Laikim Tru Ol Narapela?’ Yu ting kain samting olsem inap kamap long bihain?” Larim man i bekim tok. Opim buklet Yumi Mas Mekim Wanem? long Stadi 6, na kaunim paragraf 6. Nau kaunim tok promis bilong God i stap long Maika 4:3, 4. Tilim buklet long 40 toea na tokim em yu laik mekim Baibel-stadi wantaim em, i no gat pe.
◼ “Taim mi bin kam lukim yu long pastaim, mi lusim wanpela nius wantaim yu nem bilong en, ‘Olsem Wanem? Bihain Bai Olgeta Man i Laikim Tru Ol Narapela?’ Nius i tok, mipela i laik mekim Baibel-stadi wantaim ol man long haus bilong ol, i no gat pe. Mi kam bek bilong soim yu wanpela buk mipela i save mekim Baibel-stadi long en. [Soim em buk Save.] Dispela buk i stori gut long taim olgeta manmeri bai laikim tru ol narapela, na em i bekim ol askim ating yu tingting planti long en: Bilong wanem yumi go lapun na yumi dai? Bilong wanem God i larim pen na hevi i stap? Wanem samting i painim ol famili bilong yumi i dai pinis?” Nau yu ken askim em, “Inap mi soim yu long pasin bilong mekim stadi?” Sapos man i no laik stadi, askim em, em i laik kisim wanpela buk long K1.50 tasol bilong em i ken kaunim. Tingting long go bek lukim em gen.
7 Taim yumi tilim pinis Kingdom Nius Namba 35 long olgeta hap bilong teritori, orait yumi ken tilim buk Save long laspela hap bilong Novemba. Bilong painim ol gutpela tok yumi ken mekim bilong tilim dispela buk, lukim laspela pes bilong Wok Kingdom bilong Mas, Jun, na Novemba 1996, na Jun 1997.
8 Dispela wok bilong tilim Kingdom Nius i mas kirapim yumi olgeta long mekim bikpela wok moa long wok autim tok. Yumi ken bilip tru olsem sapos Jehova i helpim yumi, dispela wok bilong tilim Kingdom Nius bai kamap gutpela, na em bai helpim ol manmeri long kisim save olsem God i laik bai ol manmeri i mas i gat pasin bilong laikim tru ol narapela. Jehova i ken blesim wok yumi mekim bilong go bek lukim ol man i bin amamas long kisim Kingdom Nius.