Wanem Ol Hevi Inap Kamap?

YUMI no ken ting i no gat wanpela hevi inap kamap insait long marit. Maski pasin na laik bilong tupela marit i wankain, i no olgeta taim ol bai wanbel. Olsem na yumi save sampela kain hevi bai kamap. Olsem ros i stap aninit long peint inap wok long bagarapim ka, ol samting inap kamap na wok long bagarapim marit. Bilong save long ol samting yumi ken mekim bilong helpim marit, pastaim yumi mas skelim sampela hevi em ol inap kamap.

Taim Bilong Bikpela Hevi

Baibel i tok profet long planti manmeri long taim bilong yumi ol bai i ‘laikim ol yet tasol, laikim tumas long kisim mani, litimapim nem bilong ol yet na hambak nabaut, i no tok tenkyu, givim baksait long ol pasin bilong God, i no stap pren bilong ol arapela, kros, tok nogut long ol arapela, i no bosim laik bilong bodi, pait, birua, mekim nogut long ol pren bilong ol yet, bihainim kwik olgeta kranki tingting bilong ol yet, tingim ol yet i bikpela man.’ (2 Timoti 3:​2-4) Ol kain pasin olsem inap mekim na planti taim ol marit bai kisim tingting kranki long narapela narapela, ol i no toktok gut, o ol i mekim sampela tok nogut olsem yumi ol man i gat sin i save mekim.

Wanpela man bilong skelim hevi bilong marit i tok, ‘planti marit i paul, long wanem, ol i ting marit bilong ol i mas i stap gut, tasol ol i gat planti hevi. Long nau i gat planti kain kain tok long olsem wanem yumi ken strongim marit, tasol i gat ol kain kain hevi i kamap long sindaun bilong yumi na hevi bilong mani tu na yumi hatwok tru long strongim marit.’

Sampela Tingting Kranki

Wanpela meri bilong helpim ol marit em i tok: “Planti i kisim tingting kranki long ol samting bilong marit, na dispela em i wanpela bikpela as tru na ol i no amamas long marit bilong ol.” Planti marit i bel hevi taim ol i lukim olsem marit i no givim bikpela amamas long ol olsem ol i bin tingim, na poroman bilong ol i no kain man o meri olsem ol i bin tingim. Ol i bel hevi stret long sampela pasin kranki bilong poroman em pastaim ol i no bin lukim, o nau ol i luksave olsem dispela pasin kranki i bikpela tru.

Tasol Baibel i tokaut stret olsem ol marit inap “painim planti hevi long laip bilong ol.” (1 Korin 7:28) Bilong wanem? Wanpela as, em tupela wantaim i no gutpela olgeta, olsem na bihain ol pasin kranki bilong tupela bai kamap ples klia.

Na tu, planti i laik kisim ol amamas bilong marit, tasol ol yet i no wok strong long mekim marit bilong ol i stap amamas. Ol i tingting tasol long amamas ol bai kisim, na ol i no tingting long bikpela wok ol i mas mekim bilong kamapim amamas insait long marit. Bihain, taim ol i lukim olsem ol i no kisim amamas bilong marit olsem ol i bin tingim, ol inap bel hevi na tingting planti. Sapos pastaim ol i ting marit bai inapim tru laik bilong ol na ol bai stap amamas tasol, bihain bel hevi bilong ol bai bikpela moa taim ol samting i no kamap olsem ol i bin tingim.

Ol i No Toktok Gut Wantaim

Long pasin bilong toktok wantaim, ol marit i ken abrusim wanem ol pasin kranki bambai ol i ken strongim marit? Sampela marit i no putim gut yau long tok bilong poroman marit, na ol i no toktok gut wantaim na kamapim ol tingting i stap long bel. Narapela i no mekim gut long narapela olsem lewa tru bilong em​—⁠ol i pes drai na toktok tasol long ol samting bilong haus na wok. Planti taim ol i tok pait long olgeta kain liklik samting. Narapela i kisim tingting kranki long tok bilong narapela, ol i kirap tok kros i go i kam, na bihain ol i pasim maus na i no toktok.

Sori tru, planti marit i no lukim ol gutpela pasin bilong poroman, o ol i lukim tasol ol i no tok amamas long poroman long ol dispela gutpela pasin bilong em. Na long nau planti maritmeri i save mekim wok mani, olsem na ol i bel nogut long ol i mas mekim olgeta wok bilong haus na wok mani tu. Na planti meri i pilim olsem man bilong ol i no save mekim gut bel bilong ol olsem lewa tru bilong ol.

Yu ken mekim wanem na bai marit bilong yu i ken kamap gutpela? Tingim ol gutpela tok bilong Baibel i kamap bihain long dispela stori.

[Rait long pes 4]

Sampela marit i no putim gut yau long tok bilong poroman marit, na ol i no toktok gut wantaim

[Rait long pes 5]

Planti ol i laik kisim ol amamas bilong marit tasol ol yet i no laik wok strong long mekim marit bilong ol i kamap gutpela