Laip—Em Presen i Kam Long God
LONG olgeta aua klok bilong yumi i save pamim blut i go long olgeta hap skin bilong yumi. Na taim yumi slip, wetlewa bilong yumi i wok i stap. Taim yumi kaikai, bel i mekim wok long dispela kaikai. Ol dispela samting i wok olsem long olgeta de, na yumi no tokim ol hap skin long mekim; bilong ol yet na i wok olsem. Em wanpela bikpela samting, tasol yumi no save tingim. Em i olsem wanpela gutpela presen, ol i kolim laip o i stap bilong yumi, na God i givim long yumi olsem prais, na i wok olsem wanpela mirakel samting.
Yumi ken stori long olsem wanem pikinini i save kamap. Skin i save sakim na rausim ol samting i no stret long em, tasol bel bilong mama i no mekim olsem long kiau i wok long kamap pikinini. Bel i lukautim na givim kaikai long en inap long em i kamap pikinini. Pikinini i kamap long wanpela bilum long bel bilong mama, na sapos bilum i rausim pikinini taim em i blut yet, pikinini i no inap kamap.
Taim pikinini i gat 4-pela mun insait long bel bilong mama, em i wok long putim pinga long maus bilong em na i pulim olsem susu. Dispela samting i strongim ol masol long maus bilong pikinini na bai em inap dring susu bilong mama long bihain. Ol dispela samting i kamap long taim pikinini i stap yet long bel bilong mama, long wanem, ol dispela samting i redim pikinini long taim em i mas lusim bel bilong mama na em i ken wok long kamap bikpela.
Taim pikinini i stap yet long bel, klok bilong em i gat hul long en, tasol dispela hul i save pas bek long taim mama i karim. Na taim pikinini i stap yet long bel, em i gat wanpela bikpela rop bilong karim blut na i no go long wetlewa, tasol taim mama i karim, dispela rop i pas na nau blut i wok long i go long wetlewa na givim oksijen long wetlewa long taim pikinini i wok long pulim win.
Na i gat planti samting moa i save kamap long skin bilong man na bai em inap long i stap laip, olsem ol samting bilong pulim win, na ol samting bilong blut, na ol liklik rop bilong kirapim skin long mekim wok, na ol glan. Ol dispela samting i save wok gutpela tru wantaim, na ol dokta i no save ol i mekim olsem wanem, tasol em i samting bilong helpim yumi long i stap. Wanpela man bilong bipo em i beten long God na i tok: “Mi pret long yu, olsem na mi litimapim nem bilong yu. Olgeta samting yu wokim i narakain na i nambawan tru. Mi save gut long dispela samting na mi pilim tru.”—Buk Song 139:14.
Dispela man i no bin bilip long evolusen. Em i no ting man i kamap nating long graun, nogat. Sapos yumi kamap nating bai yumi no gat wok long bihainim laik bilong wanpela man i bin wokim na kamapim yumi. Tasol taim yumi tingim ol samting bilong i stap bilong yumi na bilong skin bilong yumi, yumi save wanpela Man i bin wokim yumi. Baibel i tok: “Olgeta wan wan haus i gat man i bin wokim em. Tasol God i bin wokim olgeta samting.” (Hibru 3:4) Olsem na yumi mas save, “God tru . . . i bin wokim yumi, olsem na yumi bilong em yet.” (Buk Song 100:3) Tru tumas, laip em i gutpela samting God yet i givim long yumi.—Buk Song 36:9.
Olsem na nau yumi laik save, yumi mas mekim wanem ol wok bilong dispela Man bilong givim laip long yumi? Em i laik bai yumi mekim wanem? Bai yumi kamapim ol dispela samting long narapela stori bihain long dispela.