Bilong Painim Ol Pren Tru
WANPELA yangpela man i kisim bikpela bagarap long motobaik. Tingting bilong em i dai na i stap olsem inap sampela wik, na bihain isi isi em i kamap orait. Em i tok, “Mi save long planti man na ol i save long mi. Sapos ol gutpela pren bilong mi i planti olsem ol dispela man, bai mi orait hariap.” Na em i tok, ‘Bipo mi gat planti pren, tasol taim mi kisim bagarap ol i lusim mi. Ol gutpela pren inap helpim man i gat sik na bai em i orait bek.’
Long nau dispela kain pasin i stap. Ol man i no save pren gut. Taim man i stap gutpela, planti man i stap olsem pren bilong em. Tasol taim hevi i painim em ol dispela pren giaman i lusim em. I hatwok long painim pren tru.
Sapos yumi gat wanpela o tupela gutpela pren tru, dispela bai strongim yumi na yumi amamas. Ol saveman i tok, long nau planti manmeri i sot long pren; ol i laik tru bai ol i gat sampela pren. Wanpela tok bilong bipo em olsem: Pren i sambai long yu long taim bilong hevi, dispela kain pren em i pren tru.
Bipo ol man i save tingim ol narapela man na ol i tingting long helpim ol. Tasol bihain long Namba Wan Pait Bilong Olgeta Hap senis i kamap na nau ol man i no pren gut moa. Ol i no amamas long gutpela pasin narapela man i mekim long ol; ol i no save tenkyu. Ol i no mekim pasin sori; ol i tingim laik bilong ol yet tasol.
Planti handet yia bipo Baibel i tok dispela pasin bai kamap. Baibel i tok: “Long las taim bai planti hevi nogut tru i kamap. Bai ol man i laikim ol yet tasol, na bai ol i laikim tumas mani. Bai ol i litimapim nem bilong ol yet, na hambak nabaut, na tok bilas long God. Bai ol i sakim tok bilong papamama. Bai ol i no save tenkyu. Bai ol i sakim olgeta pasin holi. Bai ol i no save pren long ol wanblut bilong ol yet. Bai ol i no lusim kros. Bai ol i tok baksait nabaut. Bai ol i no save bosim laik bilong bodi bilong ol. Bai ol i bagarapim ol man nabaut. Bai ol i birua long olgeta gutpela pasin. Bai ol i putim ol pren bilong ol long han bilong ol birua.”—2 Timoti 3:1-4.
Dispela tok i makim stret pasin nogut bilong ol man bilong nau, na sapos yumi tingim dispela tasol ating bai yumi tok, ‘Mi no inap painim sampela gutpela pren tru.’ Tasol yu inap kisim sampela gutpela pren, olsem pren tru. Gutpela pren em i wanpela gutpela samting! Sapos yu gat hevi yu ken i go long em na em i ken givim sampela gutpela tok o save long yu na mekim gut bel bilong yu na poroman gut wantaim yu. Tasol yu mas skelim gut ol pren, ol i pren tru o pren giaman.
Sampela “Pren” i No Pren Tru
Dispela yangpela man yumi stori pinis long em, bipo em i save pilai kikbal wantaim wanpela tim na em i gat planti “pren.” Ol man i insait long wanpela tim o ol i insait long wanpela klap, dispela i mekim ol i kamap “pren.” Tasol dispela kain “pren” i no strongpela pren tumas. Sapos yu gat planti kain “pren” olsem, na bihain ol i lusim yu, bai yu bel hevi. Kain samting olsem i bin painim dispela yangpela man. Sapos yu bung wantaim man na nau yu save long em, i no hatwok long mekim olsem; tasol bilong kamap pren tru wantaim, em hatwok.
Maniman o man i gat bikpela namba, em i no hatwok long kamap “pren” bilong ol man. Baibel i tok: “Ol maniman i gat planti pren.” “Planti man i save tok gris long man i gat namba, bilong mekim em i laikim ol. Sapos wanpela man i man bilong givim presen, orait bai ol man i laik kamap pren bilong en.” (Provep 14:20; 19:6) Tasol ol dispela man i gat wanem tingting na ol i laik kamap pren bilong maniman o man i gat namba? Na dispela man ol i laik kamap pren bilong em, sapos em i kamap rabisman na man i no gat nem, ating ol dispela pren bilong em bai lusim em.
Na ol man na meri i gat gutpela skin ol i gat planti pren. Ol dispela pren i tingim gutpela skin tasol bilong ol dispela manmeri na ol i laik kamap pren bilong ol. Tasol dispela kain pasin “pren” inap bringim yumi long rot nogut. Na sapos hevi i painim yumi, ol bai lusim yumi. Olsem na taim yu laik painim sampela pren tru, yu mas . . .
Skelim Gut
Sapos yu laik kamap pren bilong sampela man, gutpela sapos yu bihainim savepasin na yu skelim gut ol pastaim. Pren giaman i save litimapim nating nem bilong yu na bai yu ken laikim em, long wanem em i laik bai yu helpim em o givim sampela samting long em. “Sapos man i giaman gris long wantok bilong en, i olsem em i taitim umben bilong holimpas wantok.”—Provep 29:5.
Olsem na yu mas skelim gut ol pren bilong yu. Olsem wanem? Ol i save helpim yu long bihainim gutpela pasin? O ol i laik bringim yu long rot nogut? Ol i save bihainim laik bilong ol yet? Ol i ting ol yet i bikpela man? O ol i gat pasin daun? Ol i save bihainim kwik laik na tingting bilong ol? Ol i amamas long mekim ol samting inap bagarapim ol? Sapos ol i man, ol i save mekim wanem kain pasin long ol meri? O sapos ol i meri, ol i gat wanem tingting long ol man? Ol i save mekim gutpela pasin o ol i save pren hariap na i no gat sem? Ol i save giaman? Ol i save kisim drak o smok o kaikai buai? Ol i save dring tumas? Sapos ol i mekim dispela kain samting, ol inap paulim yu. Ating yu yet yu bihainim pasin i stret , na yu klin, na yu gat pasin daun, tasol yu mas tingting: “Sapos yumi wokabaut wantaim ol man nogut, bai ol i bagarapim gutpela pasin bilong yumi.”—1 Korin 15:33.
Sapos yu poroman wantaim ol man nogut, inap ol i ken pulim yu na bai yu bihainim pasin bilong ol. Isi isi pasin bilong ol bai kalap i go long yu. Baibel i tok: “Sapos man i wokabaut wantaim man i gat gutpela tingting, orait bai em tu i kisim gutpela tingting. Tasol, sapos man i poroman wantaim ol man i no gat gutpela tingting, orait bai trabel i painim em.”—Provep 13:20.
Sapos yu laik painim sampela pren, nogut yu popaia na painim wanpela na em i no kamap gutpela pren. Tasol sapos yu bin mekim olsem, yu no ken hevi. I gat planti milion gutpela man i stap. Tasol olsem wanem yu ken painim sampela na ol i ken i stap olsem gutpela pren tru bilong yu?
[Piksa long pes 4]
Ol poroman bilong yu inap pulim yu