Autim “Gutnius” Long Ol Ailan Bilong Australia Long Hap Not
JISAS i tok: “Bai ol i autim dispela gutnius bilong kingdom bilong God long olgeta hap bilong graun.” (Matyu 24:14) Ol Witnes Bilong Jehova i bihainim tok bilong Jisas na ol i wok strong long autim tok bilong Baibel long ol man, maski ol i stap we. (Matyu 28:19, 20) Ol i volantia long mekim dispela wok, na sampela taim ol i gat hatwok tru na ol i lusim mani bilong ol yet bilong mekim dispela wok.
Nathan na Carly i bin senisim sampela samting long sindaun bilong ol bambai ol i ken autim tok long ol manmeri i stap long ol ailan Torres Strait. Long 2003, wanpela mausman bilong brens ofis bilong ol Witnes Bilong Jehova long Australia i singautim tupela long i go sindaun long ailan Thursday bilong wok wantaim kongrigesen long dispela hap. Dispela ailan i insait long wanpela longpela lain ailan i stap long blupela solwara Pasifik namel long Australia na Papua Niugini (PNG).
Long 2007, dispela famili i baim wanpela olpela bot bilong ol lain bilong kisim ol pel long solwara, nem bilong bot em Teisan-Y. Long mani bilong ol yet, ol i stretim gut ol samting bilong bot na i kirap mekim ol raun bilong autim tok long ol lain bilong 10-pela ailan i stap longwe tru, na ailan Thursday em ples ol i save stap long en na i go i kam. Em stori bilong sampela raun bilong ol.
Janueri 2008: Long tete, mi kisim dingi i go long Bamaga—em 80 kilomita raun bilong i go na kam—bilong kisim 6-pela Witnes bilong dispela hap. Nau mipela i stap long bot Teisan-Y, na mipela i laik i go long ol ailan Warraber na Poruma. Bensin i pulap long ol tenk—inap 5,500 lita, pe bilong wanpela lita em 2 dola. Bot i ran isi isi, olsem 10 kilomita insait long wanpela aua. Tasol em i gutpela taim tru, na solwara i stap isi.
Taim mipela i kamap long ailan, mipela i tromoi anka klostu long nambis, na mipela wantaim sampela boskru i gat ol wanblut i stap long ailan Warraber i kalap long dingi. Orait nau mipela i go lukim kaunsil bilong ailan bilong kisim tok orait long autim tok. Em i wanpela pasto, tasol em i larim mipela i toktok wantaim ol lain i stap long ailan. Mipela i mekim wankain pasin long ailan Poruma na ol i larim mipela i autim tok. Ol manmeri i gat pasin pren na ol i amamas long ritim ol buk na nius bilong mipela. Mipela i kirapim planti Baibel stadi.
Epril 2008: Mipela i mekim wanpela raun bilong i go long ailan Dauan, Saibai, na Boigu—em 3-pela ailan i stap longwe tru, klostu long boda bilong Papua Niugini. Tasol bikpela win na si i kirap na mipela i go long ailan Mabuiag. Dispela ailan i no longwe long ailan mipela i save stap long en—inap 70 kilomita—tasol mipela i mas baut baut bilong abrusim planti rip, olsem na mipela i ron inap 140 kilomita.
Wanpela traipela si i rausim dingi long Teisan-Y na karim i go. Mipela i baut namel long traipela si bilong i go kisim bek dingi. Bel bilong planti i tantanim na ol i traut.
Long Mabuiag, mipela i kisim tok orait long autim tok long ailan, na ol asples i amamas na sekanim mipela, olsem na mipela i lusim tingting long hatwok bilong kamap long dispela ailan. Wanpela meri i amamas tru long harim tok bilong Baibel, na em i kisim sampela buk na nius moa bambai em i ken putim long laibreri we em i save wok long en.
Me i go inap Oktoba 2008: Traipela si i mekim na mipela i no inap i go long ol ailan. Olsem na mipela i autim tok long ailan mipela i stap long en, na mekim wok mani, na stretim ol samting long bot.
I gat planti samting bilong stretim long bot, olsem na mipela i go long taun Weipa long bikples, we ol sip i save sua long en, na mipela i kisim traipela trela na pulim bot i kam long nambis. Em i hatwok tru long mekim! Ol Witnes bilong kongrigesen long dispela hap ol i kam helpim mipela long mekim ol wok olsem plama, peintim bot, na wok kapenta. Sampela i kukim kaikai na karim i kam. Na sampela i bringim kaikai bilong mipela i ken kisim long narapela raun bilong autim tok. Ol i givim bikpela helpim tru long mipela.
Disemba 2008: Mipela i kirapim gen raun bilong i go long Dauan, Saibai, na Boigu. Mipela i mekim wok long masin reda na abrusim ol bikpela win na ren, na narapela masin i helpim mipela long abrusim ol rip. Mipela i mas lusim 12-pela aua bilong kamap long Dauan, na em i naispela ailan tru, winim olgeta narapela ailan mipela i bin lukim. Ol traipela maunten i go antap na klaut i karamapim het bilong ol. Ol lain bilong Dauan i amamas long harim tok bilong mipela, na mipela i stretim rot bilong stadi wantaim ol long Baibel long rot bilong telefon taim mipela i go bek long ples.
Wanpela meri bilong dispela ailan, nem bilong em Lettie, bipo em i bin kisim sampela nius bilong mipela na em i salim tok olsem em i laikim sampela nius moa. Brens ofis long Australia i salim ol nius i go long em na i salim tu wanpela pas long kongrigesen bilong mipela na i askim mipela long traim painim em. Mipela i painim Lettie na mipela i amamas long samting mipela inap mekim bilong inapim laik bilong em long kisim save long Baibel.
Long ailan Saibai, kaunsil i no larim mipela i go autim tok long ol asples. Tasol em i larim sampela boskru bilong mipela i go lukim ol wanblut bilong ol long ailan na autim tok long ol. Mi gat kontrak wantaim gavman long peintim ol haus long Saibai, na dispela i helpim mipela long baim ol samting bilong mekim ol dispela raun.
Wanpela sista bilong mipela, Tassie, em i bilong wanpela ples long PNG, dispela ples i stap klostu long Saibai inap olsem 4-pela kilomita. Gavman bilong Australia i orait long ol PNG i ken kam long Saibai na wok bisnis long salim na baim ol samting. Tassie i bungim planti wanples bilong em, na em i no gat planti nius na buk inap long olgeta. Dispela em i namba wan taim Tassie i lukim sampela wanples bilong em, bihain long em i bin kamap wanpela Witnes Bilong Jehova. Mipela i go bek long bot na bringim long em wanpela katon i gat planti buk na nius long Tok Pisin. Tassie i kamapim tok bilong Baibel long winim 30 manmeri bilong PNG, na ol man i laikim dispela tok ol i pinisim olgeta buk na nius i stap long katon. Bot tasol em rot bilong i go long ples bilong ol, olsem na ating bipo i no gat wanpela Witnes Bilong Jehova i bin go autim tok long ples bilong ol.
I hatwok tru long i go long laspela ailan, em Boigu. Mipela i stap longwe long nambis inap 4-pela kilomita, na solwara i daun inap 2.5 mita tasol. As bilong bot i go daun insait long wara inap olsem 1.8 mita. Mi na wanpela boskru i raun long dingi bilong painim wanpela rot bilong go kamap long ailan. Bikpela ren i kam daun na mipela i wet olgeta! Tupela aua bihain, mipela i painim wanpela rot.
Taim mipela i kamap long ailan, ol asples i kirap nogut na i tok ol sat mi holim i no makim stret ol ples, na ol polis bilong raun long bot na nevi tu, ol i no save kam insait long dispela hap. Kaunsil i no orait long mipela i autim tok, tasol em i larim ol boskru i gat ol wanblut long ailan long ol i go lukim ol na autim tok long ol. Mipela i daun long tok bilong kaunsil na mipela i go lukim ol famili tasol. Wanpela man i kisim buk Tru Tru Baibel i Tok Wanem?,a na wantu em i kirap ritim na em i raitim sampela askim long baksait bilong Baibel bilong em. Bihain dispela man i go long ailan Thursday na em i bungim gen ol Witnes.
Janueri 2009: Mipela i go bek long ailan Moa na Mabuiag bilong toktok gen wantaim ol man husat i bin i gat laik long harim tok bilong Baibel. Long tupela ailan hia, ol man i amamas tru long mipela i kam. Planti long ples St. Paul long ailan Moa i tokim mipela olsem mipela i no ken wet longtaim bilong kam bek lukim ol. Kaunsil i tok mipela i ken kam autim tok long dispela ples long wanem taim mipela i laikim.
Long Torres Strait i gat 17 ailan i gat ol man i stap long en. Mipela i no save bai mipela inap autim tok long olgeta manmeri i stap long ol dispela ailan o nogat. Tasol mipela olgeta long kongrigesen hia long ol ailan bilong Australia long hap not i amamas long mekim olgeta samting mipela inap mekim bilong litimapim nem bilong Bikpela Man Bilong Wokim yumi, em Jehova.
[Futnot]
a Ol Witnes Bilong Jehova i wokim.
[Mep long pes 23]
(Bilong save ol dispela rait i stap we long pes, lukim buk o magasin)
AUSTRALIA
Weipa
Bamaga
OL AILAN TORRES STRAIT
PAPUA NIUGINI
[Kredit Lain]
Based on NASA/Visible Earth imagery
[Mep long pes 24, 25]
Bamaga
Ailan Thursday
Ailan Moa
Ailan Warraber
Ailan Poruma
Ailan Mabuiag
Ailan Saibai
Ailan Dauan
Ailan Boigu
PAPUA NIUGINI
[Kredit Lain]
Based on NASA/Visible Earth imagery
[Piksa long pes 24]
Mipela sua long ailan Thursday
[Piksa long pes 24]
Mipela i wokabaut i go lukim ol man long ailan Saibai
[Piksa long pes 25]
Autim gutnius long Tok Pisin