Ol i Wari Taim Yu No Stap!
1 Sampela taim yumi lusim wanpela o sampela miting na yumi ting ‘sapos mi no go long miting, no gat wanpela i wari long mi; na tu ol i no save mi stap long miting o nogat.’ Tasol dispela tingting i no stret! Olsem olgeta hap bilong bodi bilong yumi i gat wok bilong en, yumi wan wan i gat bikpela wok bambai kongrigesen i ken wok gut. (1 Ko 12:12) Taim yumi no stap long wanpela miting, dispela inap nogutim ol narapela i kam long miting long ol samting bilong spirit. Taim yu no stap long miting, yu ken save tru olsem—ol i wari long yu!
2 Bikpela Wok Bilong Yu: Pol i gat bikpela laik long bung wantaim ol brata bilong em. Rom 1:11, 12 i stori olsem: “Mi laik givim sampela presen bilong Holi Spirit long yupela . . . Mi laik bai bilip bilong yupela i ken helpim mi na bilip bilong mi i ken helpim yupela tu, na dispela i ken strongim bel bilong yumi olgeta wantaim.” Na olsem tasol, taim yumi stap long miting na long rot bilong ol bekim bilong yumi, na long tok yumi kamapim long pletfom, yumi save strongim ol narapela long mekim yet wok bilong Jehova.—1 Te 5:11.
3 Yu amamas na wet long lukim ol narapela long ol miting bilong kongrigesen, a? Yu putim gut yau na amamas long ol bekim bilong ol i kamapim bilip bilong ol. Presen bilong spirit ol i givim i save strongim bilip bilong yu. Sapos ol i no stap long miting, bai yu tingting planti. Ol brata na sista ol i pilim olsem tu taim yu no stap long miting.
4 Bikpela Wok Bilong Ol Miting: Wanpela taim Wastaua i stori long bikpela wok bilong ol miting bilong helpim yumi long stap strong long ol samting bilong spirit. Em i tok: “Ol pasin bilong dispela graun i nogut na i gat planti hevi, olsem na kongrigesen Kristen i olsem ples hait. . . . Em i gutpela ples tru na bel isi i stap long en. Olsem na gutpela sapos yu go long olgeta miting.” (w93 8/15 11) Long olgeta de planti samting i kamap bilong daunim yumi long ol samting bilong spirit. Sapos yumi no was gut, yumi bai tingim tasol ol wari bilong yumi na yumi no tingim ol samting bilong spirit. Yumi olgeta i mas i gat ol narapela brata bilong strongim yumi bambai yumi inap i stap wanbel na wok strong yet long mekim wok bilong God.—Hi 10:24, 25.
5 Yumi mas go long ol miting, em bikpela samting. Tru, sik o sampela hevi inap pasim yumi, olsem na sampela taim yumi no inap go long miting. Tasol sapos nogat, olgeta taim yumi mas tingting strong long stap namel long ol manmeri i bung bilong litimapim nem bilong Jehova!—Sng 26:12.