Laip Bilong Bebi i Kirap Long Wanem Taim?
GIANNA i tok: “Mama bilong mi i bin i gat 17 krismas taim em i kisim bel inap 7 na hap mun pinis na em i laik kisim marasin i gat sol long en bilong rausim pikinini i stap long bel.”a Em i tok moa: “Mi dispela pikinini em i laik rausim. Tasol mi stap laip na mi no i dai.”
Gianna yet i bin tokaut long dispela stori long 1996. Em i gat 19 krismas, na em i bin stori long ai bilong wanpela komiti bilong gavman bilong Amerika, taim ol i skelim pasin bilong rausim bel. Taim Gianna i stap seven na hap mun pinis long bel bilong mama, ol wan wan hap bilong bodi bilong em i kamap pinis. Ating yu wanbel olsem em i gat laip, long wanem, em i stap laip yet taim em i lusim bel na i kam ausait.
Orait, olsem wanem long Gianna taim em i bin stap long bel bilong mama inap 5-pela wik pinis na longpela bilong en inap wanpela sentimita tasol? Tru, ol hap bilong bodi bilong em i no bikpela yet inap long mak, tasol ol rop wailis na kru long het, ol i stat pinis long kamap. Lewa bilong em i pamim blut i go i kam long ol narapela hap bilong bodi inap 80 taim insait long wanpela minit. Olsem na sapos Gianna i bin i gat laip taim em i stap 7 na hap mun pinis long bel bilong mama, orait i stret yumi ken tok em i bin i gat laip taim em i stap 5-pela wik tasol long bel bilong mama—maski ol hap bilong bodi i no inapim yet mak bilong en.
Kisim Bel—Wanpela Mirakel
Olgeta hap bilong bodi i save stat long kamap taim melek bilong papa i pas wantaim wanpela liklik kiau long bel bilong mama, na dispela tupela samting i kamap olsem wanpela kiau i gat laip, olsem sel. Ol nupela save i opim rot long ol saientis long lukim ol narakain samting i kamap long dispela sel. Ol molekiul long DNA (deoxyribonucleic acid) bilong papa na bilong mama i save bung wantaim bilong kamapim wanpela laip i no bin i stap bipo.
Dispela namba wan sel i save go pas long kamapim olgeta hap bilong bodi bilong bebi. Ol jin, em ol samting i stap long DNA, ol i save stiaim dispela wok. Ol dispela samting i stiaim wok bilong kamapim yumi, olsem yumi bai kamap longpela o sotpela, na pes bilong yumi bai i luk olsem wanem, na ai na gras bilong yumi bai i gat wanem kala, na planti samting moa.
Bihain, taim dispela namba wan sel i bruk na i kamapim planti sel, olgeta nupela sel i save kisim “lo” i stap long namba wan sel, em lo bilong stiaim wok bilong kamapim ol hap bilong bodi. Olgeta dispela sel inap senis na kamap ol hap bilong bodi, olsem lewa, kru, bun, skin, na ai samting. Olsem na yumi no kirap nogut long ol i kolim dispela lo i stap long namba wan sel olsem “wanpela mirakel.”
Wanpela saveman, David Fu-Chi Mark, i tok: “Kirap long taim dispela wanpela sel i kamap, lo i stap pinis bilong kamapim olgeta samting bilong bodi bilong man.” Em i tok moa: “Olsem na yumi ken save tru olsem olgeta wan wan man i narapela kain tru kirap long taim laip bilong em i stat long kamap long bel bilong mama.”
Wanpela Laip Insait Long Bel?
Kirap long taim pikinini i stat long kamap long bel, skin bilong em i narapela long skin bilong mama. Bodi bilong mama bai pilim olsem em i no hap bilong bodi bilong em. Na kwiktaim bodi bilong mama bai i laik rausim, tasol gutpela tru olsem i gat banis i stap pinis bilong lukautim dispela pikinini. Dispela nupela laip—em i gat banis bilong lukautim em—i gat DNA bilong em yet.
Sampela i tok olsem taim ol kiau i gat laip pinis long en i no wok long kamap gut, bodi bilong meri yet i save rausim, olsem na i no gat rong long dokta i rausim bel. Tasol taim bodi yet i rausim kiau, dispela i narapela kain olgeta long dokta yet i mekim olsem. Long wanpela kantri bilong Saut Amerika, 71 namel long 1,000 pikinini i save dai taim ol i no winim yet wanpela krismas. Yes, planti ol i dai taim ol i bebi yet, olsem na yu ting em orait long kilim i dai wanpela pikinini husat i no winim yet wanpela krismas? Nogat tru!
Baibel i stori olsem taim pikinini i stap long bel bilong mama, dispela pikinini i gat laip pinis. Man bilong raitim song, em Devit, em i tok long God olsem: “Yu lukim mi taim mama i no karim mi yet. Mi no kamap yet long graun, tasol yu raitim pinis long buk bilong yu [“stori bilong olgeta wan wan hap bilong bodi bilong mi,” NW ].” (Song 139:16) Devit i tok “taim mama i no karim mi yet,” olsem na em i kamapim stret olsem laip bilong em i bin kirap taim melek bilong papa i pas wantaim kiau bilong mama, paslain tru long taim bilong mama i karim em. God i stiaim Devit long tok tu olsem taim laip bilong em i kirap namba wan taim long bel bilong mama, ol hap bilong bodi bilong em i bihainim lo God i “raitim” pinis, na dispela i kamapim em.
Plis tingim tu olsem Baibel i no tok meri i kamapim wanpela hap blut nating taim em i kisim bel, nogat. Baibel i tok “mama i kisim bel na nau laip bilong wanpela man i kamap pinis!” (Jop 3:3, NW ) Dispela tok bilong Baibel, em tu i soim olsem laip bilong pikinini i kirap taim mama i kisim bel. Yes, laip bilong man i kirap long dispela taim stret.
[Futnot]
a Ol i save redim sut i gat strongpela sol long en na givim sut long bel bilong mama, na bebi bai daunim dispela sol na em bai i dai insait long tupela aua. Bihain long 24 aua, meri bai pilim pen bilong karim pikinini na em bai karim pikinini i dai pinis o— wan wan taim tasol—pikinini i wok long i dai isi isi.
[Ol Piksa long pes 6, 7]
Taim pikinini i gat 5-pela wik pinis, em i no stap olsem wanpela hap blut nating, nogat—insait long en i gat ol samting bilong kamapim olgeta hap bilong bodi
(sais stret)