Kamap Graun Gen—Olsem Wanem?
“MI BIN wokim yu long graun, na bai yu go bek gen long graun.” Taim namba wan man Adam i harim dispela tok, em i save long samting bai painim em bihain. God i bin wokim em long graun, na bihain em bai kamap graun gen. Em bai dai, long wanem, em i bin sakim tok bilong Man i bin wokim em, em God Jehova.—Stat 2:7, 15-17; 3:17-19.
Baibel i tok, God i bin wokim skin bilong yumi long graun. Na Baibel i tok tu olsem: “Sapos wanpela man i mekim sin, dispela man tasol i mas i dai.” (Esekiel 18:4; Song 103:14) Dai i bin kamapim bikpela bel hevi tru long planti milion manmeri, na planti taim ol bikpela tok i kamap long ol bai mekim wanem long skin bilong ol man i dai pinis.
Sampela Pasin Long Bipo na Nau
Lain bilong God long bipo ol i bin mekim wanem long skin bilong ol man i dai pinis? Namba wan hap bilong Baibel i stori long sampela pasin ol i bin mekim long man i dai pinis. Wanpela pasin, em ol i save planim ol long graun. (Stat 35:8) Abraham wantaim meri bilong em Sara na pikinini man bilong tupela, em Aisak, na bubu pikinini bilong tupela, em Jekop, ol man i bin putim skin bilong ol insait long bikpela hul bilong ston long hap ol i kolim Makpela, na em i kamap matmat bilong ol. (Stat 23:2, 19; 25:9; 49:30, 31; 50:13) Na ol i bin planim tupela hetman bilong Israel, em Gideon na Samson, ‘long matmat bilong papa bilong ol.’ (Hetman 8:32; 16:31) Dispela i makim olsem lain bilong God long bipo ol i laikim matmat bilong famili yet. Taim Krais Jisas i dai, ol i putim skin bilong em long wanpela nupela matmat ol i bin wokim insait long bikpela ston. (Matyu 27:57-60) Long dispela taim bipo, klostu olgeta man ol i save planim skin bilong man long graun o putim insait long hul bilong ston. Long nau tu, long planti hap bilong graun ol i save mekim yet dispela pasin.
Tasol nau long sampela hap ol i sot tru long graun, na tu, graun i gat bikpela pe bilong en, na dispela i mekim na ol man i hatwok long painim ples bilong planim man. Olsem na sampela i tingim ol narapela samting ol i ken mekim.
Planti man long nau, taim ol i kukim skin bilong man long paia na i kamap olsem sit bilong paia, ol i save tromoi nabaut long wanpela hap. Long Inglan ol i save mekim olsem long 40 pesen bilong ol man i dai pinis. Long hap bilong ol biktaun long Swiden, klostu olgeta man i dai pinis, winim 80 pesen, ol i save kukim ol long paia, na gavman i bin makim sampela hap bus bilong ol i ken tromoi das bilong ol long en. Na long Sanghai na sampela biktaun moa i stap long nambis bilong Saina, ol gavman bilong biktaun i save makim sampela de insait long yia na ol manmeri i ken tromoi das bilong ol man i go long solwara.
Ol i ken tromoi we das bilong man taim ol i kukim skin bilong em long paia? Ol i no ken mekim nating tasol. Ating sampela bai ting dispela inap bagarapim win na wara samting. Tasol taim ol i kukim skin bilong man i dai pinis, i no gat sik inap kamap long dispela pasin bilong tromoi das bilong ol. Long sampela ples matmat long Inglan, na sampela pak long Amerika ol i save planim man long en, ol i makim sampela hap bilong en i gat gras na sampela hap i gat ol plaua, em bilong tromoi das bilong ol man i dai pinis, i olsem sit bilong paia. Tasol ol Kristen i tingim ol tok bilong Baibel long dispela pasin bilong kukim skin bilong man long paia na tromoi nabaut.
Baibel i Tok Wanem?
Long wanpela strongpela toksave i go long “king bilong Babilon,” profet Aisaia i tok: “Ol i tromoi bodi bilong yu olsem man i katim han bilong diwai na tromoi bilong sting.” (Aisaia 14:4, 19) Tasol taim yumi tromoi das bilong man i dai pinis, yu ting em i wankain long dispela pasin bilong tromoi nating skin bilong man? Nogat. Long wanem, dispela skripsa i no toktok long ol i bin kukim skin bilong em long paia na ol i bin putim gut o tromoi das bilong em long wanpela hap.
Krais Jisas i bin stori long ol man i dai pinis ol bai kirap bek long graun long Taim Bilong Wan Tausen Yia bilong em i stap King. Em i tok: “Olgeta manmeri i stap long matmat ol bai i harim maus bilong [mi], na ol bai i lusim matmat na i kam ausait.” (Jon 5:28, 29) Tasol i no olsem man i mas i stap long wanpela matmat tru na bai Jisas i ken kirapim em bek. Yumi inap save long dispela long narapela tok profet i tok long ol man i dai pinis bai kirap bek. Kamapim Tok Hait 20:13 i tok: “Solwara i larim olgeta man i dai pinis na i stap long en, ol i go. Na Dai wantaim Ples bilong ol man i dai pinis, tupela tu i larim olgeta man i dai pinis na i stap long han bilong tupela, ol i go.” Olsem na maski man i kamap graun gen olsem wanem o long wanem hap, dispela i no bikpela samting. Bikpela samting em olsem: God bai tingim em na kirapim em bek o nogat. (Jop 14:13-15; skelim wantaim Luk 23:42, 43.) I no olsem Jehova i mas lukim ol gutpela matmat i gat simen na rait samting long en bilong helpim em long tingim ol man i dai pinis, nogat. Taim ol i kukim skin bilong man long paia, dispela i no pasim rot bilong em long kirap bek. Na sapos man i gat stretpela tingting na em i tromoi dispela das, na em i no mekim sampela bilaspasin bilong lotu giaman, dispela i no kalapim wanpela tok bilong Baibel.
Ol man i laik bihainim dispela pasin bilong tromoi nabaut das bilong man, i olsem sit bilong paia, ol i mas tingim gut lo bilong kantri. Na tu, ol i mas tingim famili bilong dispela man i dai pinis na ol narapela, nogut dispela pasin i bagarapim bel bilong ol. Ol wokman bilong Jehova i mas was gut, nogut ol i mekim wanpela samting Baibel i givim rot long yumi long mekim, tasol dispela samting i bagarapim gutnem bilong ol Kristen. Dispela em i bikpela samting tru long ol kantri em lo i orait long ol i mekim kain pasin olsem, tasol planti man i no orait yet long mekim. Na Kristen bai abrusim olgeta pasin bilong lotu o bilong ples, as bilong en em dispela bilip olsem man i gat tewel.
Matmat i No Inap Kalabusim Man Moa!
Sampela man i strong long bihainim pasin bilong tromoi das bilong man ol i bin kukim skin bilong em long paia, ol i tok, dispela i mekim na man i no kalabus insait long matmat. Tasol samting bai lusim man tru long kalabus bilong matmat, em truim bilong tok promis bilong Baibel olsem: “Em [Krais] i pinisim pinis olgeta arapela birua, orait em bai i pinisim dai tu.”—1 Korin 15:24-28.
Olsem na matmat, na hul bilong ston ol i putim skin bilong man long en, na pasin bilong kukim skin bilong man long paia na tromoi nabaut das bilong en, ol bai pinis olgeta. Yes, bai i no gat dai moa. God i givim tingting long aposel Jon na em i raitim tok olsem: “Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”—KTH 21:3, 4.
Dispela bai kamap taim Kingdom bilong God i bosim graun, na indai em sin bilong Adam i bin kamapim, em bai pinis olgeta. Long dispela taim ol man i bihainim tok bilong God ol i no ken tingting moa long ol bai kamap graun gen.
[Ol Piksa long pes 29]
Sampela pasin em planti man i save mekim long ol man i dai pinis
[Piksa long pes 31]
Ol i tromoi das olsem sit bilong paia long Pasis Sagami, long Japan
[Kredit Lain]
Courtesy of Koueisha, Tokyo