Nius i Kam Long Olgeta Hap

◼ Long Saina ol i bin kisim tingting bilong ol man long lotu, na inap 31.4 pesen bilong ol manmeri i winim 16 krismas i tok ol i man bilong tingim lotu. Sapos dispela i kamapim tingting bilong ol manmeri long olgeta hap bilong Saina, dispela bai makim olsem ‘inap 300 milion manmeri i save tingim lotu. Dispela i narapela kain long namba em gavman i kolim, em i tok inap 100 milion manmeri bilong Saina i save tingim lotu.’​​​—⁠CHINA DAILY, SAINA.

◼ “Namba bilong ol bagarap em bikpela win na ren i mekim i go bikpela tru namel long 1970 i go 1990, winim bilong bipo. Ating dispela i kamap, long wanem, graun i kamap hat moa o sampela narapela samting i as bilong dispela.”​​—⁠THE ECONOMIST, BRITEN.

Pasin Bilong Wari Taim Meri i Gat Bel

Ol saveman long nau i kisim save olsem wari em meri i gat bel i kisim taim em i tok pait wantaim man bilong em o sapos man i paitim em, dispela inap mekim na kru bilong pikinini i stap long bel i no kamap gut. Profesa Vivette Glover, bilong Imperial College, London, i tok: “Mipela i kisim save olsem sapos man bilong meri i mekim ol samting i bagarapim tingting bilong meri taim em i gat bel, dispela bai mekim na taim pikinini i wok long kamap bikpela, tingting bilong em bai i no wok gut tumas. Papa i gat bikpela wok long helpim pikinini long kamap gut.” Dispela profesa i tok, pasin bilong papamama long pas gut wantaim “i mekim sampela samting long ol homon na marasin i stap long blut bilong mama, na dispela i mekim sampela samting long kru bilong bebi, olsem em bai kamap gutpela o nogat.”

Wanpela Weil i Bin Stap Laip Longpela Taim

Taim sampela asples lain bilong Alaska i kilim wanpela kain weil (bowhead whale) long 2007, ol i painim nus na ol hap bilong olpela spia i pas long skin bilong em. Nius The Boston Globe i tok, ol dispela samting i “hap bilong spiagan em ol i bin wokim long New Bedford [Massachusetts, Amerika] long 1890 samting. I no longtaim bihain na ol i no yusim moa ol dispela kain spiagan, olsem na ol saveman bilong New Bedford Whaling Museum i ting, ol i bin sutim dispela weil long spiagan “namel long 1885 na 1895.” Olsem na taim dispela weil i dai, em i gat 115 krismas samting. Nius Globe i tok, dispela samting ol i painim i strongim moa “dispela tingting em longtaim ol man i holim pinis, olsem dispela kain weil i wanpela animal i save stap laip longpela taim tru, winim olgeta narapela animal. Em inap i stap inap 150 yia.”

Het i Pen Inap 64 Yia

Wanpela meri Saina i kisim save long as na “het bilong em i save pen oltaim.” Em i bin karim dispela hevi winim 60 yia, na nau ol dokta i rausim wanpela 3 sentimita bulet long het bilong em. Taim ol Japan i bin kam pait long wanpela ples long provins Xinyi long Septemba 1943, dispela meri i gat 13 krismas long dispela taim, na em i bin kisim bagarap long het. I no gat wanpela i save long as bilong hevi bilong em. Lain bilong nius Xinhua i tok, taim het pen bilong em i go nogut moa, X-rei i soim olsem i gat bulet i stap insait long het bilong em. Dispela meri i gat 77 krismas nau, na ol i tok em i “stap orait.”

Painim Olpela Wain Long Graun

Nius Kathimerini​​—⁠English Edition i tok, planti turis moa i save go raun long Masedonia, em wanpela hap bilong Yugoslavia long bipo, ‘bilong painim nambawan gutpela olpela wain em sampela lain soldia bilong Wol Woa 1 i bin lusim long dispela hap.’ Planti man i kam ol i bilong Frans, ol i gat ol mep na ol i digim graun long ol hap we ol lain ami i bin putim ol samting bilong ol. Ol botol wain i stap yet insait long graun ol i bin stap 90 yia samting, na dispela nius i tok, ‘pe bilong wanpela botol i stap gut yet em inap olsem 2,000 yuro (8,000 kina).’ Ol asples lain husat i bin digim graun na kisim ol botol wain na strongpela dring konyak, ol i tok “ol i nambawan tru, winim olgeta wain na konyak ol i bin traim long bipo.”