Toktok Wantaim Ol Man Long Jehova Long Olgeta De
1 Ol man i save amamas long stori long ol samting bel bilong ol i laikim tumas, long wanem, maus i save autim ol tingting i pulap long bel. (Lu 6:45b) Bel bilong yu i laikim tumas wanem samting? Man bilong raitim Song i tok: “Bai mi tokaut long stretpela pasin bilong yu, na litimapim nem bilong yu oltaim, long san na long nait.” (Sng 35:28) Em i laikim tru Jehova na em i ting wok bilong toktok wantaim ol man long Jehova na litimapim nem bilong Em long olgeta taim em wanpela gutpela wok tru. Man bilong raitim Song i save gut long Jehova, olsem na em i gat planti gutpela samting em i save amamas long en. (Sng 35:9) Olsem wanem yumi ken bihainim gutpela pasin bilong em?
2 Toktok Wantaim Famili Bilong Yu Long Jehova: Long olgeta wan wan de yumi mas toktok wantaim famili bilong yumi long Jehova. Ol papamama i laikim tumas Jehova ol bai toktok long em taim ol i mekim wok bilong ol. (Lo 6:5-7) Taim ol i mekim olsem, ol pikinini bai lukim olsem papamama i bihainim bilip bilong ol na ol i amamas long lo bilong God. Olsem na ol pikinini bai tingim famili-stadi em i samting i kamapim klia tru olsem papamama i givim bel long God.—2 Pi 3:11.
3 Toktok Wantaim Ol Brata Long Jehova: Taim yumi mekim wok bilong God long olgeta wan wan wik, yumi gat planti rot bilong givim kaikai bilong spirit long bel na tingting bilong yumi. Yumi no sot long ol gutpela samting yumi ken stori long en. (Lu 6:45a) Olsem wanem? Yu painim wanpela tok long stadi bilong yu yet o long taim yu kaunim Baibel em yu amamas tru long en? Stori long dispela tok long ol brata, dispela bai helpim ol long laikim Jehova moa yet.—Sng 35:18; Hi 10:24.
4 Toktok Wantaim Ol Narapela Long Jehova: Taim yumi wok wantaim ol man long olgeta wan wan de—long ples wok o long skul o wantaim ol wanfamili i no stap long tok i tru—yumi mas kamapim long ples klia olsem wok bilong toktok wantaim ol man long Jehova em i nambawan samting long i stap bilong yumi. Yumi no laik mekim ol tok nogut na ol tok doti bilong dispela graun, nogat, yumi laik mekim ol tok i litimapim nem bilong God. Long olgeta wan wan de, yumi mas painim rot bilong toktok wantaim ol narapela long gutnius God i laik bai yumi mas autim.—Ap 5:42; Kl 4:6.
5 Yumi ol man i lotu tru long Jehova, long olgeta wan wan de yumi mas painim rot bilong toktok wantaim ol man long nambawan gutpela God bilong yumi Jehova.—Sng 106:47.