Olsem Wanem Mi Inap Painim Ol Gutpela Pren?

“Sapos mi belhat, i mas i gat wanpela em mi inap toktok wantaim em long dispela samting. Sapos mi bel hevi, mi laik bai wanpela i mekim gut bel bilong mi. Sapos mi amamas, mi laik serim dispela amamas wantaim narapela. Em i bikpela samting long mi mas i gat ol pren.”​—Brittany.

OL I tok olsem ol liklik pikinini i mas i gat ol pren bilong pilai wantaim, tasol ol yangpela i mas i gat ol pren. Olsem wanem dispela tupela samting i no wankain?

Wanpela pren bilong pilai wantaim, em wanpela husat i save poromanim yu long pilai.

Wanpela pren em wanpela husat i gat wankain tingting na laik olsem yu.

Na Baibel i tok moa olsem “trupela pren i save soim pasin laikim long olgeta taim na em i kamap olsem brata bilong yu long taim bilong hevi.” (Provep 17:17) Ating dispela skripsa i stori long pasin pren we i strong moa winim pasin pren yu mekim wantaim wanpela em yu pilai wantaim long taim yu liklik!

Trupela tok: Taim yu wok long kamap bikpela, yu nidim ol pren

1. I gat ol naispela pasin

2. I bihainim ol gutpela lo long laip bilong ol

3. I gat ol gutpela pasin bilong stiaim yu

Askim: Hau bai yu painim ol pren i inapim ol dispela mak? Bai yumi skelim wan wan bilong ol dispela samting.

Namba 1 Mak Bilong Pasin Pren​—Ol Naispela Pasin

Samting yu mas save long en. I no olgeta man inap kamap trupela pren. Baibel i tok tu olsem “i gat ol poroman i redi long bagarapim narapela narapela.” (Provep 18:24) Ating yu bai ting dispela samting i no inap kamap. Tasol tingim: Yu bin i gat wanpela pren husat i bin yusim yu long helpim em yet tasol? Olsem wanem long pren husat i bin tok baksait long yu o karim raun wanpela stori giaman long yu? Kain samting olsem inap mekim na yu no trastim moa ol pren bilong yu.a Taim yu laik painim ol pren, tingim olsem sapos yu gat sampela pren tasol em ol i gutpela pren, dispela i gutpela moa winim planti pren em ol i no gutpela pren!

Samting yu ken mekim. Makim ol pren em pasin bilong ol i gutpela bilong yu ken bihainim.

“Olgeta man i save mekim gutpela tok tasol long pren bilong mi Fiona. Mi laik bai ol arapela i mekim olsem long mi tu taim ol i stori long mi. Mi laik kisim wankain gutpela nem olsem em. Long mi, dispela em naispela samting.”—Yvette, 17 krismas.

Traim mekim olsem.

1. Ritim Galesia 5:22, 23.

2. Askim yu yet, ‘Ol pren bilong mi i save kamapim “ol pasin holi spirit i kamapim”?’

3. Long lista daunbilo, raitim nem bilong ol bes pren bilong yu. Klostu long wan wan nem, raitim pasin i makim stret dispela pren.

Nem

․․․․․

Pasin

․․․․․

Sain: Sapos yu no inap tingim wanpela gutpela pasin, orait i luk olsem nau em taim bilong painim ol pren em pasin bilong ol i gutpela moa!

Namba 2 Mak Bilong Pasin Pren​—Ol Gutpela Lo

Samting yu mas save long en. Sapos yu dai stret long i gat ol pren, orait ating em bai isi tru long yu kamap pren bilong ol lain i no gat ol gutpela pasin. Baibel i tok: “Man i poroman wantaim ol longlong man, trabel bai painim em.” (Provep 13:20) Dispela hap tok “ol longlong man” i no makim ol man i no gat save. Nogat. Em i makim ol man i givim baksait long gutpela tingting na ol i kirap bihainim longlong pasin. Yu no nidim ol dispela kain pren!

Samting yu ken mekim. No ken kirap tasol long kamap pren bilong ol kain kain manmeri, i gutpela moa yu skelim ol gut. (Buk Song 26:4) Dispela i no makim olsem yu mas holim tingting nogut long sampela lain, nogat. Long dispela stori, pasin bilong skelim gut ol man i makim olsem yu inap luksave olsem “pasin bilong stretpela man i narapela kain long pasin bilong man nogut. Na pasin bilong man i mekim wok bilong God i narapela kain long pasin bilong man i no mekim wok bilong God.”—Malakai 3:18.

“Mi tenkyu tru olsem papamama bilong mi i helpim mi long painim ol pren—em ol lain husat i bihainim ol lo bilong God, na ol i wankrismas bilong mi.”—Christopher, 13 krismas.

Bekim ol dispela askim:

Taim mi stap wantaim ol pren bilong mi, mi save pret olsem nogut ol i putim presa long mi long mekim wanpela samting em mi save olsem em i rong?

□ Yes

□ Nogat

Mi surik long soim ol pren bilong mi long papamama, nogut papamama i no orait long ol?

□ Yes

□ Nogat

Sain: Sapos yu tok yes long ol dispela askim, orait mobeta yu painim ol pren em ol i strong moa long bihainim ol stretpela lo—em ol lain i bihainim pasin Kristen long laip bilong ol.

Namba 3 Mak Bilong Pasin Pren​—Ol Gutpela Pasin Bilong Stiaim Yu

Samting yu mas save long en. Baibel i tok: “Ol poroman nogut i save bagarapim ol gutpela pasin bilong man.” (1 Korin 15:33) Wanpela yangpela meri nem bilong em Lauren i tok: “Ol pren bilong mi long skul i orait long mi ken stap yet olsem pren bilong ol sapos mi mekim ol samting ol i tokim mi long mekim. Mi stap wanpis, olsem na mi kirap bihainim pasin bilong ol bambai mi ken i stap pren bilong ol.” Olsem Lauren i bin luksave long en, taim yu bihainim ol lo bilong ol narapela, yu bai kamap olsem wanpela samting em ol man bilong pilai chess i muvim i go i kam long laik bilong ol. I no stret liklik long ol i mekim olsem long yu!

Samting yu ken mekim. No ken poroman moa wantaim ol man husat i strong long yu mas senisim pasin bilong yu bambai yu ken bihainim pasin bilong ol. Sapos yu mekim olsem, ating bai yu no gat planti pren; tasol yu bai amamas long yu yet, na tu, yu bai gat planti rot long kisim ol pren i gutpela moa—em ol pren husat bai kirapim yu long bihainim ol gutpela pasin.—Rom 12:2.

“Bes pren bilong mi Clint i gat gutpela tingting na em i save pilim tru tingting bilong ol narapela, na long dispela as mi kisim bikpela strong long em.”—Jason, 21 krismas.

Givim ol dispela askim long yu yet:

Mi senisim stail bilong mi long bilas, toktok, o mi mekim ol pasin i no gutpela bilong amamasim ol pren bilong mi?

□ Yes

□ Nogat

Mi save go long ol ples we i no stret long i go long en taim mi bung wantaim ol pren bilong mi?

□ Yes

□ Nogat

Sain: Sapos yu tok yes long ol dispela askim, orait yu mas i go toktok wantaim papamama bilong yu o wanpela man husat i gat gutpela tingting, bilong kisim skultok. Sapos yu wanpela Witnes Bilong Jehova, yu ken i go lukim tu wanpela elda Kristen na tokim em olsem yu laik kisim helpim long olsem wanem yu inap makim ol pren husat bai i helpim yu long bihainim gutpela pasin.

[Futnot]

BIKPELA SKRIPSA

“I gat ol pren husat i save pas gut tru wantaim, winim pasin i stap namel long tupela brata.”—Provep 18:24.

TRAIM DISPELA

Yu mas bihainim ol lo bilong God, na ol arapela em ol tu i strong long mekim olsem, ol bai lukim dispela. Ol bai kamap ol gutpela pren em yu laikim!

YU SAVE LONG DISPELA . . . ?

God i save mekim wankain pasin long olgeta man. Tasol taim em i mas makim ol man bilong i ‘stap long haus sel bilong em,’ em i save skelim gut na makim.—Buk Song 15:1-5.

EKSEN PLEN!

Bilong painim ol gutpela pren, mi bai ․․․․․

Lain i gat bikpela krismas long mi em mi laik kamap pren bilong ol em ․․․․․

Mi laik askim papamama bilong mi long dispela topik ․․․․․

YU TING WANEM?

● Wanem ol pasin bilong wanpela pren em yu laikim tru, na bilong wanem?

● Wanem ol pasin em yu mas stretim na bai yu stap gutpela pren bilong narapela?

[Bikpela Tok]

“Taim papamama bilong mi i stiaim mi i go longwe long sampela pren bilong mi, mi tokim mi yet olsem ol dispela pren tasol em lain mi laik bung wantaim ol. Tasol tok bilong papamama i gutpela, na taim mi skelim tok bilong ol, mi luksave olsem i gat planti gutpela pren i stap.”—Cole

[Blok]

Traim Mekim olsem

Toktok wantaim papamama bilong yu long pasin bilong kisim ol pren. Askim ol long ol i gat wanem kain ol pren taim ol i bin i gat wankain krismas olsem yu. Ol i bin bel hevi long sampela pren em ol i bin makim? Sapos olsem, bilong wanem ol i pilim olsem? Askim ol long olsem wanem yu ken abrusim sampela hevi we i bin painim ol.

Soim ol pren bilong yu long papamama. Sapos yu surik long mekim olsem, orait askim yu yet, ‘Bilong wanem i olsem?’ I gat sampela samting long ol pren bilong yu em yu save olsem papamama bai i no orait long en? Sapos olsem, orait ating taim yu laik makim ol pren bilong yu, pastaim yu mas skelim ol gut.

Putim gut yau. Soim olsem yu tingim tru ol pren bilong yu na sindaun bilong ol.—Buk Song 15:1-5.

Mas fogivim ol. No ken ting olgeta samting bai i go stret tasol. “Planti taim yumi olgeta i save popaia.”—Jems 3:2.

Givim spes long ol pren bilong yu. I no olsem olgeta taim yu mas stap wantaim ol. Ol trupela pren bai stap long helpim yu sapos yu nidim ol.—Eklisiastis 4:9, 10.

[Piksa]

Taim yu bihainim ol lo bilong ol narapela bilong i stap pren bilong ol, yu bai kamap olsem wanpela samting bilong pilai chess em ol i muvim i go i kam long laik bilong ol