Baibel i Tok Wanem?
I Gat Rong Long Kukim Bodi Bilong Daiman?
Sampela man i ting olsem pasin bilong kukim bodi bilong daiman, dispela pasin i no soim rispek long bodi. Ol i tok ‘ol haiden i as bilong dispela pasin na ol man husat i tok ol i lotuim God, ol mas sakim dispela pasin.’ Sampela narapela i ting pasin bilong kukim bodi bilong daiman, em i gutpela na stretpela rot bilong mekim long bodi bilong daiman. Yu gat wanem tingting long dispela?
LONG taim bilong ol man i bin raitim Baibel, ol i gat pasin bilong planim bodi bilong daiman. Olsem: Abraham i bin planim bodi bilong meri bilong em, Sara, insait long hul bilong ston. Ol i bin putim bodi bilong Jisas long hul em ol i bin katim bilong ston. (Stat 23:9; Matyu 27:60) Yu ting Baibel i tok dispela pasin tasol em i stretpela rot bilong planim daiman? Olsem wanem? Tok bilong Baibel i makim olsem ol wokman bilong God long bipo ol no orait long pasin bilong kukim bodi bilong daiman long paia?
Yu Ting Dispela Pasin i Makim Olsem God i No Orait Long Ol?
I gat sampela ves long Baibel em taim yu ritim long namba wan taim, yu inap ting olsem pasin bilong kukim bodi bilong daiman, em samting ol i save mekim long bodi bilong ol man em God i no orait long ol. Olsem: Lo Bilong Moses i tok, sapos pikinini meri bilong wanpela pris bilong Jehova i kamap pamukmeri, ol i mas kilim em i dai na “kukim em long paia.” (Wok Pris 20:10; 21:9) Na taim pasin bikhet bilong Akan na famili bilong em i mekim na ol Israel i lus long pait long Ai, ol wantok bilong ol i tromoi ston long ol na kilim ol i dai, na bihain “kukim ol.” (Josua 7:25) Sampela saveman i tok pasin bilong kukim bodi bilong daiman em pasin ol i save mekim long ol man i mekim ol bikpela rong—long dispela rot ol i no planim ol long pasin i soim rispek long bodi bilong ol.
Na tu, taim King Josaia i rausim ol giaman god long Juda, em i brukim ples matmat bilong ol pris em ol i bin mekim ofa long god Bal na em i kukim ol bun bilong ol antap long ol alta bilong ol. (2 Stori 34:4, 5) Yu ting ol dispela stori i makim olsem belhat bilong God i stap yet long ol man em ol i bin kukim ol? Nogat. Dispela samting i kamap ples klia long narapela stori bilong Baibel.
Taim ol Filistia i winim King Sol bilong Israel long pait na kilim em na tripela pikinini bilong em i dai, ol i bin mekim pasin nogut tru na nilim bodi bilong ol long banis bilong taun Betsan. Tasol ol Israel bilong taun Jabes long Gileat ol i harim tok long dispela pasin nogut tru ol Filistia i mekim long bodi bilong Sol na ol pikinini bilong em, na ol i go rausim bodi bilong ol na kukim, na bihain ol i planim ol bun bilong ol. (1 Samuel 31:2, 8-13) Taim man i ritim dispela stori long namba wan taim, i luk olsem dispela stori i strongim dispela tingting olsem taim ol man nogut i dai ol i save kukim bodi bilong ol. Ating sampela inap ting olsem, long wanem, Sol tu i bin mekim pasin nogut, em i bin pait long Devit, em man Jehova i makim long kamap king, na long taim Sol i dai God i no bin orait long em.
Tasol tingim man husat i bin dai wantaim Sol. Wanpela bilong ol dispela pikinini man em ol i bin mekim wankain pasin long bodi bilong em, em Jonatan. Jonatan i no man nogut. Em i gutpela pren tru bilong Devit na sapota bilong em. Ol Israel i luksave olsem: “God i bin helpim em [Jonatan].” (1 Samuel 14:45) Taim Devit i harim stori long pasin bilong ol Israel bilong Jabes, em i amamas na tenkyu long gutpela pasin ol i bin mekim. Em i tok: “Bikpela i ken mekim gut long yupela, long wanem, yupela i bin mekim gutpela pasin long Sol, king bilong yupela.” Dispela i kamapim klia olsem, Devit i no gat tok long ol i bin kukim bodi bilong Sol na Jonatan long paia.—2 Samuel 2:4-6.
I No Pasim Man Long Kirap Bek
Baibel i tokaut klia olsem God Jehova bai kirapim bek olgeta man i dai pinis em ol i slip nau long matmat. (Saveman 9:4, 5, 10; Jon 5:28, 29) Buk Kamapim Tok Hait i tok profet long wanpela taim bai kamap we ol man i dai pinis bai ol i kirap bek, na i tok: “Solwara i larim olgeta man i dai pinis na i stap long en, ol i go. Na Dai wantaim Ples bilong ol man i dai pinis, tupela tu i larim olgeta man i dai pinis na i stap long han bilong tupela, ol i go.” (KTH 20:13) Bilong mekim dispela samting i kamap, God i Gat Olgeta Strong bai givim bek laip long olgeta man, maski ol i planim ol long graun, o kukim ol long paia, o dai long solwara, o wel animal i kilim ol, o ol i dai taim bom i pairap.
Baibel i no kolim stret wanpela pasin em man i mas mekim long bodi bilong daiman. Jehova i no tambuim pasin bilong kukim bodi bilong daiman. Tasol em i klia tru olsem ol samting man i redim bilong wokim fiuneral, dispela i mas soim pasin rispek.
Tasol samting inap stiaim disisen bilong man long ol dispela samting, em tingting na pasin bilong ples long redim ol samting bilong fiuneral. Ol man husat i bihainim ol stiatok bilong Baibel ol i no laik mekim wanpela samting we i givim bel hevi long ol neiba. Na tu, em i no stret long insait long ol pasin we i kamapim ol bilip bilong ol lotu giaman, olsem man i gat wanpela spirit i no save dai. Tasol wanem wanem samting man i makim long ol i ken mekim long bodi bilong em taim em i dai pinis, o bodi bilong narapela, dispela em samting bilong em yet, o bilong famili.
YU LAIK SAVE?
◼ Husat dispela man i lotuim God em Baibel i tok ol i bin kukim bodi bilong em?—1 Samuel 31:2, 12.
◼ Devit i mekim wanem long ol man em ol i kukim bodi bilong Sol?—2 Samuel 2:4-6.
◼ Wanem samting i soim olsem pasin bilong kukim bodi bilong daiman i no pasim man long kirap bek?—KTH 20:13.
[Rait long pes 11]
Baibel i no kolim stret wanpela pasin em man i mas mekim long bodi bilong daiman