Ol Wokboi Nating Bilong Saut Pasifik

DISPELA STORI I KAM LONG FIJI

BIKPELA lain manmeri i amamas tru taim ol i lukim tupela sip i ron i kam long liklik ailan bilong ol long hap bilong Saut Pasifik. Sampela yia paslain, wanpela sip i bin bruk long rip na wanpela man i abrusim bagarap i bin givim olgeta wan wan famili long dispela ailan sampela pes em i bin rausim long Baibel bilong em. Ol i amamas tru long ritim ol dispela pes na nau ol i wetim wanpela tisa Kristen i kam.

Orait nau ol boskru bilong dispela tupela sip i tok promis long kisim ol i go long wanpela hap we ol i ken kisim sampela save moa long God. Inap 250 manmeri i kalap long sip. Planti bilong ol i holim strong ol pes bilong Baibel ol i bin kisim.

Tasol sori tru, ol boskru i bin giamanim ol. Taim ol i kalap pinis, ol boskru i pasim ol long rop, tromoi ol i go daunbilo long hasis, na kisim ol i go long wanpela longwe ples, em Callao long Saut Amerika. Ol dispela sip i doti nogut tru, olsem na planti i bin i dai. Pasin bilong paulim meri i stap. Taim tupela sip i kamap pinis long Saut Amerika, ol i salim ol lain i stap yet olsem wokboi nating bilong mekim wok long ol plantesen na main, o bilong mekim wok olsem hausmeri o hausboi. Ol i no bin go bek long ailan bilong ol.

Wok Bisnis Bilong Kisim Ol Wokboi Nating

Namel long 1800 na 1900 samting, wanpela wok i kamap bilong stilim ol asples bilong Saut Pasifik. Long 1862 i go 1863, ol lain insait long dispela wok ol i salim planti tausen manmeri i go long Saut Amerika. Insait long 10-pela yia bihain, ol i stat long salim ol asples bilong Saut Pasifik i go long Australia. Long 1867, Ross Lewin, bipo em i insait long nevi, em i salim ol strongpela wokboi i go long ol man bilong planim suga na koten. Em i salim ol long 7-pela paun wanwan.

Gavman bilong Inglan i laik pasim wok bilong stilim ol asples bilong Saut Pasifik, tasol ol i no inap. Wanpela as i olsem: I hatwok long subim ol lain bilong narapela kantri long bihainim lo bilong Inglan. Na narapela as: Lo bilong Inglan i no tokaut klia tumas long pasin bilong kisim ol wokboi nating. Olsem na long kot, ol lain bilong dispela bisnis i save tok olsem, tru ol i bin giamanim na stilim ol asples, tasol ol dispela asples i no wokboi nating tru tru, long wanem, ol i insait long wanpela kontrak na ol bai kisim pe, na bihain, ol bai go bek long ples. Na sampela i tok, long rot bilong kisim ol i kam aninit long lo bilong Inglan na skulim ol long mekim wok, ol i save helpim ol dispela asples em bipo ol i haiden! Olsem na inap sampela yia, dispela wok bisnis i go bikpela.

Senis i Kamap

Senis i stat long kamap taim ol man i gat gutpela pasin ol i tokaut olsem ol i agensim dispela wok bisnis. Tru, sampela asples i orait long go long narapela kantri na mekim wok, tasol pasin bilong stilim na subim ol long mekim wok, em samting ol man i no orait moa long en. Na ol i no orait moa long pasin bilong mekim nogut long ol, olsem wipim ol na kukim hap skin bilong ol long hatpela ain na bai i gat mak i stap. Na tu, ol i no orait moa long sindaun na ples wok bilong ol, em i nogut tru.

Narapela samting i helpim dispela senis i kamap hariap, em taim ol asples i kilim i dai J. C. Patteson, em wanpela bisop bilong Misin Angliken. Dispela man i laik helpim ol​—⁠em i agensim dispela pasin bilong kisim ol wokboi nating. Samting i bin kirapim ol long kilim em, i olsem: Ol man bilong stilim ol asples i bin wokim wanpela giaman. Ol i bin stretim wanpela sip na bai lukluk bilong en i wankain olsem sip bilong Patteson na ol i kamap long ailan paslain long em. Ol i singautim ol asples i kam long sip bilong bungim dispela bisop. Ol wanples i stap yet long ailan i no lukim ol gen. Bihain, taim Patteson i kamap long ailan, ol dispela wanples i popaia na ting em i gat asua. Ol i kros nogut tru na kilim em i dai olsem pe bek. Dispela samting​—⁠wantaim ol lain i agensim dispela wok bisnis​—⁠i kirapim gavman bilong Inglan na Frans long putim sampela sip bilong nevi long hap bilong Pasifik bilong stopim wok bilong stilim ol asples.

Gavman bilong New South Wales na Queensland i wok wantaim gavman bilong Inglan na kamapim ol nupela lo bilong stopim pasin bilong mekim nogut long ol wokboi na bilong helpim ol asples em ol i insait long kontrak. Ol i putim ol inspekta na ol wokman bilong gavman long ol sip i save go kisim ol wokboi. Hatwok bilong ol i no lus nating, long wanem, nau ol inap kotim ol lain bilong dispela bisnis long pasin bilong stilim na kilim ol asples, na i no long pasin bilong kisim ol olsem wokboi nating. Bihain long 1890 i kam inap 1900, senis i kamap long Saut Pasifik. Pasin bilong stilim ol asples i wok long pinis, ol i stilim wan wan tasol.

Long 1901, nupela palamen bilong Australia i kirap bosim imigresen bilong kantri olgeta. Ol lo bilong en i bihainim tingting bilong planti man em ol i no amamas moa long ol wokman bilong ol narapela kantri i kam mekim wok, nogut ol Australia yet i no gat wok. Ol i no laik bai ol wokman bilong Saut Pasifik i stap, maski ol i insait long kontrak o nogat. Ol i subim planti tausen i go bek long ol ailan bilong ol, na dispela i kamapim sampela hevi moa, long wanem, nau ol i mas lusim hap ol i bin sindaun long en longpela taim na nupela famili bilong ol.

Nau Ol i Tingim Ol Dispela Wokboi Nating

Long Septemba 2000, gavman bilong Queensland i kamapim wanpela tokaut na putim long wanpela ples klia we olgeta man inap lukim. Em i tokaut long bikpela wok ol dispela asples i bin mekim bilong helpim wok bisnis na sindaun bilong ol man bilong Queensland. Na tu, em i tok sori long pasin nogut ol lain i bin mekim long ol.

Long bipo yet i kam inap long nau, planti man i bin mekim wok long ol narapela bilong kisim planti mani, maski dispela i bin tekewe fridom bilong ol na bagarapim i stap bilong ol. Baibel i tok promis olsem aninit long Kingdom Bilong God, bai i no gat kain pasin olsem. Olgeta manmeri i stap aninit long dispela gavman bilong heven, ol “bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret.”​​—⁠Maika 4:⁠4.

[Diagram/Map on page 25]

(Bilong save ol dispela rait i stap we long pes, lukim buk o magasin)

Ol rot ol sip i bihainim bilong i go long Australia na Saut Amerika

SOLWARA PASIFIK

MAIKRONESIA

OL AILAN MASAL

New Guinea

OL AILAN SOLOMON

TUVALU

AUSTRALIA KIRIBATI

QUEENSLAND VANUATU

NEW SOUTH WALES NU KALEDONIA SAUT AMERIKA

Sydney ← FIJI → Callao

SAMOA

TONGA

OL AILAN KUK

FRENS POLINESIA

Ailan Ista

[Piksa Kredit Lain long pes 24]

National Library of Australia, nla.pic-an11279871