Ol Yangpela i Laik Save
Olsem Wanem? Mi Nidim Ol Pren i Gutpela Moa?
“Sapos mi belhat, i mas i gat wanpela em mi inap toktok wantaim em long dispela samting. Sapos mi bel hevi, mi laik bai wanpela i mekim gut bel bilong mi. Sapos mi amamas, mi laik serim dispela amamas wantaim narapela. Em i bikpela samting long mi mas i gat ol pren.”— Brittany.
OL I tok olsem ol liklik pikinini i mas i gat pren bilong pilai wantaim, tasol ol yangpela i mas i gat ol pren. Olsem wanem dispela tupela samting i no wankain?
Wanpela pren bilong pilai wantaim, em wanpela husat i save poromanim yu long pilai.
Wanpela pren em wanpela husat i gat wankain tingting na laik olsem yu.
Na Baibel i tok moa olsem, “pren tru i save laikim yumi long olgeta taim, na em i olsem brata i save sambai long helpim yumi long taim bilong hevi.” (Sindaun 17:17, NW ) Ating dispela skripsa i stori long pasin pren we i strong moa winim pasin pren yu mekim wantaim wanpela husat i olsem pren bilong pilai wantaim!
Trupela tok: Taim yu wok long kamap bikpela, yu nidim ol pren
(1) I gat naispela pasin.
(2) I bihainim ol gutpela lo long laip bilong ol.
(3) I gat ol gutpela pasin bilong stiaim yu.
Askim: Hau bai yu save sapos ol pren bilong yu i inapim ol dispela samting? Bai yumi skelim wan wan bilong ol dispela samting.
Namba 1 Mak Bilong Pasin Pren Naispela Pasin
Samting yu mas save long en. I no olgeta man inap kamap trupela pren. Baibel i tok tu olsem i gat “sampela pren [em ol] i tingting long bagarapim pren bilong ol.” (Sindaun 18:24, NW ) Ating yu bai ting dispela samting i no inap kamap. Tasol tingim: Yu bin i gat wanpela “pren” husat i bin yusim yu long helpim em yet tasol? Olsem wanem long pren husat i bin tok baksait long yu o karim raun wanpela stori giaman long yu? Kain samting olsem inap mekim na yu no trastim moa ol pren bilong yu.a Taim yu laik painim ol pren, tingim olsem sapos yu gat sampela pren tasol em ol i gutpela pren, dispela i gutpela moa winim planti pren em ol i no gutpela pren!
Samting yu ken mekim. Makim ol pren em pasin bilong ol i gutpela bilong yu ken bihainim.
“Olgeta man i save mekim gutpela tok tasol long pren bilong mi Fiona. Mi laik bai ol arapela i mekim olsem long mi tu taim ol i stori long mi. Mi laik kisim wankain gutpela nem olsem em. Long mi, dispela em naispela samting.”—Yvette, 17 krismas.
Traim mekim olsem.
1. Ritim Galesia 5:22, 23.
2. Askim yu yet, ‘Ol pren bilong mi i save kamapim ol pasin em “Holi Spirit i save kirapim yumi long mekim”?’
3. Long lista daunbilo, raitim nem bilong ol bes pren bilong yu. Klostu long wan wan nem, raitim pasin i makim stret dispela pren.
Nem Pasin
․․․․․ ․․․․․
․․․․․ ․․․․․
․․․․․ ․․․․․
Sain: Sapos yu no inap tingim wanpela gutpela pasin, orait i luk olsem nau em taim bilong painim ol pren em pasin bilong ol i gutpela moa!
Namba 2 Mak Bilong Pasin Pren Ol Gutpela Lo
Samting yu mas save long en. Sapos yu dai stret long i gat ol pren, orait ating em bai isi tru long yu kisim ol lain i no gutpela pren. Baibel i tok: “Sapos man i poroman wantaim ol man i no gat gutpela tingting, orait trabel bai i painim em.” (Sindaun 13:20) Dispela tok “man i no gat gutpela tingting” i no makim ol man husat i no gat save. Nogat. Em i tok long ol man husat i givim baksait long gutpela tingting na ol i kirap bihainim longlong pasin. Yu no nidim ol dispela kain pren!
Samting yu ken mekim. No ken kirap tasol long poromanim wanem wanem man o meri husat i orait long yu, nogat, yu mas skelim ol gut. (Song 26:4) Dispela i no makim olsem yu mas i gat pasin bilong holim tingting nogut long sampela lain, nogat. Long dispela stori, pasin bilong skelim gut ol man i makim olsem yu inap luksave olsem “stretpela man i narapela kain long man nogut, na man i mekim wok bilong God i narapela kain long man i no bin mekim wok bilong God.”—Malakai 3:18, NW.
God i save mekim wankain pasin long olgeta man. Tasol taim em i mas makim ol man bilong “i stap long haus bilong [em],” em i save skelim ol gut bilong makim wanem kain man em i laikim. (Song 15:1-5) Yu ken mekim wankain pasin. Yu mas bihainim ol lo bilong God, na ol arapela em ol tu i strong long mekim olsem, ol bai painim yu. Na long dispela rot ol bai i kamap ol gutpela pren em yu laikim!
“Mi tenkyu tru olsem papamama bilong mi i helpim mi long painim ol pren—em ol lain husat i bihainim ol lo bilong God, na ol i wankrismas bilong mi.”—Christopher, 13 krismas.
Traim mekim olsem.
Bekim ol dispela askim:
◼ Taim mi stap wantaim ol pren bilong mi, planti taim mi save pret olsem nogut ol i putim presa long mi long mekim wanpela samting em mi save olsem em i rong?
□ Yes □ Nogat
◼ Mi surik long soim ol pren bilong mi long papamama, nogut papamama i no orait long ol?
□ Yes □ Nogat
Sain: Sapos yu tok yes long ol dispela askim, orait mobeta yu painim ol pren em ol i strong moa long bihainim ol stretpela lo. Ating pastaim i gutpela sapos yu kirap poromanim ol lain em krismas bilong ol i bikpela long yu na ol i bihainim pasin Kristen long laip bilong ol, a?
Namba 3 Mak Bilong Pasin Pren Ol Gutpela Pasin Bilong Stiaim Yu
Samting yu mas save long en. Baibel i tok: “Sapos yumi poroman wantaim ol man nogut, bai ol i bagarapim gutpela pasin bilong yumi.” (1 Korin 15:33) Wanpela yangpela meri Lauren, i tok: “Ol pren bilong mi long skul i orait long mi ken stap yet olsem pren bilong ol sapos mi mekim ol samting ol i tokim mi long mekim. Mi stap wanpis, olsem na mi kirap bihainim pasin bilong ol bambai mi ken i stap pren bilong ol.” Olsem Lauren i bin luksave long en, taim yu bihainim ol lo bilong ol narapela, yu bai kamap olsem wanpela samting em ol man bilong pilai chess i muvim i go i kam long laik bilong ol. I no stret liklik long ol i mekim olsem long yu!
Samting yu ken mekim. No ken poroman moa wantaim ol man husat i strong long yu mas senisim pasin bilong yu bambai yu ken bihainim pasin bilong ol. Sapos yu mekim olsem, bai yu amamas long yu yet, na tu, bai yu opim dua bilong kisim ol pren i gutpela moa—em ol pren husat bai kirapim yu long bihainim ol gutpela pasin.—Rom 12:2.
“Bes pren bilong mi Clint i gat gutpela tingting na em i save pilim tru tingting bilong ol narapela, na long dispela as mi kisim bikpela strong long em.”—Jason, 21 krismas.
Traim mekim olsem.
Askim yu yet ol dispela askim:
◼ Mi senisim stail bilong mi long bilas, toktok, o pasin bilong mi bilong amamasim ol pren bilong mi?
□ Yes □ Nogat
◼ Mi save go long ol ples we i no stret long i go long en taim mi bung wantaim ol pren bilong mi?
□ Yes □ Nogat
Sain: Sapos yu tok yes long ol dispela askim, orait yu mas i go toktok wantaim papamama bilong yu o wanpela man husat i gat gutpela tingting, bilong kisim skultok. Sapos yu wanpela Witnes Bilong Jehova, yu ken i go lukim tu wanpela Kristen elda na tokim em olsem yu laik kisim helpim long olsem wanem yu inap makim ol pren husat bai i helpim yu long bihainim gutpela pasin.
Bilong lukim sampela stori moa long hap “Ol Yangpela i Laik Save” long tok Inglis, lukim Web-sait www.watchtower.org/ype
[Futnot]
a Tru, yumi olgeta i save popaia. (Rom 3:23) So taim wanpela pren i bagarapim bel bilong yu na bihain em i sori tru olsem em i bin mekim olsem, orait tingim, “pasin bilong laikim tru ol arapela, em i save karamapim planti sin na i winim olgeta arapela pasin.”—1 Pita 4:8.
SAMTING BILONG TINGIM
◼ Yu laik bai pren bilong yu i gat wanem kain ol pasin, na bilong wanem?
◼ Yu mas wok strong long kisim wanem ol pasin bilong kamap wanpela gutpela pren?
[Blok/Ol Piksa long pes 19]
TOK BILONG OL WANLAIN
“Taim papamama bilong mi i stiaim mi i go longwe long sampela pren bilong mi, mi tokim mi yet olsem ol dispela pren tasol em lain mi laik bung wantaim ol. Tasol tok bilong papamama i gutpela, na taim mi skelim tok bilong ol, mi luksave olsem i gat planti gutpela pren i stap.”— Cole.
“Long mi, pasin bilong insait long wok autim tok Kristen em wanpela gutpela rot bilong mi ken save long ol lain insait long kongrigesen. Em long dispela hap mi inap bung wantaim kain kain lain, ol yangpela na ol lapun. Na mi lusim taim long i stap wantaim ol lain husat i laikim Jehova.”— Yvette.
“Mi beten long kisim ol pren, tasol mi luksave olsem mi no mekim wanpela samting bilong painim ol pren. So mi kirap toktok wantaim ol narapela long ol miting Kristen. I no longtaim na mi kisim planti nupela pren. Na nau i no gat wanpela taim mi pilim olsem mi stap wanpis.”— Sam.
[Blok long pes 20]
TRAIM MEKIM OLSEM
Toktok wantaim papamama bilong yu long pasin bilong kisim ol pren. Askim ol long ol i gat wanem kain ol pren taim ol i bin i gat wankain krismas olsem yu. Ol i bin bel hevi long sampela pren em ol i bin makim? Sapos olsem, bilong wanem ol i pilim olsem? Askim ol long olsem wanem yu ken abrusim sampela hevi we i bin painim ol.
Soim ol pren bilong yu long papamama. Sapos yu surik long mekim olsem, orait askim yu yet, ‘Bilong wanem i olsem?’ I gat sampela samting long ol pren bilong yu em yu save olsem papamama bai i no orait long en? Sapos olsem, orait ating taim yu laik makim ol poroman bilong yu, pastaim yu mas skelim ol gut.
[Blok long pes 20]
TRIPELA ROT BILONG PAS GUT YET WANTAIM OL GUTPELA PREN
◼ Putim gut yau. Soim olsem yu tingim tru ol pren bilong yu na sindaun bilong ol.—Filipai 2:4.
◼ Mas fogivim ol. No ken ting olgeta samting bai i go stret tasol. “Planti taim . . . yumi save popaia.”—Jems 3:2.
◼ Givim spes long ol. I no olsem olgeta taim yu mas stap wantaim ol. Ol trupela pren bai stap bilong helpim yu sapos yu nidim ol.—Saveman 4:9, 10.
[Piksa long pes 18, 19]
Taim yu bihainim ol lo bilong ol narapela bilong i stap pren bilong ol, yu bai kamap olsem wanpela samting bilong pilai “chess” em ol i muvim i go i kam long laik bilong ol