Baibel i Tok Wanem?
God i Save Fogivim Ol Bikpela Sin?
PASIN marimari em i wanpela bikpela pasin bilong God. (Song 86:15) Em i save marimari inap long wanem mak? Man bilong raitim song i tok: “Sapos yu kaunim olgeta sin bilong mipela bai husat inap long winim kot bilong yu? Tasol yu save rausim ol sin bilong mipela, olsem na mipela i mas pret long yu.” (Song 130:3, 4) Narapela ves i tok: “Hap bilong sankamap em i no klostu long hap bilong san i go daun. Em i longwe tru. Olsem tasol God i save rausim sin bilong yumi na sin i stap longwe tumas. Papa i save sori long ol pikinini bilong en. Olsem tasol Bikpela i save sori long ol manmeri i pret long em. Em i save olsem em i bin kisim graun na wokim yumi na em i tingim yumi i olsem das tasol.”—Song 103:12-14.
Em i klia tru olsem taim Jehova i fogivim sin em i lusim olgeta, na em i save long skel bilong yumi long mekim ol samting na em i save yumi no gutpela olgeta—yumi “das tasol.” Nau bai yumi skelim sampela eksampel long Baibel i soim bikpela pasin marimari bilong God.
Aposel Pita i tok 3-pela taim olsem em i no save long Krais. (Mak 14:66-72) Paslain long Pol i kamap Kristen em i bin mekim nogut long ol disaipel bilong Krais. Taim ol i laik kilim i dai sampela disaipel, Pol tu i tok long ol i mas i dai. Em i bin orait tu long ol man i kilim i dai disaipel Stiven. (Aposel 8:1, 3; 9:1, 2, 11; 26:10, 11; Galesia 1:13) Paslain long ol i kamap Kristen, sampela manmeri bilong kongrigesen long Korin i bin stap olsem ol man bilong spak, pulim mani bilong ol arapela, na ol stilman. (1 Korin 6:9-11) Tasol bihain God i bin orait long olgeta bilong ol dispela manmeri. Wanem as na God i fogivim ol?
Tripela Samting Bilong Mekim na God i Ken Marimari
Pol i tok: “Mi bin mekim ol dispela pasin, long wanem, mi no bin save gut long em na mi no bilip long em. Olsem na em i sori long mi.” (1 Timoti 1:13) Tok Pol i mekim i kamapim namba wan samting man i mas mekim bilong God i ken fogivim em—man i mas kisim stretpela save long Jehova na long ol lo bilong em i stap long Baibel. (2 Timoti 3:16, 17) Tru tumas, yumi no inap mekim Man Bilong Wokim yumi i amamas sapos yumi no save gut long em. Long prea Jisas i mekim long Papa em i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.”—Jon 17:3.
Taim ol man i gat gutpela bel i kisim dispela save, ol i sori tru long ol rong ol i bin mekim na ol i tanim bel tru. Dispela em i namba tu samting man i mas mekim bilong God i ken fogivim em. Aposel 3:19 i tok: “Yupela i mas. . . tanim bel [“na baut,” NW ], na bai God i rausim ol sin bilong yupela.”
Dispela ves i kolim namba tri samting—man i mas baut. Mining bilong dispela tok baut i olsem man i givim baksait olgeta long olpela pasin na tingting bilong em na em i bihainim ol lo na tingting bilong God. (Aposel 26:20) Olsem na taim man i senis na bihainim nupela pasin, dispela i kamapim klia olsem em i tok tru taim em i tokim God olsem, “Mi sori long rong bilong mi.”
Marimari Bilong God i Gat Mak Bilong En
I gat sampela man God i no save fogivim sin bilong ol. Pol i tok: “Sapos yumi kisim save pinis long tok tru bilong Krais, na bihain, long laik bilong yumi yet yumi wokabaut long pasin bilong sin, orait i no gat narapela ofa moa i stap bilong tekewe dispela sin. Nogat. Bai yumi pret nogut tru na wetim de bilong bikpela kot.” (Hibru 10:26, 27) Dispela tok “long laik bilong yumi yet yumi wokabaut long pasin bilong sin” i makim olsem man i no gat laik long tanim bel, na tingting nogut i pulap long bel bilong ol.
Judas Iskariot i kisim kain tingting olsem. Jisas i tok: “Mobeta mama i no bin karim dispela man.” (Matyu 26:24, 25) Na Jisas i stori long sampela hetman bilong lotu long taim bilong em, olsem: “Yupela i pikinini bilong papa bilong yupela, em Satan . . . Tok giaman em i save mekim, dispela em i tok bilong em stret. Em i man bilong tok giaman, na em i papa tru bilong pasin bilong tok giaman.” (Jon 8:44) Wankain olsem Satan, ol dispela man i nogut olgeta. Ol i no tanim bel long ol sin ol i mekim, nogat. Ol i go moa nogut na ol i strong long bihainim pasin nogut.a Tru, ol gutpela Kristen i save mekim sin bikos ol i gat ol laik na tingting nogut em sin bilong Adam i kamapim, na sampela taim ol i mekim ol bikpela sin. Tasol taim ol i pundaun dispela i no makim olsem ol i man nogut na ol i strong long mekim pasin nogut, nogat.—Galesia 6:1.
Jisas i Marimari i Go Inap Long Taim Em i Dai
Jehova i no lukluk tasol long sin man i mekim, nogat, em i lukluk tu long tingting bilong man i mekim sin. (Aisaia 1:16-19) Tingim tupela man nogut i bin hangamap klostu long Jisas. Tupela wantaim i bin mekim bikpela rong. Wanpela bilong tupela i bin tok: “Mitupela i kisim hevi inap stret long ol pasin mitupela i bin mekim. Tasol dispela man hia em i no bin mekim wanpela rong.” Tok dispela man nogut i mekim i soim olsem em i gat sampela save long Jisas. Na dispela save i helpim em long senisim tingting. Dispela i kamap ples klia long tok em i mekim long Jisas, em i tok: “Taim yu kamap king, yu ken tingting long mi.” Jisas i bekim wanem tok long dispela man husat i kamapim bel bilong em? Jisas i tok: “Mi tok tru long yu tude, Yu bai stap wantaim mi long Paradais.”—Luk 23:41-43; NW.
Tingim: Insait long ol laspela tok Jisas i bin mekim taim em i stap long graun, em ol tok i kamapim pasin marimari em i mekim long wanpela man nogut husat i tok i stret long em i mas i dai. Dispela i mas strongim tru bel bilong yumi! Olsem na yumi ken save tru olsem Jisas Krais na Papa bilong em, Jehova, bai sori long ol man husat i tanim bel tru, maski ol i bin mekim wanem rong.—Rom 4:7.
YU LAIK SAVE?
◼ Bai yu tok wanem long marimari bilong God?—Song 103:12-14; 130:3, 4.
◼ Man i mas mekim wanem 3-pela samting bilong God i ken orait long em?—Jon 17:3; Aposel 3:19.
◼ Jisas i mekim wanem tok promis long wanpela man nogut i hangamap klostu long em?—Luk 23:43, NW.
[Futnot]
a Lukim stori “Yu Bin Mekim Sin Long Holi Spirit?” long Wastaua bilong Julai 15, 2007, pes 16-20.
[Piksa long pes 10]
Jisas i soim olsem God inap fogivim ol bikpela sin